Ларгсса ххуллун кьини республикалул оьрму хьунни личIи-личIисса, цанниха ца къалавхьхьусса иширттал авадансса ва дакIний личIансса.
Му кьини, щалла дунияллий кунна, МахIачкъалаливгу ОьрчIал кьинилун хасну дуллалисса шадлугъирттацIун, чIаххуврайсса Чачаннал Грознайлив жулла команда «ЦСКА» -лущал ччалли дуклай Аьрасатнал футболданул чемпионатрал кубокрал матч дия ва хьхьувай, кIива зурул хьхьичIва баян бувсса куццуй, Аьрасатнал шоу-бизнесрал вакилтурайнгу оьвкуну, «Анжи-Арена» тIитIлатIисса хъуннасса шадлугъ дан хIадур хьуну бия. Му кьини Аьрасатнал чемпионатрал кубок ласун кьисмат къахьурчагу, жулла команда лахъа-хъун дуллалисса ва билаятрай ца яла ххуйсса уттизаманнул стадион тIитIлатIисса шадлугърив кIицI лагантIишиврийн гьарма дакI дарцIуну ухьунссия.
[tube]https://www.youtube.com/watch?v=f1Cnqf7CMt4&feature=youtu.be&t=16s[/tube]
Мукун хьугу-хьунни. Му кьини МахIачкъалаллал бачIи халкь«Анжи-Ареналул» стадиондалий тамашалий буна, «Дагъусттан» РГВК-лувух прямой эфир дуну, миннаяр кIили-шамли ххишала телевизордахссагу бухьунссия. Му ппурттуву ттун Интернет лявкъуна щара-кIама лавхъун, жулва халкьуннан чIихьра цири макIравагу ккаккан хьул-умуд кьувкьуну бивкIсса иш сававну. Хъуншагьрулул майданнив вертолет дацIан дурну, шагьрулул бакIчи увгьуну, чуннив увцуну лавгун ур тIисса хаварду бия социал сетирдал ва цаймигу сайтирдал хьхьичIххуттаймур хавар. Интернетраву бакъасса хавар къабикIайхха куну, щалла вихшала къадирхьуссия, амма Цалчинмур каналданийсса ва НТВ-лийсса цIусса хавардавух: «МахIачкъалаллал бакIчи увгьуну, Москавлив увцуну ур» тIисса хавар бавну махъ мукIру хьуссияв, ва иш мяйжаннугусса бур куну.
Хъиривва Аьрасатнал личIи-личIисса печатьрал ва электрон изданиярттай ва иширал хIакъираву чIявусса халкьуннал дуллуну дур интервьюрду ва гихуннай республикалул тагьар цукунсса дикIантIиссарив бусласисса цалва пикри-зикрирду.
«Кавказская политика» электрон изданиялул журналистнал суаллахьхьун жавабру дуллай, РАМСОМ регионнай ххалбигьавуртту дувайсса социал экономикалул Центрданул хъунама Денис Соколов тIий ур:
«Амировлул империялун дия сакин дурну ляличIисса централизация. Ва иширайн учин бучIир «кьянкьасса инсаннащал» кьадарданул бувсса оьсса хъярч-махсара куну. МахIачкъалаллал мэрнал сакин бувсса бизнес-центрданул гихуннаймур тагьар цаппара иширттал биялдаралу личIлачIиссар. Миннува кIива иширая кIицI лаганна- мунай аьй къаляркъуну, му махъунай зана хьун бюхъаву ва му куна гьарца затрал ялув авцIусса мунал кIанай зунсса инсан итаву. Дагъусттаннай буссар цалва хъунисса «армияртту» ва амбициярду бусса халкь, амма миннаву лякъин ххай акъара цалва оьрмурдай жард къаувкусса, дурарагу нигь-ццах дакъасса инсан. Цанчирча Амиров ивкIун тIий гьарца кьини цинявннаяр дирисса, цинявннаяр рахIму бакъасса, цинявннаяр макрузансса ва нигь-нач дакъасса. ЩищакIуй бюхълай бакъая мунаяр ялтту увккун, хьхьичIун личин. Мунал сакин дурну дия бизнес-корпорация. Шикку кIицI лаган аьркинссар жулла хIукуматрай МахIачкъала ца яла анаварну хъунма хъанахъисса шагьру бушиву. МахIачкъалалив дур цалла куклумур промышленность (усру, мебель дуллалисса), дуки-хIачIиялул промышленность ва строй материалданул производство. Щалва Аьрасатнаву индустриялул мархха-гьану ппив-ххив бувну бур, мукунма Дагъусттаннайгу, амма МахIачкъалалив тIутIайх дирчуну дур чIиримур ишбажаранчишиву. На ва ца Амировлуща дакъа дан къашайсса давур учин ччай акъара, на ура мунан кIанай Саэд Жаппаровичлул дурмур ядансса инсан учIан аьркинссар тIий. Мунал дурсса давурттал къат ххартI дулларча, чIявусса халкь зузи кIанттурдацIа хьунтIиссар ва миччасса капитал цайми шагьрурдайн бачинтIиссар. Зунттавунмай къабачинтIиссарча, Ставрополлайн, Москавлив ва цайми шагьрурдайн бачинтIиссар».
