Цуксса хIалъя вих ялугьлай?

Дагъусттаннал агьлу шинал лажиндарай ссавур дакъа ялугьлай бивкIсса ва ччясса мутталий хъамакъабитансса иш хьунни ларгсса ххуллункьини республикалул магьирлугърал оьрмулуву.

Ахиргу жучIана увкIунни, так ца Ккавкказнал ва СНГ-лул республикарттай акъасса, кьатIаллил билаятирттайгу машгьур хьусса балайрдал автор, гуржиял жагьилсса балайчи, музыкант-мультиинструменталист, композитор Дато Кенчиашвили.
Хъинну авадансса дур ва гьунар бусса балайчинал репертуар, жура-журасса жанрардал балайрдая сакин хьусса: соул, диско, джаз, регген. Агьаммур кIану тIурча, ванал творчествалуву бугьлай бур халкьуннал балайрдал.

Гуржинаву ванал цимилагу ларсун дур «Шинал балайчи» тIисса цIа. Ва ялагу ур личIи-личIисса фестиваллал лауреат. Машгьурну дур ванал каялувшиндаралусса оьрчIал фольклорданул ансамбль «Таоба».
Агарда уттинин Дато Кенчиашвилил вичIидихьулт хIайран бувну бивкIхьурча исвагьину бювхъусса чIунийну ва такьвалийну, МахIачкъалалив хьусса концертрая махърив ванал Дагъусттаннал тамашачитал хIайран бунни дазу-зума дакъасса дакI хъиншиврийну, аьчухшиврийну. ДакIнийн бутанна, концерт хьун багьлай дуссия шинал хьхьичIра. Сакиншинначитал сававну, шамилла-мукьилла махъунгу руртун, къадурнура лирчIссия. Амма ванал тавакъю бувну бия хьусса ишираву цучIавгу тахсирлув къаувну, дукIува билетру лавсун бивкIсса инсанталгу цуяца къаливчIун концертрайн итабакьин. Концертрая махъгу тавакъю бувна цащала сурат рищун ччисса инсанталгу циняв итабакьин. Сайки ссят дуруна, чIавахьулувагу бакъасса, ца къумасса гримернайлуву тамашачитуращал суратру ришлай, автографру дуллай, уххавугу аьлтту хьун къариртун.
«Цуксса хIалъя вих ялугьлай?» — тIий бия тамашачитал (вай Датол ца яла машгьурмур балайлувасса махърур).
Эмаратсса дия концерт, цукссагу хIаллай тIааьнсса асардай личIансса. Гьуртту хьунни балайчинайн дакI тIайласса дустурая сакин хьусса миллатирттал инструментирттай руцлацисса музыкантътурал ансамбль «Дустал»: пандур, дудук, гармун, дачIу, бас-гитара. Чанналсса буллалисса режиссер лап усттарсса ухьунссия, ттущава бухIан захIматсса чанигума га хьхьуну, иттав кьутIлай бакъаяча, бургъил тIинтту кунма, ттюнгъану ках тIисса кунма бия.
Оьвкуну бия «Ватан» ансамбльданийн. Ансамбльданущал Дато кIул хьуну ур шиннардил хьхьичI Батумилий дунияллул халкьуннал дянивсса фестивальданий. Дато ххув хьуну ур балай учаврил номинациялий, «Ватан» – къавтIаврил номинациялий. Бувсуна жула игитътурал ансамбльданул цува цуксса хIайран увну ивкIссарив. Ххуй дирзунни тIива ва базилух щаллу дурсса аджарнал халкьуннал къавтIаву «Ачарулигу». Ансамбльданул каялувчи Аьли МахIаммадовлул хасну ва концертран куну хIадур бувну бия хъинну яргсса ва авадансса цIусса композиция «Яруссанная Кахетиянавунсса ххуллу»: ххуллул тия чулий цавай жалгьилтал гуржиял яннагу ларххун тайннал зумуну къавтIий, вайми жагьилтал ххуллул шия чулий яруссаннал янналуву вайннал зумуну къавтIий. ЦIа дансса бия къавтIаврийнусса гьунардугу. ЧIаххул бухьувкун, чан бакъархха хIаласса ташурдугу, къавтIавриву бия гуржири душнил ва яру оьрчIал дянивсса ччаву ккаккан дуллалисса бутIагу. Мукьахунай балайчи пикрилий ур ва ансамбльданущал уртакьну зун.
Балайрду кунма, нахIуя балайчинал лях-лях буллалисса ихтилатругу, хIатта жап тIий гуржи мазрай ивкIхьурчагу (таржума буллай бия). ХIайрансса дия хьхьу, Каспи хьхьирил щатIавагу гуржири такьварду чIюхлахисса хханссия.

Циван ххирар ттун Дато?

