Гьашинусса шин жула миллатрал цIанихсса шаэртурал ва чичултрал юбилейрдал буллугъсса дур.
Лахъа-хъун ан ва цIунилгу ххаллилсса «Хъявринсса ччаврил» гьарнал оьрмулуву кьабивтсса асарду дакIнийн бичин арвахIкьини Национал библиотекалул конференц-залданувун бавтIун бия, ца жуна акъа, чIаххуврайсса Азирбижаннавугу хъинну бусрав-сий дуну ивкIсса Курди Закуевлул творчество ххирами ва шикку яхъа­нахъисса мунал гъан-маччами.

---

Залму АьбдурахIманова
Халкь чанну бия, бувкIмигу дакIнихтуну бувкIсса бия.Хъамаллуравух бия чIярусса шиннардий «Илчи» кказитрал хъунама редакторну зий бивкIсса Качар ХIусайнаева, лакрал чичултрал секциялул хъунама Илияс МахIаммадов, шаэртал Ссу­гъури Увайсов, Мирза Давыдов,

Космина Исрапилова, Даниял Магьдиев, МахIачкъалаллал 16-мур школалул лакку мазрал учитель ПатIимат Аьлиева, «ЦIубарз» журналданул редактор Хизри Илиясов, Гьарун Саэдовлул цIанийсса фондрал хъунама Давди Увайсов ва цаймигу. Бия бувкIун шиккун Каспийскалий ялапар хъанахъисса Курдил арснал арснал кулпатгу, РайхIанат тIисса душгу ва ванил мюрщисса арсругу.

Гьашину Курди Закуевлун 130 шин хъанай дур. Увну ур ва Гъази-Гъумучиял шяраву 1888 шинал. Ванан кIулну бивкIун бур чIявусса мазру. КIулшивурттал хъирив агьну, Щурагьун, Аьшттарханнайн, Къазаннайн, Уфалийн,

Аьрасатнаву революция хьуну махъ, зана хьуну махъунай Щурагьун, Гьарун Саэдовлущал «Илчи» кказит итабакьлай ивкIун ур. Турк­навун лавгун, тийх университетгу къуртал бувну бур. Тиха зана хьуну махъ миналул хьуну ур Азирбижаннал хъуншагьрулий. Дарс дихьлай ивкIун ур Бакуйннал педагогикалул университет­раву. Ва ивкIун ур чичу, аьлим­чу, аьрабист ва шаэр.

Качар ХIусайнаевал цила лавхъсса мукъуву куна:
— Жул кулпатраву, хаснува ттул буттан, хъинну бусравну икIайва Курди. Ххирая мунал творчествалуха зун, мунал канила дуркмур ххал дигьлан. Агарда Курди ивкIссания хъунма­сса миллатрал арс, гьай-гьайгу, га икIантIиссия щалла Союзрай машгьурсса, цIа ларгсса чичу, шаэр, аьлимчу.

ЧIивисса миллатрал хъунасса инсан ия Курди Закуев. Хъуннасса сий дия мунал Бакуйгу.
Чичул юбилейран хасъсса махъру лавхъуна мукунма Илияс МахIаммадовлул, Мирза Давыдовлул, Ссугъури Увайсовлул, Даниял Магьдиевлул, Национал библиотекалул директорнал хъиривчу Сарат Жабраиловал ва цайминналгу.

БатIаврил хъамаллуран­сса ххуйсса бахшишну хьунни А.Къа­­пиевлул цIанийсса Лакрал театрданул актертурал «Хъявринсса ччаву» пьесалувасса хъун бакъасса парча ккаккан бавугу.
Гъан-маччанал цIания ши­ккун бувкIминнахь барчаллагь тIисса махъ лавхъуна Гьун­чIу­кьатIрал шярава­сса ХIа­жибутта ХIусайновлулгу. Ахир­данийгу циняв цачIу бавцIусса дакIний личIансса суратгу рирщунни.