«Комсомольская правда» кказитрайн дуллусса интервьюраву Дагъусттаннал Президентнал кIанайсса Рамазан АьбдуллатIипов тIий ур: « Дагъусттаннай хъуни къуллугъру тухумирттахь бакъассар, му Москавуллал ляхъан бувсса затри. Дур жучIара мафиялул ккуранну сакин дурну, яла миннуйн тухумру тIий бур. Гьарма цахава цува зий ия цала лагма-ялтту цанма аьркинсса халкьгу бавтIун.
Ттул пикрилий, най дур захIматсса ва лахъи лагансса даву. Лахъи лаган тIий дунугу, даву нантIиссар, цанчирча ва Аьрасатнал Президентнал политикалул ххуллур».
Шагьрулул бакIчи угьан, аьрали техникагу ишла дурну, гужсса спецоперация баврил савав цир, тIисса суалданун Рамазан АьбдуллатIипов тIий ур: «На ура запасрал старшина, полковниктал ва генералтал ссаха зий буссарив ттун балжину къакIулли».
Республикалул криминал тагьар къулай даврил давуртту ттигу лахъи лагантIиссарив тIисса суалданун ва тIий ур : «Республикалийгу, аьмну Ухссавнил Ккавкказнавугу тагьар къулай даву Аьрасатнал Президентнал политикар. Жу тIурча буру му политика дузал дуллалисса чIарахбацIулт. Жулва буржгу лахъланну багьайссаксса».
«Кавказская политика» изданиялущал цалва пикри-зикри кIибачIлай цIадурсса журналист Орхан Джемаль тIий ур: «Укунмасса москавуллал халкьуннан Амиров ур провинциал шагьрулул бакIчи. Мукун бунугу му провинциал шагьрулул бакIчи къала хьусса, хъунасса инсан ур. Билаятрайгу цалла хIукумат сакин дурсса, цана цува спецслужба, аьркинну бухьурча цалва хъунбакъасса аьралгума буккан бан бюхъайсса инсан ур.
Амиров ур дянивмур ттуршукулул барон куна занакьулу хъанахъисса уттизаманнул къуллугъчи. Цалгу, рахIму къабувну, цайми аваданчутал бухлаган бувсса, халкьунная дагьайсса дишала датIлай ивкIсса инсан.
Амиров канихьхьун ласласисса спецоперациягу агьамсса къуллугърайсса къуллугъчи угьлагьисса кунмасса иш бакъаяча, Африканал цумурдив ца хIукуматрайсса президент-диктатор угьлагьисса кунмасса ишираха лархьхьусса тагьар дия».
Азбар.ру сайтрайсса интервьюраву Аьрасатнал Элмулул академиялул Этнологиялул ва антропологиялул институтрал хъунама элмийсса зузала АхIмад Ярлыкапов тIий ур: «Дагъусттаннал бакIчишиву дан ччиминнал бяст-ччал миллатирттал дянивсса бяст-ччаллийн кIура баен тIий бунуккар. Шикку кIицI лаганна, цува таний Амиров цала къуллугърайн увкIун ивкIшиву «интернациолизмрал» карта канихьну. Ттигу ччяри гъалгъа тIун та хьунтIиссарив къакIулсса мэрнал бувчIавурттая. ЧIявусса кIанттурду республикалул каялувшинналул аькьилшиврул биялдаралу бикIантIиссар. Амиров ур хъинну аькьлу бусса, хъунисса дахIавуртту дусса инсан. Гихунмай ци иш бикIантIиссарив къабувчIланну, иширал ккаккан банссар.