На МахIачкъалалив ялапар хъанахъисса 24 шинал мутталий цикссагу цIанихсса балайчитал бувкIунни, Аьрасатнава хьуннав, кьатIаллил билаятирттая хьуннав. Цаннахунмагу гьансса зуву тачIав къадагьайва. ТIайлассар, студент заманнай Валерий Меладзел концертрайнгу лавгссара хъинну гъирарай. Ттул компьютерданувугу, телефондалийгу Кенчиашвилил балайрдур чIявуми бусса. Хьхьу-кьини вичIи дихьлай бухьурчагу, мякь къалиххай. КIулли мунил тIилисин ссаву буссаривгу. Цалчин, ванал цинявппагу балайрду бур халкьуннал инструментирттахун тIутIисса. КIилчин, ванал балайрдаву чIявуми бур чIивиний ттунма баллай бивкIсса яруссаннал ва лакрал балайрдал макьаннаха лавхьхьусса. Ккавкказнал цинявппагу миллатирттал мархри аьмссар тIун бикIайхха, ттунгу ванал балайрдаву цирив ца маччашиву асар хъанан дикIай.
На кунма Датол творчество ххирасса чIявусса бия, тачIав бакъачIин шапI куну бувцIуну бия Дагъусттаннал паччахIлугърал филармониялул хьхьирил зуманицIсса гъинтнил зал. БувкIун бия Ухссавнил АьсатIиннавасса, Чачаннавасса ва Азирбижаннавасса тамашачиталгу. Барчаллагь тIисса хъин-хъинсса комментариярттал гьузи лахъан дурну дия концертрая махъ соцсетьру. БучIан къавхьумирив хIайп тIий бия.

Шания изаннин машгьур хьуну лявкъунав

Концертрал программалул цIа дия «Ромдене моладине» («Цуксса хIалли ттул вих ялугьлай»). Балай чивчуну бур цала учайсса чIявуми балайрдал автор, гуржиял цIанихсса шаэр, композитор ва балайчи Теона Кумсиашвилил аьпалун, цуппагу 2011 шинал ххуллий апатI хьуну, канихьсса мюрщисса оьрчIащал архIал дунияллия лавгсса. Ва балайлул клип ютубраву ххал бувну бур 14 миллиондалия ливчусса инсантурал. Гьамин ва балай хьуну бур Дато Кенчиашвилил визитная карточкану. ЧIявусса билаятирттай концертирттай тамашачитал бавцIуну цащал ва балай тIун бикIай, му бусан къашайсса асарди, тIий ур. Яла-яла дакIний лирчIунни тIар 10 азара тамашачи увкIсса Израилнавусса концерт. Хъунмасса хIурматрай кьамул увну ур Ираннайгу.
Дато Кенчиашвилил цIа дуккан дурсса балай хьуну бусса бур цалчинсса балай – «Вихсса ччаврил бас увну ура» тIисса. Хьхьувай уттуивхьуну кIюрххил шания изаннин машгьур хьуну ияв тIар.
Амма 15 шин сахIналий хьусса дунияллийх цIа ларгсса балайчи ухьурчагу, цумурцагу концертрал хьхьичI хъювусулну икIара тIар.

Аьраличу хьун ччай уссияв

Увну ур Дато Кенчиашвили 1986 шинал Ттуплислив аьраличунал кулпатраву. Ванал ппу хIакьинусса кьинигу обороналул аралуву зий усса ур. Буттая цанма чIявусса лавхьхьуссар тIий ур, яла-яла ирсирай дирну дур ватандалухсса ччаву. ЧIивиний Датогу, бутта куна, аьраличу хьун ччай ивкIун ур, амма чIун наниссаксса бувчIуна тIар балай ва сахIна бакъа оьрму бутан къахьунтIишиву. Ниттилми мархри ялтту бувкхьунссар. ЦIана ЯтIул ххачлил къуллугърай зий бухьурчагу, ларайсса музыкалул кIулшиву ларсъсса нину хьуну бур ванал цалчинсса учительницану. Гихунай Гамлет Гонашвили ва Лела Тотараидзел балайрдай хъуна хьуссара, хьхьу-кьини дакъа вайннал балайрдах вичIилий икIайссияв тIий ур. Ссил Тамаралгу балай учайсса бур. Ларгсса шинал Москавлив ПаччахIлугърал эстрадалул театрдануву хьусса концертрай тагу бивкIун бур балай тIий. Та концертрай ялагу гьуртту хьуну бур машгьурсса балайчи Диана Гурцкая. Ванил чIявусса балайрду бусса бур Дато Кенчиашвилил макьаннайсса.

Цир му романтика цурда?

Дато Кенчиашвили ккалли ай яла романтичнайсса балайчинан. «Романтика – му дакIнил хIалли. Романтикийсса балай чичин къашайссар дакIнил хIал мукунсса бакъахьурча. Лахьлай лахьхьингу къабюхъайхьунссар. Ттул пикрилий, романтика – му хъамитайпар, цуппа бакъасса, так пикрирдаву ляхъан бувсса. Му хъамитайпалия чичайссар балай. Га балай цумурцагу хъамитайпалун цихава ляхъан бувсса кунма чIалан бикIайссар, мукун балайгу ххира шайссар.
Барчаллагьрай ур Дато дагъусттанлувтурайн, хIурматрай хьунаакьаврихлу.
«Ттул щак бакъассия Дагъусттаннал агьулданул нава лахъа-хъунну, бусравну кьамул антIишиврийн. Зун нава куна, ттунгу зу ххира хьунну. Заннал кабакьирча, дакIний ура ссуттихунайгу учIан Дагъусттаннал барачатсса аьрщарайн», — увкунни ванал.
Ва базилух бучIан къавхьуну хIайп тIий ливчIминнал хьул макьукьару.
Концертраягу, ляличIисса инсаннащалсса ихтилатраягу тIааьн лавсъсса Зулайхат Тахакьаева