Июнь зурул 6-нний (2013 ш.) ссят 07.30 мин. хьусса чIумал къаралчи акъасса, амма сигнализация зузисса муххал ххуллул переездрай №4223 поездрал цуппалусса локомотив щуну бур «ВАЗ-2106» машиналийн.
(гос.н. М569 УК 05 rus). ШупIир увккун ур переездрайн гъанну нанисса поездрал хьхьичIун, сигнализациялул къадагъа дуллай дунура.
Ва ДТП-луву оьрмулуцIа хьуну бур машиналул шупIир Г.К. Асельдеров, мунащал най бивкIсса К.У. Асельдерова, К.З. Умарбеков. Вай циняв Къарамащилиясса бур.
МахIачкъалаллал региондалийн багьлагьисса муххал ххуллул переездирттай мюхчаншиву дузал даврил тагьар ялу-ялун оькки хъанай дур. ЦIанасса чIумал Ухссавнил Ккавкказуллал муххал ххуллий 18 ДТП хьуну дур. Миннувату 2 ДТП Дагъусттаннай хьуну дур. Вай иширттаву 20 инсаннан зарал бивну бур, 7 инсан ивкIуну ур.
ШупIиртуран дакIний битан аьркинни муххал ххуллул переезд – яла нигьачIаву хъуннамур, яла мугъаятну бикIан багьлагьимур ххуллул бутIа бушиву, переездрайх наниний ххуллул низамрава буккан цукунчIав къабучIишиву.
ШупIирнал баччибакъашиву багьана хьуну, чIявусса инсантал оьрмурдацIа хьун бюхъайссар. Му бакъассагу, бюхъайссар цIу лачIун, пIякь учаву хьун.
ХIурмат бусса шупIиртал!
Пикри бувара, цаппара минутIиртталшиврий, зува циксса инсантурал бакIрачIан бала буцин най буссарув. ДакIний битияра, зуллагу, цайминналгу мюхчаншиву зуятура хъар хъанахъишиву. Зува цIуллу-сагъну аьрххилия зана бикIаннин шаппами ялугьлай бушиву.
Сиражуттин МахIадов, МахIачкъалаллал региондалийсса СКЖД-лул инфраструктуралул дирекциялул хъунама
ХIадур бувссар А. Аьбдуллаевал
