[dropcap]М[/dropcap]ахIаммад Дандамаев: «Миллатрал маз – хъунна-хъунмур хъусри»

Ттущал ихтилат буллалиману ур дунияллийх цIа ларгсса аьлимчу, Аьрасатнал Элмурдал академиялул член-корреспондент, РАН-далул востоковедениялул институтрал Санкт-Петербургуллал отделениялул Аьвзалзаманнул Машрикьуллал секторданул хъунама, Аьрасатнал ва дунияллул халкьуннал премиярттал лауреат, мукьттуршунниха лирчусса элмийсса давурттал, монографияр­ттал автор, профессор МахIаммад Дандамаев. Увссар Лакрал райондалийсса ГьунчIукьатIрал шяраву.
— Тарих лахьхьаврил инсантуран ци дуллалиссар?
— ТIабиаьтрал, ларайсса КIулшилул ягу Хъунасса Заннал инсаннан щаллагу дунияллий хъанахъимунил хъирив изансса каши дуллуссар. Муниятур тай аьвзалзаманнайвасса текстирдавугума тарихрал хъирив багьсса бущи чIалачIисса. Тания мукьах, сайки ххюазардахъул шинал хьхьичIва чагъаргу ляхъан бувну, инсантал цуми-бунугу ишру чагъардайн лахъан буллан бивкIния шихунмай, тарихраву хьумунил ва хъанахъимунил хъирив багьну бивкIссар. Хъанай бивкIмунил хъиривгу лавну, чIумуй бакIрай бавцIуну, тарихраву хьусса гъалатIру тикрал хьун къабитанни аьркинсса. Амма инсантуран тарихраву хьуну бивкIмур нажагь бакъа дарсруну къашай.
— Дарий паччахIшиву дуллалисса заманнайва Ираннал Бехистуин провинциялий ххяллай дурсса чичрурдал ссигъа бувчIин, хъирив лаян хьурив вища? Ина ляличIину ми чичрурдал хъирив агьну ияв, ци бувсри миннул?
— Ххяллайсса бехистуин чичрурду ккаккансса тIайлабацIу хьуна ттун академиктуращал – Б.Б. Пиотровскийщал, В.Г. Лукониннущал ва Ю.В. Ганговскийщал. Ми чичрурдал хъирив агьаврил мурадгу ми агьамсса душиву кIулну тIийя. Ми чичрурдал буслай бия 2500 шинал хьхьичI илданул аьрш-куршлий, Египетная тIайла хьуну, Индиянавун, Авгъанисттаннавун бияннин­сса кIанттурдай, хъанай бивкIсса кьурчIисса иширттая. Тарихрал кьюлтIмунил кIула ми чичрурдахь душаврилла гъира бутлай бакъарив хъирив лаян! Ва ялагу, чичрурду дия шанма мазрай: аьвзалзаманнул парснал, эламнал (Элам – Ираннал кьиблалий диркIсса паччахIлугъри) ва вавилоннал (вавилоннал агьали гъалгъа тIий бивкIсса семит мазри) мазурдий. Мунияту, бехистуннал чичрурдал тарих лахьхьаврил гьану бивзссар учин бучIиссар.
— Вил тамансса элмийсса давурттив Вавилоннан хас дурсса дур, буси миннуяту.
— Вавилон – аьраб бучIаннинма 2500 шинал хьхьичIра Ираннаву хIасул хьусса паччахIлугъри. Му бивкIссар бюхттулсса цивилизациялул, литературалул ва магьирлугърал билаят, амма жула эра дайдишиннинсса азарда шинал ахирданий му билаятрал иш зия хьуссар. Яла миккун аьраб ила бивчуссар, хIакьинусса кьинигу аьраб мина дирхьуну бу­ссар. Ираннал хIакъираву аьщуйн щуну бувчIин буваннив, Иран Парс тIисса цIанил синонимри. Вавилоннал агьлу семит мазрай гъалгъа тIий бивкIхьурча, парс гъалгъа тIий бивкIссар ираннал мазурдивасса ца мазрай. Жулла эра дайдишин хьхьичIсса IV-VI аьсрурдай, Вавилония, Египет ва Гъанмур Машрикьуллал ва Централ Азиянал цаймигу билаятру хIала хьуну, хIасул дур­ссар парснал паччахIтал каялувшиву дуллалисса ца паччахIлугъ. Парс бухьувкун паччахIлугърал хьхьури кIунттихьхьун ларсми, кIицI лавгсса билаятирттайгу мири бивкIсса хьхьичIххуттай. Вавилониянавугу мукунма. Миннал багьу-бизу, культуралул традицияртту ва диндалул аьдатру лахьхьин­сса хIарачатрайнур Вавилониянаву­сса ираннан хас бувсса лу хIасул хьуссагу. «Иранцы в ахмединидской Вавилонии» тIисса луттиравун багьссар на 1987 шинал американал университетирттаву бувкку­сса лекциярду.
