[dropcap]Я[/dropcap]нварьданул 30-нний АьФ-лул Федерал Мажлисрал Па­ччахIлугърал Думалул депутат Юрий Левицкий ивунни Мурад Къажлаевлул школалийн. Мунащал архIал бия ДР-лул культуралул министр Зарема Буттаева.

Бадрижамал Аьлиева
Бусравсса хъамал хьунабавкьунни Мурад Къажлаевлущал. Мунал бувсунни школалул мукьра отделениялий, захIматсса программарттугу гьанулун ларсун, оьрчIахь дарсру дихьлай бушиву республикалий хьхьичIунсса магьирлугърал усттартал. Бувсунни чIун-чIумуй дувайшиву билаятрайх цIа ларгсса педагогталгу гьур­ттусса мастер-классру.

[dropcap]Ш[/dropcap]кола тIивтIусса 2008-ку шиная шинмай шикку ккала­ккисса оьрчIру цимилгу хьуссар дунияллул халкьуннал дянив­сса ва билаятрал лагрулийсса конкурсирттал ва фестиваллал дипломантътал, гьуртту хьуссар республикалий ва билаятрай дуллалисса хъунисса концертирттай.

Мурад Къажлаевлул школалий дуклакиминнаясса чара бакъасса тIалавшиннану хъанахъиссар дагъусттаннал кла­ссикалул музыка щаллу буллалаву.

  Композиторнал бувсунни хъамаллурахь аудиторияр­ттал классру биялну бакъашиву, цIуллу-сагъшиврул ссуссукьу­сса оьрчIру ккалансса шартIру дакъашиву. Хъамаллурал махъ буллунни гьаз бувсса масъалартту щаллу бавриву кабакьу буван.

Хъамал бувккунни школалийх, яхши-хаш бунни оьрчIахь ва муаьллимтурахь, ххал бунни республикалий цалчинсса «Дагъусттаннал музыкалул культуралул музей», цувгу Мурад Къажлаевлул тIивтIусса.

Юрий Левицкийл Мурад Къажлаевлухьхьун буллунни Барчаллагьрал чагъар ва  дурунни хъамакъабитулунсса бахшиш.