Тимурдул арс Камутаев Алан

Инсаннал оьрмулуву чIярусса ххаришивурттугу, пашманшивурттугу хьунадакьай. Ттулмур оьрмулувугу кьурчIишивуртту чIяруя, ххаришивурттугу чансса дакъая.

Амма вай гьантрай, ттула аьзизсса арснал ва арснал щарнил къатлул ялун бивсса кIул бакъа бала кунма, бювхсса бивкIу къавхьухьун­ссар тIий бура на ттулва оьрмулуву. ­Уссия ттулгу мурадиран увсса, кка­ккиялун ишинсса арснал арс. Ванайн Алан учайссия.
ДакI марцIсса, итххявхсса, гьарцаннал янилунгу, мазрайнгу агьсса оьрчI уссия. Гьарца дуллалимунивугу цала чIунархIал оьрчIал бакIчи икIайва. Байсса гъалгъа оьрму лавгсса инсаннал кунмасса бикIайва. Амма лавгунни Алан, кьабивтун жугу вав-шав тIий. На хъинну дугърисса, инсаншиву ххишаласса халкьуннаву оьрму бувтссар. Миннал вай гьантрай ттун чIалачIи бунни цивппа ххаллилсса агьлу бушиву – ттул ххирасса ЦIуликъяннал жямат.
Барчаллагь хьуннав циняв жул кьинилул чIарав бавцIуцириннайн. КIива-шанма гьантта лях гьаннин ттул оьрчIал 70-80 дуснал, гъан-маччанал оьтту буллуна. Духтуртурал хъунмасса хIарачат бувна жул оьрчI ххассал уван. Амма токрал ожогру хъинну лавмартсса диркIун дия. Я Аллагь, тачIав укунсса кIул бакъа бала щилчIав къатлувун къабухханнав.

Дусшиву дан вин кIула,
Гьалмахтал вил чIявуя.
ТIуллу ва махъругу вил
Мудан авурсса бия.

Бавал, жул зунттал лачин,
Ссавруннайн левххун лавгсса.
Жул кIяла чIимучIалий,
Алжаннавун увцусса.

Бавал, ина увцунна
Аллагьнал малаикну,
Ччаврил дурцIу дакIния
Гьарцаннан бутIа буллан.

Бавал, та вила ниттил
Лякьлуй бярчIу цан бутав?
Буттал уттасса хъачIру
Ина циван гъагъан дав?

Бавал, ххирасса ссурвал
Цивппалу цан кьабитав,
Ина ша бивзний мудан
Ша бизлай заназисса.

Виха зумалийсса вил бава Камутаева Роза

---

ХIамзал арс Сулайманов Сулайман

Июньдалул 9-нний аьпалу­хьхьун лавгунни Кьукуннал шяраватусса ХIамзал арс Сулайманов Сулайман.
Сулайман увну ур 1927-ку шинал Кьукуннал шяраву. 1944 шинал Гъумук школагу къуртал бувну, увххун ур Буйнакскаллал финансирттал техникумравун. Му був­ккуну махъ увххун ур Ростовуллал финансирттал ва экономикалул институтравун. Зун айивхьуну ур Ккуллал райондалий финотделданул хъунама инспекторну, зийгу ивкIун ур 12 шинал мутталий.
1962-ку шинал ивтун ур Лак­рал райфинотделданул хъунама инспекторну. 1967-ку шинал увчIуну ур Лакрал райисполкомрал секретарьну. Ва даврий зий ивкIун ур 1987 шинайнин. Муния махъ зий ивкIун ур Лакрал райондалул профсоюзрал хъунама бухгалтерну, Гъумучиял музейрал каялувчину.
Ванан дуллуну дур «Отличник финансовой работы Министерства финансов СССР» тIисса лишан. Лайкь хьуну ур ДАССР-данул Верховный Советрал Президиумрал чулухасса ХIурматрал грамоталун, «ЗахIматрал ветеран» медальданун.
Сулайманнун цанна хасъсса хасиятну хъанай дия ларайсса духIин, иминшиву, инсаншиву, цайнна тапшур дурсса даву лажин кIялану биттур даву. Му бусравну ия архIал зузиминнал, чIахху-чIарахнал, жяматрал дянив. Ия оьрчIан ххаллил­сса ппу, уссин, ссурвавран уссу.
Сулайман накьлу хьусса кьур­чIишиву кIидачIлай буру ванал арсурваврахь ва душваврахь, ссихь, махъсса циняв гъан-маччанахь.
Цал бунагьирттал аьпа баннав, рухI паракьатний дишиннав.

Кьукуннал ва Гъумучиял
жямат, дустал, гьалмахтал