![](http://ilchi.beget.tech/wp-content/uploads/2018/11/svey.jpg)
Ккуллал райондалул кIулшиву дулаврил управлениялул каялувчи Камил ТIилиевлущалсса ихтилат.
— Камил, дурусну кIива барз лавгунни ина Ккуллал райондалул кIулшиву ласаврил управлениялул каялувчину ивтния махъ. Цукунсса хъанай дур дайдихьу?
— Ттул кIивагу барз лавгунни школарттай ишру цукун най бурив кIул буллай. Аьмну лавсъсса чIумал, чIалан бивкIунни учительтал цала касму хъинну ххуйну кIулсса пишакартал бушиву. Амма райондалийсса кIива школа личIаннин, гайми дух хьусса, ччянира дурну диркIсса къатраву бур.
Школартту бакъагу, жул биялалий бур оьрчIал багъругу. Ми бур Хъусрахь, Ккулув, Ваччав, Вихьлив. ЧIяйннал ва Хъювхъиял шяравуми оьрчIал багъру багьайссар школарттайн. Бур пагьламантурал школа ЦIувкIрав, музыкалул школа – Хъусрахь, искусствалул – Вихьлив. Бур оьрчIал ва жагьилтурал спортрал школартту Ккулув ва Вихьлив. Райондалий бур оьрчIал творчествалул къатта. Цинявппагу дуккаврил идарартту хъанай бур 23. Школарттай дуклакисса оьрчIал сияхI дур 757.
— Ина кIицI бунни райондалийсса чIявуми школартту дух хьусса къатраву бушиву. Бурив миннуву «Бакьин бансса 100 школа» тIисса проектрайн багьлагьиссагу?
— Бур. Мукунсса школарттуну хъанай бур Хъусращиял ва Ккуллал 1-мур школа. ХIукуматрал итадаркьуну дур гьарца школалун 2 миллион къурушрал. Яла шяраваллал меценатътуралгу ка-кумаг буллай бур. Хъусращиял шяраву кумаг бувсса инсанталну хьунни: Аьлиев Ибрагьин, ЦIинпаев Имран, Абакаров Жабир, МахIаммадов Шихамир, Сяидов Шамил, МахIаммадова Ирина. Ккуллал шяраву кумаг бувсса инсанталну хьунни: Расулов Аьбдулла, Кьубатаев МахIаммад, Аккуев Карин, Мурачуев Рамазан, Кьурбанов Чупалав, Аьлиев ХIасан, МахIаммадов Рамуза, Жабраилов Алексей, Кьадиров Халид, Исакьов ХIасан. Шиккува кIицI буван, Вихьуллал шяраву буллай бачIину ливчIсса школалий 2019-ку шинал лирчIми давурттив дувантIишиву бувсунни министерствалул.
— Школартту учебникирттал дузал баврил даву цукунсса дур?
— Жула Аьрасатнаву школарттай дуклакисса оьрчIан кIулшиву дулаву украссар. Учебникругу мукунма хIукуматрал щаллу буван аьркинссар. Бур дузал къахъанахъисса учебникругу. Миннул сияхI диян дурссар министерствалийн.
— Автобусирттал иш цукун бур?
— Цила чIумал оьрчIру ца шярава гамур шяравун школалийн биян буллан буллуну бивкIссар Ккуллал райондалул школарттан арулва автобус. Ми цIана бух хьуну, техникалун ккаккан дурсса шинну чIарах дурксса машинартту бур. Заявка дуларду, цими булунссарив къакIулли.
— Дуклаки оьрчIру дукиялул щаллу баву дуссарив жучIара?
— Дуссар. Мукьилчинмур классравун бияннинсса оьрчIан дулайссар ахттайнсса. Ца оьрчIан ахттайнссаннун ккаккан дурну дур 15 къуруш. ОьрчIал багъирдаву дур 50 къуруш ца оьрчIан ккаккан дурну.
— Зий буссарив школарттай компьютердал классру?
— Зий буссар. Амма зунттал районнай интернет ххуйну къазий душаврийн бувну, ми классирттая щала мюнпат ласун хъанай бакъар. Ва иширахагу зий буру.
— Камил, чан-кьансса бухьурчагу, бувсун ччива виятувагу.
— На увссара Ккуллал шяраву 1980-ку шинал. Ттул буттайн МахIаммад, ниттийн Мисиду учайссар. Вай бур учительтал. ХIакьинугу зий буссар Ккуллал 2-мур школалий. 1997-ку шинал школа къуртал бувайхту, на дуклан ухссияв Дагъусттаннал педагогикалул университетрал физкультуралул факультетрайн. Университет къуртал бувссар 2002-ку шинал. Хъиривмур шинал лавгра армиялийн.
Зана хьуну махъ, аспирантуралувунгу увххун, зий уссияв физкультуралул дарс дихьлай гава университетраву, МахIачкъалаллал школарттай. Гьашину март зуруй бювхъунни ттуща кандидатнал диссертациягу дуруччин – педагогикалул элмурдал кандидатнал цIа ласун. Август зурул ахирдания шинай зий ура ва даврий.
— Уттигу ца суал. Учительнал давриву яла дахчаймур зат ци дурвав?
— Му дахчайсса затну хъанан дикIай курчIилшиву. ЦукунчIав учительнан курчIилшиврухьхьун мадад булун къааьркинссар.
— Барчаллагь, Камил, жул суаллахьхьун дуллусса жавабирттахлу.