1984 шинал на увчIунав Американал машрикьуллал обществалул бусравсса членну. Ттул элмийсса биографиялуву мукунма агьам­сса ишри Колумбиянал университетрал ттуйн, редакциялул совет­рал членну ва редактортуравасса цану, «Ираннал энциклопедия» итабакьин оьвчаву. Му кьува том бикIантIисса хъунмасса лур, гьарцагу луттирал 800-1000 чIапIи ду­ссар. ХIакьинусса кьини дунияллийн бувкссар 12-мур томрал 31-мур выпуск.
— Аспирантуралуву вил элмийсса каялувчину ивкIун ур XX аьсрулул ца яла цIанихма аьлимчу-востоковед, академик В.В. Струве. Цу уссия ялагу вил муаьллимну, маслихIатчину?
— Ттул учительтал чIявусса бия, захIматри цаннал цIа рищун. ГьунчIукьатIрал школалий ттун чIявусса затру лавхьхьуна биологиялул учитель АхIмад АхIмадовлуя, му ия гьарца аралуву кIулшивуртту цIакьсса учитель. Герценнул цIанийсса институтравусса преподавательтурава кIицI лаганна М. Н. Ботвинниклул цIа, аспирантуралуву – В.В. Струвел ва В.И. Абаевлул цIарду. Ттун тIайлабацIу хьуна аьвзалзаманнул грекнал, латиннал, вавилоннал ва цаймигу нукIузаманнул мазру ххуйну кIулсса муаьллимтурайн тIайла ацIаву, на ми мудангу барчаллагьрай дакIнийн бичара.
— Лавгсса оьрмулул дагьанттувух ябивтун, виламур оьрмулул ва тай чIуннардил хIакъираву ци учинна?
— Нава яхъанахъисса кIанугу, билаятгу, чIуннугу даххана къадавияв. На талихI бусса инсанна, бусса оьрмулий ттунна ччисса давриха зий ивкIун тIий. Ттул оьр­мулуву яргсса, дакIний личIансса ишру чIявуя, на цимилгу гьуртту хьура дунияллул халкьуннал конгрессирттай, Гъанмур Машрикьуллал, Американал ва Европанал хъунисса университетирттаву лекциярду ккалай ивкIра. Таман­сса, сий дусса идарарттал итабавкьунни кьатIаллил мазурдийн таржума бувсса ттул луттирду. Хьунни оьрмулуву тIайлабацIу къавхьусса, кьурчIи бизансса ишругу. Пашманну икIара ниттиха аякьа дуван къашаврий. Оьлугу, кьурчIигу бизлазисса иш бур жува циняв, мукунма жулва ппухълугу, бигьанма жулла аслийсса аьдатирттая ят бувцун, чилми нахIу ларчIун бушиву. Жунма буниялану пикри буван аьркинни жулва мазгу, миллатгу ябаврил ялув. Буттахъал ва ттаттахъал жунма кьабивтсса маз – яла хъунмур аваданшивур, хъунна-хъунмур хъу­с­ри. Агар жува ниттил мазрацIа хьун бацIарча, дунияллий мархха-ххун духларгсса цайми миллатру кунма, бухлавгун гьантIиссар жулва миллатгу.
— Иярав Дагъусттаннайнгу?
— Ияра Дагъусттаннайн. Ларгсса шинал гъинттулгу уссияв. МахIачкъалаллал дязанивалу ххуй хъанай душиврул ххари увунна. Дагъусттаннал цаппара районнай чялишну цIу-цIусса къат­ри дуллай бур. Буруккинттавун увтунна шаттирал бакIрах лул­ттурасри тIалав дуллай бушиврул, коррупция ялтту дурккун душиврул.
— Вил оьрмулул девиз?
— Жагьил заманнай на му суалданул иялну кьуцIу увайвав. Жавабран кIанттай А. С. Пушкиннул махъру бакьлай бур: «Яхьуншивруллу яхъанахъисса». (« Жить надо, чтобы жить»).

Ихтилат бувссар
МахIаммад Аьбдулхабировлул
«Северный Кавказ» кказит, май 2004 шин, № 18.
Таржума  ПатIимат Рамазановал