«Известия» кказитрахь президентнал администрациялул вакилнал бувсмунийн бувну, Дагъусттаннал хъуншагьрулул бакIчи Саэд Амиров инсан ивчIаврил сакинчи хIисаврай щакиралу ушиврийн бувну му угьансса санкция Кремльданул дуллуну дур.
Мэрнал хъирив ххал буллантIиссар ва щакиралун ласун тIий бусса бур Саэд Амировлул мачча-гъан, цанчирча миннал канихь буну тIий хIукуматрал структурардавусса хъуни къуллугъру, буслай бур «Известия» кказитрахь Дагъусттаннал бакIчинал администрация.
«Буттахлу арснал жаваб къадулайссар, аммаки ххалбигьавуртту ва хъиривлаявуртту дан багьлай бур», — тIий ур изданиялул ихтилатчи.
«Независимая газета» кказитрай ва иширал хIакъираву буслай бур хъуншагьрулул бакIчи увгьуну зузи нюжмарданул цалчинмур кьини МахIачкъалаллал администрациялул сайтрай бувкшиву шагьрулул парламентрал депутатътурал къулбасру дурсса шагьрулул бакIчинан кумагрансса тIивтIу чагъар. Амма Москавуллал Басманный судрал ккаккан бувсса куццуй, мэр щяитантIиссар августрал 1-ннин.
Аьли Камалов, ДР-лул Журналистурал союзрал председатель, «ХIакьикьат» кказитрал хъунама редактор:
— Гьарцагу хIукумат цалва билаятрай низам дишин буржлувссар. Жула учайссар, «хIукумат аьрщарай алжан бан сакин къадурссарча, дужагь хьун къабитаншиврулли дурсса» куну. Цумур-цагу къавкъиншиву, низамлияву, щил дурсса духьурчагу, аьщуйн ларсун, мунан танмихI бикIан аьркинссар, тIулуйн уцин аьркинссар. Ва дунияллий циняв халкь закондалулгу, Хъунасса Занналгу хьхьичI цакуццуй бацIан аьркинссар. Умуд бихьлай ура хIукуматрал низам цIакь дувантIишиврийн. Ахиргу хъинну ххарира хIукумат щурун диркIун тIий, халкьуннал чулухуннай кIура даллай тIий. Къуллугъирттайн бувкIун хъунма хIал къавхьуну авадан хьусса халкьуннал хъус национализировать дан аьркинссар, халкьуннахьхьун дулун аьркинссар. Миннал хъуни чIалъаьрдая хьунссия халкьуннал ишла буллансса хъинсса социал объектру: детсадру, санаторияртту, школарду, спортзаллу ва цаймигу идарартту. Шагьрурдай дакъасса миннал хъус-кьини, аьрщив, чIалъаьрду хьусса къатри дур щархъаву, районнайгу. Хъунма хIаллай къуллугърай зий къаивкIсса инсаннан чари миксса хъус-кьинилул заллу хьунсса арцу? ХIукумат хъямала дуллай къаивкIхьурча? Таний вацIраву, хьхьирил зумардай, зунттаву бивкIсса халкь бигьалагай зонарду, пионер лагерьду зана бан аьркинссар махъунмай халкьуннахьхьун. Цанчирча ми миннал хъусри.
Масалдаран, на рязира байбишин ттула Гъуниннал райондалия. Гъуниннал цIа ларгсса яла язими, ххуйми кIанттурдай дур дурну авадан халкьуннал хъуни къатри, магьраву кунмасса чIалъаьрду. Миннуя хьунссия захIматсса цIуцIавуртту дусса халкь хъин бувансса идарартту. ТIабиаьтралгу, къулайшиннардалгу, зунттал гьавалулгу кабакьу бувайсса бакъарив мукунсса къашайшалтран.
ХIукуматрал низам дишин кьаст лархIукун, ттухь цIувххуну, хьхьичIва-хьхьичI ва ххуллийх ша ласлай байбишин аьркинссар.
