[dropcap]Л[/dropcap]аккуй яхъанахъисса инсантурал цала оьрму бачин бувну бикIай тIабиаьтралмур оьрмулущал архIал. Мукун бухьурчагу, хIатта, бусласаврийн бувну, ттурши букканнин ххулу буллан, цулун буккан къабучIиссар тIий бухьурчагу, ЦIуйшиял инсантал ххулу буллун буккай дурусну август зурул 1-нний.
Ттурши буккайхту, дацIайсса дур урттул лахъ хъанахъаву ва гайннуйсса гьанна кьакьлай бачайсса бур. Гай гьанна ялунчIингу уртту хьуншиврул кьатI хъанай байбишиннин къабучIиссар цулун буккан тIий бур.
Мукун, дурусну август зурул байбихьулий, кIюрххил даврийн най унува, ЦIуйшиял ххюлубакIурттал дяниву ттун цулуй бакIрайн агьуна шяраваллил школалул директор ПаттахIов ПаттахI. Ванащал цулуй бия жагьилсса оьрчI ва душгу.На ПаттахIлучIан гъан хьуну ссалам-алайк булайхту, кIул хьуна гай ванал арснал оьрчIру бушиву, цивппагу студентал бусса бия
Вай, каникуллай бунува, ттун кумаг буллай бур. Мунияту ттуламур давугу дурурзусса духьувкун цахъис хьхьичI айивхьура цулун», — куна ттухь ПаттахIлул.
ЧIярх учин дурну нагу гайннал сурат рирщуссия. ЩипI-щипI, тIий балай тIий бия чIиникIру.
«Буттауссуй, рищар жул шакил!»
[dropcap]Х[/dropcap]ъюйннал лултту нанисса шагьраххуллу.На ххуллийх най ххал шайхту (на гай оьрчIан кIулну ивкIун ияв), гила, школалул чулуха, хъирив хьуну ттул хьхьичIун увккуна кIия оьрчI: «Буттауссуй, рищар жул шакил», — куна.
КIицI дуванну вай оьрчIал цIардугу: КьурбанмахIаммадов Аьлихан — Хъюйннал байбихьулул школалул 4-мур класс къуртал бувсса оьрчI; КьурбанмахIаммадов Юнус — ЧIяв дуклан заназисса Хъюйятусса 6-мур класс къуртал бувсса оьрчI. Тиккунай авцIусса, Хъюйн Ккулату хъамалу увкIсса, ХIамзат тIисса шанна шинавусса оьрчIгу цала дянив ацIан увуна.Валлагь биллагь, цанна щалла дуниял дуллусса кунма ххари хьуна оьрчIру.Нагу вай хъиннува ххари буван дуллай ура вайннал сурат кказитрайн. Хъуни хъанахъи, зунттал яхIлувтал!
Шама пишакар
[dropcap]И[/dropcap]чIаллил хIайвантрава яла исвагьимур хIайвангу, инсаннащал дус хьуну махъ га тачIав «акъаххайсса» рухIну хIисав бувай балчан. Нажагь бурттигьу циятува агьарча, ганай тачIав балчаннул ччан къабизайсса бур. Оьруснал чичултрал чичрурдаву «Тарив балчан инсанну бивкIхьунссар» тIисса калимагу бакIрайн дагьссар ттун.
Мунияту, балчан янилун багьайхту, на ганил авуршиврул хIайран уллай, унийва ацIайссара. Вана уттигъанну, гава Хъюйннал шагьруххуллийх най унува, духмур ва цIумур шяраваллал дянивсса ратIнийхсса ламучIан ияйхту, ххуллул лувсса къатрал чапарданул хьулул хьхьичI бакIрайн багьуна балчаннущалсса адаминагу, шама мюрщисса оьрчIгу. Балчан цуппагу, ца авурну бакIгу дургьуну, гайннайн мютIину бавцIуну бия.Га ия Хъюйннал шяравасса Ризван тIисса гъаттарахIухчуну зузисса адамина. ЧIаравмигу ганал арсру бия.Ризваннул бувсуна ттухь: «Шамил тIима арснал МЧС-рал цIу лещан дуву хьунна тIар, ХIамзатлун полициялул зузала хьун ччай бур, МахIаммадаьлин ххирану бур ичIаллил хIайвант, мунияту ванал хIухчу хьунна тIар».
Укун, мюрщину бунува, оьрмулуву цала бугьансса пишарду кIулсса оьрчIру бучIир аькьилтуран хIисав бан. Инсантурал хIазран къаучайхьунссар: «Уттисса оьрчIру «атомрал» оьрчIру бур», — куну.
ЧIярх учин дурну, рирщуссия на вайнналссагу шакил. Вайнна жула «атомрал» оьрчIру!
Ххютулусса душру
[dropcap]Л[/dropcap]аккуй гъидайдихьулий гъилишиву къахъанайгу диркIун, утти, август зуруй, ххютулусса термометралий 30 градусраяр ххисса кIиришиву хъанай дур.
Гъараллу лачIурчагу, ми чявхълущалсса хьуну, бакIлахъия зия дуллай дур. Мунияту чIявуми, шагьрулия шяравун бигьалаган бувкIсса чIавасса оьрчIругу, кьатIув буккан къахъанай, ххютулун бухлай бур. Вана вай Вихьуллал шяравасса душругу ххутулату ябитлай бур тIабиаьтрах. Учала бур: «ТIабиаьтрал ххуй бакъасса гьава къабикIайссар», — тIисса. Бюхъай мукун бикIангу.
Лажин хIадур дурссар ХIажимурад ХIусайновлул
