Январь зурул 14-нний ДР-лул Виваллил иширттал министерстволий хьунни ларгсса шинал хIасиллу дуллалисса коллегиялул мажлис.

Андриана Аьбдуллаева
Шикку гьуртту хьунни Дагъус­ттаннал БакIчи Владимир Васильев, Виваллил иширттал министр, полициялул генерал-лейтенант Аьвдурашид МахIаммадов, республикалул ихтиярду дуруччай органнал каялувчитал ва цаймигу вакилтал. Мажлис тIитIлай, Аьвдурашид МахIаммадовлул бувсунни ларгсса шинал цала министерствалул хъуннасса даву дуршиву жяматийсса низам дуруччаву ва агьалинал мюхчаншиву дузал даву мурадрай,мунийну республикалийсса тагьар цалий дугьан бювхъушиву. Министрнал кIицI лавгунни, хьхьичIми шиннардий кунма, ларгсса шиналгу ххишаласса къулагъасрайн лавсун бивкIшиву терроризмалийн ва экстремизмалийн къарши бацIаврил масъала ва мунийну республикалий щуруй бивкIсса къачагътурал группарду сайки бухлаган бан бювхъушиву.Амма, министрнал тIимунийн бувну, ва чулухуннайсса даву ттигу хьхьара дан бучIину бакъар.Экстремизмалул ва терроризмалул идеология ппив дуллай бур интернетрайхчIин, уттинин ихтиярду дуруччай органнал итталун къабагьсса дунияллул террористурал организациярттал чул бувгьуминная сакин хъанай дур «шанаши ячейкартту». Республикалийн бучIан кьаст лахIлай бур Гъанмур Магърибуллал билаятирттай дунияллул террористурал кьюкьраву талай бивкIми.

— ХIайп, терроризмалущал­сса ва экстремизмалущалсса талатавриву оьрмулуцIа хьунни кIия виваллил иширттал органнал зузала ва ца ФСБ-лул зузала, щавурду дирунни 12 ихтиярду дуруччай органнал зузалайн,-увкунни министрнал.
Аьвдурашид МахIаммадов­лул мукунма бувсунни къачагъшивуртту,къавкъиншивуртту, инсантал ливтIусса ва ма­шинартту бавцу­сса ишру ашкара баврил ккаккияртту, хьхьичIмур шинах бурувгун, ххуйсса хьушиву,чан хьушиву цурк, гуж-къия дурсса,инсаннал цIуллу-сагъшиврун зарал був­сса ишру.

Министрнал кIицI дунни ца­ла давривусса диялдакъашивурттугу.Бувсунни ххишаласса къулагъа­срайн ласун багьлай бушиву наркотикру закондалуцIун къабавкьуну ишакаш баврил, экономикалуцIун дархIусса тахсиркаршивурттайн къарши бацIаврил масъалартту, ххишалану ялув бацIан багьлай бушиву агьалинащалсса ва чил билаятирттаясса инсантуращалсса даврил, хаснува захIматрал миграциялул аралуву.
Коллегиялий ихтилатру був­сса цинявннал кIицI лавгунни ларгсса шиналсса республикалул виваллил иширттал министерствалул даврил ккаккияртту аьмну ххуй-хъинсса хьушиву. Дурмунил ва данмунил аьщуй-ххуттай авцIусса ихтилат бунни виваллил иширттал министрнал хъиривчу Дмитрий Гутырял.
Жяматийсса низам дуруччаврил ккаккиярттугу оьккисса къархьушиву кIицI лавгунни Дагъус­ттаннал БакIчи Владимир Васильевлул.
-Полициялул зузалтрал лавайсса даражалий цала пишалул буржру бартбигьаврийну 2018-ку шинал республикалий хъунна­сса агьамшиву дусса политикалул, жяматрал ва спортрал мероприятияртту дан бювхъунни,-увкунни В.Васильевлул.
Ихтилатру къуртал хьуну махъ Аьвдурашид МахIаммадовлул паччахIлугърал ва ведомстволул наградартту дуллунни давриву хьхьичIунсса зузалтран.