МК. RU изданиялийсса журналист Мурад Атаевлул увкумунива:
— Амиров кунасса цама политик акъахьунссар хронический дотациярдал масъала дузал буван кIулсса. Дагъусттаннай ца МахIачкъалаллал дакъа царагу муниципалитетрал къаратIайссар сайки циняр налогру. Аьрасатнаву Ккавкказуллал региондалун чIярусса дотациярду дуллай бур тIисса рязибакъашивуртту дуни хъинну агьамсса ишну хъанахъиссар налогирттал системалуву низам душиву ва социал сфера хьхьичIунмай хъанахъаву. ХIакьину МахIачкъалалив 20 миллиард налогирттал батIайссар — ми кIилий чIяруссар щалва Дагъусттаннай датIайсса налогирттаяр. Саэд Амиров ур обществалул социал структурардаву низам дирхьусса гьунар бусса политикгу, шагьрулул бакIчигу. Цайми чIаххувсса регионнай бакъасса тяхъашивуртту дувайсса идарартту, дахху-ласулул центрду, хьхьирил пляж ва цаймигу кIанттурду тIивтIуну, микку зузисса халкьру давурттал щаллу бувсса инсанни му. Амиров ур интернационалист, цала лагма дагъусттаннал циняв миллатирттал вакилтал лаган бувну зузисса. Таний мунал цIа щурщулийрагу зумух ласун къабюхълай бивкIсса халкь, хIакьину бур мунай циняв дунияллул бунагьру бишин ччай.
Аьрасатнал Жяматийсса палаталувусса миллатирттал, миграционный политикалул ва диндалул комиссиялул бакIчи Максим Шевченкол «Дождь» телекомпаниялий дуллусса интервьюрава:
— Дагъусттаннайн чIаххуврайсса Чачаннава къачагътал ххявхсса шинал Амировлул сакин дурну диркIссар ярагъуннил балгусса ополчентурал кьюкьри. Таний гая ми кьюкьрал бакIчинугу ивкIсса. Шинну най, замана баххана хъанай, хIакьинусса иш-тагьар цамур хьуну дур. ХIакьину Дагъусттаннай цири, Аьрасатнавугума ца яла махъ нанисса инсан увгьуну, дуснакь увну ур. ЧIявуссаннан Дагъусттан чув буссариввагу къакIулнугу, мичча бувккун бур Ухссавнил Ккавкказнаву цири, щалва Аьрасатнавугу сий дусса, чIярусса хъус-кьинилул заллухъру хьусса халкь. Жунна цинявннан кIулссар дунияллул рынокрай ацIазарвахъул миллиардру доллардансса сделкарду ва контрактру дусса халкьуннал цIарду. Керимов, уссурвал МахIаммадовхъул — вай так зунттул бакIри. Аьмну дагъусттанлувтурал духьунссар ттуршвахъул миллиардирттансса сделкарду ва контрактру. Мунияту Дагъусттан Сицилиялущал лащан бангу бюхъанссар.
Саэд Амиров дагъусттаннал элиталул инсан хIисаврай ур федерал центрданийгума цIакьсса гьану бивхьусса цила багьайкунсса мафиози.
Му увгьусса кьини нагу уссияв Чачаннаву «Анжи» ва ЦСКА командарттал футболданул чемпионатрайн лавгун. Гичча Дагъусттаннайнгу лавгссияв «Анжи-Арена» стадион тIитIлатIисса шадлугърайн. Ттун ттунма гъанну ккавккунни дагъусттаннал политикалул элита га кьини махIаттал-хIайран хьуну му иширая бавну, къагъ лавгсса кунма. Республикалул бакIчи цува ухьунссия му даву дурсса куццул махIаттал увну.
Гьай-гьай , му федерал центрданул хIукмур, миннал давур. Му агьамсса даврил мяънагу бувчIучIан къалавгунма пIякь диркIун чIалай дур. Дагъусттаннал бакIчи республикалул парламентрал увчIинсса закон цIакь дуркун, федерал центрданун бувчIухьунссар парламентрал Амиров увчIин бюхъайшиву. Яла жунма кIулли мунал кIиягу арсгу республикалий хъунисса къуллугъирттай бушиву, ва Амировлул щарнил ссугу региондалийсса «Единая Россия» партиялул бакIчи бушиву. Москавливсса халкьуннан ччайнугу къаччайнугу Амировлуя бюхъайссия республикалул бакIчи хьун.
Ттул пикрилий, федерал центрданул региондалий цалва позициярду хьхьара барча, гиккусса цайми авадан халкьуннал гужру ххи хьуну, Амировхъал тухумрал кIанайн бучIан кьаст лархIуну, питна-дяъвирдал тагьар гуж хьунгу бюхъайссар.
