Дагъусттаннал БакIчинал кIанайма Владимир Васильев вай гьантрай хьунаавкьунни АьФ-лул Президент Владимир Путиннущал ва мунахь бувсунни республикалул социал-экономикалул тагьардания.
[dropcap]В[/dropcap]ладимир Путиннул цIувххунни, ци дан бювхъунни вища вай 2 зурул мутталий, инава ДР-лул БакIчинал кIанайману уссаксса хIаллай, куну. «Даву най дур. Дур захIматшивуртту, дур мукунна каширдугу, бюхъурдугу», — жаваб дуллунни Владимир Васильевлул. Мунал бусаврийн бувну, 9 зурул мутталий хъин чулийсса дахханашивуртту хьуну дур: къаоьккину най дур промышленностьрал, шяраваллил хозяйствалул, строительствалул давуртту. Дянивну лавсъсса харжру лахъ хьуну бур 5,1 процентрал, иширайну арцуйнусса доходру гьарза хьуну дур 3 процентрал, давуртту дакъашиву чан хьуну дур 7 процентрал. Гьанулул капиталданувунсса инвестициярттал чулуха республикалул бугьлай бур 1-мур кIану Ухссавнил Ккавкказуллал федерал округрай. Амма инвестициярттансса шартIру дузал давриву тIурча, региондалул бугьлай бур махъва-махъсса кIанттурдавасса ца. Харжру «майрал» хIукмурдацIун бакьин баврил хIакъираву тIурча, педагогтуралгу, хIакинтуралгу харжру бавкьуну буссар ми хIукмурдал ккаккан бувминнуцIун. Амма социал зузалтрал, оьрчIал садикирттал ва яслирдал, культуралул идарарттал, вузирдал зузалтрал харжру уттигу лахъ бувну бакъар.
Владимир Васильевлул бувсунни мукунма цIуллушиву дуруччаврил иширттавусса диялдакъашивурттаятугу, оьрчIал ясли-садикирттал щаллу баврил чулуха махъун багьну бушивриягу.
