[dropcap]И[/dropcap]тникьини Лакрал райондалийн даврил аьрххилий бувкIунни Дагъусттан Респуб­ликалул культуралул министр Зарема Буттаева. Му гьуртту хьунни кIулшиву дулаврил зузалтрал август мажлисрай.

Зулайхат Тахакьаева.
[dropcap]К[/dropcap]Iулшиву дулаврил зузалтрал цIусса дуккаврил шин дайдишавугу барча дурну, ванил бувсунни ххарисса хавар – кIанттул цилакаялувшиндарал социал-экономикалул ккаккиярттал 2016 шиналсса хIасиллайн бувну лахъсса зунттал районнал дянив Лакрал райондалул бувгьушиву шамилчинмур кIану. Райондалул бакIчи Юсуп МахIаммадовлуйн тапшур бунни Республикалул БакIчи Рамазан АьбдуллатIиповлул къулбасращал­сса диплом.
Ванил кIицI лавгунни район хьхьи­чIунсса кIану бугьан лайкь хьушиву кIулшиву дулаву, чIиримур ва дянивмур ишбажаранчишиву, ххуллурду баву, инвестицияртту кIункIу даву хьхьичIуннай шаврихлу. ЧIурчIав дурунни хъунна­сса къулагъас дуллай бушиврий школалийн гьаннинсса кIулшиву дулаврил идарарттай оьрчIансса кIанттурду дузал баврих.
ЧIа увкунни ялун нанисса шинаву цIу-цIусса хьхьичIуннайшивурттугу.
Бивунни культуралул министр цIа­накул капитал ремонт дуллалисса райондалул магьирлугърал къатрайнгу.
Зарема Буттаевал бувсунни, гьашину 2017 шинал июль зурул 20-нний бувк­сса Аьрасатнал ХIукуматрал хъунама Дмитрий Медведевлул къулбасращалсса хIукмулуцIун бавкьуну, билаятрал шагьрурдал ва шяраваллал магьирлугърал къатри дакьин дансса арцу итадаркьуну душиву федерал бюджетрава. Магьирлугъ ва туризм хьхьичIуннай даврин кабакьулунсса Аьрасатнал Федерациялул культуралул министерствалул программалул лагрулий бакьин бан ккаккан бувну бусса бур Дагъусттаннал ацIра райондалийсса Магьирлугърал къатта — миннувух Лакрал райондалулмургу.
Зарема Буттаевал мукунма кIицI лавгунни махъсса шиннардий республикалул ва аьмну билаятрал бакIдургьуми культуралийн лажинну кIура бавну бушиву.