Мурад Муслимов, банкрал зузала:
— Ттун къабувчIай Амировлул жулва хъуншагьру цIубуккан бувссар, мунал бувмур щищакIуй бан къавхьуссар, шагьру низамрайн бувцуссар, хъуни-хъунисса давурттив дурссар тIисса халкьуннал хаварду. Му ми давуртту къадан багьавайсса кIанай зий къаивкIссархха, хъунмасса харжгу ласлай. Шагьрулул хъунама шагьрулуха, микку ялапар хъанахъисса халкьуннаха зун итайсса акъарив, миннал мурадру буруччин итайсса акъарив.
Ялагу бур цавай Амиров тархъанну уни щилкIуй мунайн махъ учинсса гьутру биял къашайва тIий. Щихь дия мукунсса ихтияр, билаятрал бакIчинахьрагу чув дия му ихтияр?
Тава-тагу ва иш хьун аьркинссия, цанчирча мунал давуртту дия, халкь литIавурттая гъалгъавагу тIий акъара, инсаниятрайн къарши дурксса, халкь кьювкьу-кьадар буллалисса Аьрасатнал Кьиблалий ца яла ххуймур шагьрулул диц-куц бат дурсса мэр ия му.
Мираджан Гъазиева, экономист-бухгалтер:
— Цумур-цагу хIукуматрай цува ягу билаятрал ишру сававну халкь ливтIусса ишру, бала-апатIру хьурча, гацIана багъишла итирагу куну, чIиви-хъунсса шагьрулул бакIчи, буллуну аьрзагу даврия, къуллугърая укьай. Му духьунссар дунияллул аьдат. ДакIний бур ца-кIира шинал хьхьичI Япониянаву аьрщи сукку хьуну, чIявусса халкь ливтIуну, бакъа-къатIа хьуну, та шагьрулул мэр къуллугърая увкьсса.
Ца ацIра-ацIния ххюра шинал хьхьичI Амировлул цIаний щалва Пархоменко кIичIиравалу пIякь учин бувну, кулпатрува ливтIусса, ппу оьрчIацIа, щарссаницIа, нинухъру оьрчIацIа, хъами ласурваврацIа бувсса чIумал ттун му инсан му къуллугърая гьансса ххива. Къуллугърая ча гьави, ялунгума шиная шинайн цIакьгу, гужгу ххи хьуну, цалва оьрмулийн ярагъуннищал дурсса 15-16 кьаст лахIавурттаягу федерал СМИ-рдахь пахрулун кунма буслай, жулва халкьуннай зулмурду буллай ивтунни Заннал. Ахиргу, укунссагу кьини дучIайссияв тIунсса бувккун, гьарца цалла дурсса давурттал цIуххала дувансса кьини дуркIунни.
Михаил Мудуев, юрист:
— Ахиргу, Совет Союз лирну махъ, республикалул халкьуннал оь хIачIлай бивкIсса халкь бугьлай, бакьлан бивкIунни. Дагъусттаннал Президентнал кIанайсса Рамазан АьбдуллатIиповлул унгу-унгуну 180% Дагъусттаннал тарих цIубуккан бансса кьаст лархIуну чIалай ур.
Аьбдурашид Саэдов, публицист:
— Балики Москавуллал, АьбдуллатIиповлуцIун кабакьланну тIий, мунащал архIал республика криминал структуралуцIа марцI дуккан дуллай, Дагъусттаннан къуркъабацIуртту буллай, цанния кIиннийн лахъан къабитлатисса мафия духлаган дуллай, мунал дуллалисса реформарттащал рязи хъанарча, Дагъусттаннай халкь къарши бувккун, ми халкь бунийва битира тIий гьичгу кьатIув къабуккантIиссар. Ялунгума рязи хьурча бакъа.
Мардимазансса 90-ку шиннардийва Центрданул цалва гужругу, каширдугу, Ккавкказнаву цIана буллалисса КТО-рдан итадакьлакьисса арцугу ишла дурссания коррупция тIутIайх дичин къаританшиврул, бюхъайва радикалсса исламисталгума федералтурацIун бавкьуну, ца низамрай бачин.
Ва криминалданул дургьусса хъув ца хъинну гужсса «зачистка» танийра дурссания, хIакьину цIаларгсса, мархха-гьану тавтсса фамилияртту дура-духларгун дикIантIиссия. Бюхъайва жучIава «вацIлул» халкьгу бувагу къабикIан, терактругу цирив къакIулну бикIан. Таний на ттулла материаллавугу тIий икIайссияв: «Жущава къабюхълай бухьурча, бучIан бувара Центрдания десант, миннал ялун воздушный десантгума» тIий. 20 шинал махъун багьну буру жува.
ХIадур бувссар З. АьбдурахIмановал
