[dropcap]Ш[/dropcap]яралийн (простуда) хIакинтурал ОРВИ учай. Вагу дияйсса дур инсаннайн вирусрайхчил, амма вай вирусру муксса агрессивнайсса бакъа­сса бур, мунияту шяра лахъангу муксса къазахIматссар.

Гриппрал тIурча, оьдикIарча, осложнение дулайсса дур къюкIлийн, гьутрурдайн. Мунияту, грипп простудалия личIи дан кIулну бикIияра. Цуксса ччяни байбивхьурув хъин хъанай, муксса ччяни, оь къадиркIун, хъин дайссар азаргу.

---

Шяра
— КIива-шанма гьантлий чур­ххал хIал баххана хъанай байбишайссар;
— Чурххал кIиришиву муксса лахъ къашайссар (37-37,5 градус).
— Аьвкъу-гъили хьусса инсан муксса инжит къашайссар, мунияту зун ихтияр дуссар.
— БакI чанну цIун бикIайссар, агарда май бувгьуну бухьурча.
— Инсан хъинну аьнча тIун икIайссар. Май бащайссар, ссихI бигьлан захIмат шайссар, май щинал нан бикIайссар, яла щюллисса затру дачайссар.
— Кьакьари ятIул лагайссар, ччун бикIайссар, за дюкьан захIмат шайссар. — Хъугьу тIун икIайссар.
— Шяра ччаннай лахъан къабучIиссар, утту бишияра 2-3 гьантлийсса.
— Кьакьари вилаглагияра гьантлун 4-5-лла, ца стакан гъилисса щинавун ца чяйлул къуса содалул бивчуну. ХIачIлачIияра «эхинацея».

Грипп
— Ва шайссар хавар бакъа, ца кьини, ялун чIалачIисса багьан­ттугу бакъанма.
— Чурххал кIиришиву гьаз шайссар 38,5 – 40 градусрайн дияннин, чурххавун зурзу буххай­ссар;
— Гриппрал къашавайсса инсаннал шания изансса хIал къабикIайссар. БакI пIякь учавай цIун бикIайссар, яру ятIул лагай­ссар, цIун бикIайссар, бючIунбишив (мышцы) цIун бикIайссар, утту ивхьуну унугу.
— Аьнч учин ччан къаби­кIайссар, май цал-цал бугьайссар. Май щинал нан къабикIайссар ссихI рахIатну бигьлан икIай­ссар.
— Кьакьари чан-чанну цIун бикIайссар. Хъугьу хьхьичIсса 2-3 гьантлий кьавкьсса бикIайссар, яла хъирив – ах-пувлущалсса.
— Чара бакъа оьвчин аьркин­ссар терапевтнайн. Зула зува хъин махъанарду, уттубишияра, акъарив, грипп оьдиркIун, къюкI ва гьут­рурду цIуцIи шайссар.

Р.S. ХIакинтурал маслихIат бай кIиришиву (агарда 38,5 градусраяр лагьсса духьурча) лагь къадуллан. КIиришиву духIан хъанай бакъахьурча, хIачIияра ца таблетка парацетамолданул.

ХIадур бувссар
Т. ХIажиевал