СМИ-луву ва соцсетирдай цаппара публикацияртту дуккаврийн бувну, ДР-лул ЦIуллу-сагъшиву дуруччаврил министерствалул укунсса баян баву дунни.

«Жу бакIрайн ласлай буру Да­гъусттаннал цIуллушиву дуруччаврил лагрулий уттигу тамансса диялдакъашивуртту душиву. Миннувасса цаппара дур агьалинах бурувгун медициналул идарартту бан­сса къатри ва зузалт биялну бакъашиву. Мунияту цIусса поликлиникартту буван аьркинни.

Цаппара районнал азарханарду бакьин буван аьркинну бур, микку биялну бакъар даву канилух дурксса духтурталгу. Ми иширттах къулагъас дуллай бур, гьарца иширал хъирив лаллай бур. Цалва пиша къакIулсса зузала лякъирча, му даврия укьан уллай бур. Мива масъалартту ххал бивгьуссар республикалийн Аьра­сатнал Минздраврал комиссия бувкIсса чIумалгу.
Амма Дагъусттаннал цIуллу­шиву дуруччаврил ххуллий хъин чулийсса дахханашивурттугур хъанай дусса. Махъсса шиннардий респуб­ликалий щурущи буллай бур инсантал хъин баврил цIусса журарду, жулва хирургтурал буллай бур лавайсса даражалул технологиялий­сса операцияртту, травматологиялул ва ортопедиялул, кардиологиялул ва нейрохирургиялул бутIраву.
Чан-чанну тIий, дузал буллай бур районнал азарханардай духтуртал биялну бакъашиврул ма­съалагу. «Земский доктор» тIисса программалийну шяраваллаву зун гьантIиссар даву канилух дурксса 245 пишакар.
Жу къулагъас дуллай буру жу­чIанна дучIайсса лабизавурттах ва гьарца балжисса иширал хъирив лаллай буру. Аьрзарду кьамул байссар «Горячая линиялул» телефондалувух:
8 (8722) 68-28-03. Ягу электрон почталийхчин: (minzdrav@-dag.ru), ягу ва адресрай:
Минздрав РД, 367000, Махачкала, ул. Абубакарова, 10.
ХIадур бувссар
ХI. Аьдиловлул