[dropcap]В[/dropcap]ай гьантрай къуртал хьунни «Абилимпикс» тIисса цIуллу-сагъшиврул ссуссукьушиву дусса жагьилтурал дянивсса Миллатирттал III-мур чемпионатрал даву.Пишардал усттаршиву ккаккан дуллалисса Аьрасатнал чемпионатрай гьуртту хьунни Аьрасатнал Федерациялул 75 субъектраясса 900 инсан. ДакI ххари хьунсса иш хьунни Дагъусттаннаясса команда вайксса инсантурава хьхьичI ххуттай ккаккавугу.
Имара Саидова
[dropcap]Г[/dropcap]ьуртту хъанахъиминнан 67 журалул пишардал усттаршиву ккаккан дан багьлай бивкIссар. Жагьилсса пишакартурал магьиршиврун кьимат бишлай ивкIссар 700 эксперт.
Дагъусттанная чемпионатрай гьурттушинна дан бувкIсса оьрчIал лавайсса даражалул магьиршиву ккаккан дунни «психологиялул», «таржумачишиврул» ва «физкультуралул» пишардаву.
«Абилимпикс» центрданул каялувчи, Дагъусттаннаясса делегациялул хъунама Шамил МахIаммадовлул бувсунни «Психологиялул» номинациялий Луиза Зязиковал цалчинмур кIану бувгьушиву ва «Таржумачишиврул» номинациялий Саида ХIажиевал ларсшиву арцул медаль.
Шамил МахIаммадовлул дакIнихтуну барчаллагь увкунни Дагъусттаннал педагогикалул университетрал экспертътурахь, укунсса чемпионатирттай гьурттушинна дан бюхъу-гьунар бусса пишакартал хIадур баврихлу.
— Миллатирттал чемпионат жагьилтурал пишардал бюхъурду итххяххан баву мурадрайсса агьамсса давур. Жула жагьилтуралгу, цала цIуллу-сагъшиврул ссуссукьушиврух къабурувгун, лайкьсса даражалий ккаккан дунни пишардал усттаршиву. Вайннал исват бунни, гъирагу, шавкьгу, вихшалагу духьурчан, цимурца дузрайн дуккан дан бюхъайшиву, — увкунни ДР-лул захIматрал ва социал иширттал министр Расул Ибрагьимовлул.
