[dropcap]В[/dropcap]анияр ацIра шинал хьхьичI Лакрал театрданул бюхттулсса даражалий чулийн дуккан дурссия жула хъунасса композитор, Аьрасатнал халкьуннал артист Ширвани Чаллаевлул творчествалуцIун дархIусса хъинну яргсса ва авадансса проект – «Бургъил ккуртта». Лайкьсса даражалий кьамул дурссия му Москавливгу.
Лавайсса кьимат бивщуна мунин музыкалул критиктуралгу, яла къалагайсса асарду биян бувна тамашачитурайнгу.
Ттигъанну му проект, чан-кьанну дахханагу дурну, «Лавгзаманная ттизаманнайнсса ламурду» тIисса цIанилу бартдиргьунни цIунилгу.

---

Зулайхат Тахакьаева
Агьаммур чIурчIав дурну дия Ширвани Чаллаевлул ва халкьуннал произведениярттай. Ванал цала тIутIисса балайрдахун театрданул балетрал къавтIалтрал щаллу дуруна кIира къавтIаву. Ванал макьандалий щаллу бувна «Камаллул Башир» спектакльданувасса балай Дагъусттаннал лайкь хьусса артист Аьбдул Мурадовлул ва Зульфия Архилаевал, вайннацIун Жаннат Гянжиевал щаллу бувна Бадави Рамазановлул мукъурттийсса «Ниттиясса бусала».

Музыкагу бакъанма щаллу бувна актертурал МахIаммад-Загьид Аминовлул мукъурттий­сса «Аман, хьурдай» ва «Гъарал». Ширвани Чаллаевлул бакьин був­сса халкьуннал балай «Жан-Ясай», рояльданий цува макьангу руцлай, увкуна Дагъусттаннал лайкь хьусса артист Арслан Шагьмардановлул. Юсуп Хаппалаевлул мукъур­ттийсса «Душнинсса бахшиш» тIисса халкьуннал балай, цила ччергъилугу рирщуну, увкуна Саният Рамазановал.

«Бархъаллал Маллай ва Гъумучиял ПатIимат» спектакльданува­сса балайрду увкуна Халисат Батирбековал ва Зинаида Чавтараевал. «Ккурккуллал Щаза» спектакльданувасса балайрду увкуна Дагъус­ттаннал халкьуннал артистка Луиза Шагьдиловал ва Зульфия Архилаевал. Халкьуннал балай «Хъарду булларчагу, вих къахьунссара» увкуна Дагъусттаннал халкьуннал артист ХIажиаьли ХIажиаьлиевлул.

КъавтIалтрал щаллу дурна СССР-данул халкьуннал артист Мурад Къажлаевлул макьандалийсса «Аьрщи ва ссав» суратравасса лакрал халкьуннал къавтIаву «Магьузар».
Цува рояльданий руцлацисса Рамазан Фаталиевлул макьандалухун Салимат Кьурбановал му­къурттийсса балай увкуна Зульфия Архилаевал. Хъярчийсса халкьуннал балай увкуна Дагъусттаннал лайкь хьусса артистурал Халисат Батирбековал ва Шамсуттин Къап­лановлул.

Проектрай гьуртту хьунни цаймигу Дагъусттаннал цIа дурксса балайчитал ва музыкантътал: Аьрасатнал лайкь хьусса артистътал ТIагьир Курачев ва МахIаммадмирза МахIаммадмирзаев; Дагъусттаннал халкьуннал артистътал Лариса ХIажиева ва МахIаммад Абасов; лазгиял балайчи Наира Рахманова; опералул ва балетрал театрданул балайчи Жанна Кьурбанова; Багьавуттин Багьавуттинов (къумуз), Гульнара Каримханова (флейта), Шамил Шерифалиев (тар), ХIажи Сяидов (гитара).

Къуртал дуруна концерт хъинну яргсса, кьуватсса ва дюххансса «Къирият» тIисса къавтIаврийну.
Компьютердал чIурдал концертирттая шацI хьусса тамашачитал барчаллагьрай бия проектрал сакиншинначитурайн ва гьуртту хьуминнайн, унгу-унгусса лакку балайрдал ва къавтIавурттал мажлис хьунни тIий.