[dropcap]А[/dropcap]вгуст зурул 7-нния 19-ннийн Хьурттал шяраву зий буссия этнолагерь «Гъази-Гъумучи – 2017».

Зулайхат Тахакьаева
Лагерь буссия хьхьичIва паччахIнал аьрал бивкIсса къалалул корпусраву, цувгу ларгсса шинал «Гъази-Гъумучи» фонд­рал уртакьтурал бакьин бувну, щин дурцуну, гьарца аьркинсса шартIирдал лащу-щаллу бувсса. Этнолагерь тIивтIуссар «Гъази-Гъумучи» фондрал сипталийну,Лакрал райондалул администрациялул ва депутатътурал ЖахIпар Абуевлул ва Амирхан Амирхановлул ка-кумаграцIух шагьрурдай ялапар хъанахъисса оьрчIан лакку маз, миллатрал тарих ва аьдат­ру лахьхьин ва ми ватан ххирану тарбия бан кабакьу бансса мурадрай. Укунсса журалул лагерь Дагъусттаннай цамур ттигу дакъассар.
Гьашину лагерьданий бигьалавгссар 25 оьрчI ва душ, 20 – лакку маз лахьхьин ччай, Аьра­сатнал шагьрурдая бувкIсса, ххюя тIурча — райондалий ялапар хъанахъисса ахIвал кIюласса кулпатирттавасса.
Лагерьданий оьрчIахь дихьлай буссия лакку мазрал, ла­кку улклул тарихраясса дарсру. Бувцуссар ми кьариртсса шяраваллавун ва райондалул тарихрал музейравун. Лагерьданул хьхьичI бихьлахьисса мурадру щаллу хьуссар ва му зунтIиссар хъиривми шиннардийгу.