Цал ттигу Эса Аьбдуллаевлул, аьлимчувнал багьа бищун къашайсса захIмат — Лакку мазрал ва оьрус мазрал словардания. Жува яру личавай ялугьлай буссияв ва словарь дунияллийн букканнин. Буккайхтугу, кувннаща ку зехлай, хъямала бан аьркинсса захIматри ва.
Качар ХIусайнаева
[dropcap]А[/dropcap]ьлимчунал, щаллу-ккурккисса институтирттал цимигу шиннардий байсса захIмат бакIуйн буккан бувну бур кIа яла бюхттулмур элмулул даражалий. Ва цала миллатрал цIаний аьлимчунал бувсса багьа бищун къашайсса захIматри.
ХIакьину элмулул зузалтран хIукуматрал чулухасса кумаграх ялугьлай бацIан пайда бакъар. Аьлимчунал цала кIюласса даражалух бивщуну, дунияллийн буккан бувну бур цала рухIгу, жангу харж дурсса захIмат. ЧантI учияра лак! ТIалав бара зула ужагърайн зула миллатрал тарихралгу, культуралулгу барашинсса лакку мазрал словарь. МахIаттал хьияра аьлимчунащал архIал зула ниттил мазрал аваданшиврий, мунил кашилул бюхттулшиврий.
[dropcap]З[/dropcap]увиазарва махъ бусса ва авадансса словарьданувунгума, биялсса бунугу, так ца бутIар тIар жула мазрал бувхсса. Эса Аьбдуллаевлул элмийсса архивраву ряхцIалазарва лакку мукъул луртан ттигу дусса дур. Жува чIарав бацIарча, вайгу цIусса словарданий дунияллийн буккан аьркинссар. Цила чIумал Гьарун Саэдовлул увкусса куццуй, «аьзизсса миллатран хъинбала буллай» жула хъунасса аьлимчу, калам щяв къабишавай, зий ур цимигу ацIрахъул шинал лажиндарай. ЧIунни жунмагу, миллатрал язисса арснал захIматрал кьадругу кIул хьуну, ванал чIарав бацIан, хъунасса аьлимчунал хъуслил хIужрардал заллухъру жува цинявппагу хьуншиврул.
