[dropcap]М[/dropcap]оскавливсса лакрал жагьилтурал ккурандалул сипталийну ва «Гъази-Гъумучи» фондрал кумаграйну ттигъанну Москавлив хьунни хъуннасса спортрал байран – аьдатравун дагьсса волейболданул турнир «Лакку улклул кубок».
Турнирдания бувсунни Москавливсса лакрал жагьилтурал ккурандалул хъунама Рашид ХIасайниевлул.
— Цумур-духьурчагу спортрал мероприятиялул инсантал цачIунмай буллалиссар, гъан буллалиссар, халкьуннал дянив дусшиву цIакь дуллалиссар. Волейболданул турниргу дуллалиссар ватандалия архну, мархрая ябувцун ялапар хъанахъисса жула жагьилтал цачIунмай баву мурадрай. Жунма тачIав хъамабитан къааьркинссар жула гуж цашивруву бушиву. Турнир хьунни бяст-ччал бакъа, кувннайн кув хIусут къабувккун, дусшиврий. Турнирданийн бувкIун бия кIиттуршуннийн бивсса инсантал, цала оьрчIругу бувцуну.
Цуксса къаххуйри кувннан кув ккаккаву, ниттил мазрайсса ихтилат. Умуд бур личIи-личIисса шяраваллал жагьилтурал, кувннащал кув кIулгу хьуну, гихуннайгу дахIаву яданссар тIисса, — увкунни ванал.
Турнирданий ччалли дуккан Аьрасатнал личIи-личIисса кIанттурдая дуркIун дия 8 команда: Гъази-Гъумучиял щалла команда дуркIун дия Гъумуча райондалул бакIчи Юсуп МахIаммадовлул, Халкьуннал Мажлисрал депутат ЖахIпар Абуевлул, ишбажаранчи ХIасан Адуевлул чIарахбацIаврийну; Вихьуллал командалуву буккан бувкIун бия Аьрасатнал личIи-личIисса шагьрурдая ва Лаккуя; ЧIяйннал кIира команда; Хъусращиял, Къюллул ЦIувкIуллал; Ккуллал ва Ваччиял.
Ххув хьунни ЧIяйннал 1-мур команда. КIилчинмур кIану бувгьунни «Гъази-Гъумучи» командалул. Шамилчинмур кIану – Вихьуллал командалул. Ххув хьуминнан ва хьхьичIунсса кIанттурду бувгьуминнан буллуну бур Кубокру, дипломру, медаллу, хъамакъабитулунсса бахшишру ва щалла команда ресторандалувун гьансса сертификатру.
