Швейцариянал вакилтал – жучIава хъамалу

Июньдалул 29-30-нний жулла республикалийн даврил аьрххилий бувкIун бия Аьрасатнал Федерациялийсса Швейцариянал Вакилханалул делегация.

Ванивух гьурттуну ия Аьрасатнавусса Швейцариянал Конфедерациялул Чрезвычайнайсса ва Полномоченнайсса вакил Ив Россье ва Швейцариянал Вакилханалул Конфедерациялул хъуними маслихIатчитал Шюрх Франк, Кольде Доротея, мува идаралул магьирлугърал отделданул хъунмур Елена Наумова ва Швейцариянал Вакилханалий миграциялул масъаларттаха зузисса Жилио Мари-Жо.
Аьрххилул цалчинмур кьини хъамал кьамул бувунни Дагъусттан Республикалул БакIчи Рамазан АьбдуллатIиповлул.
Хъирив ДР-лул Миллатирттал иширттал министерствалий Швейцариянал делегациялущал хьунабавкьунни республикалул министерстварттал ва ведомстварттал пишакартал. Вайннал цачIу ххал бивгьунни миллатирттал, социал, культуралул ва миграциялул политикалийн багьайсса масъалартту.
Цаннащал ца кIул хьуну махъ миллатирттал иширттал министр Татьяна Гамалейл кIицI бувунни Швейцариянал ва Дагъусттаннал дянивсса ара ца-ца кIанттурдай ца лархьхьуссагума душиву. Ванил бусаврийну, хъамаллуран хъунмасса гъира бусса бур жула шикку чIявусса миллатру бавкьуну цукун яхъанай, миллатирттал мазру буруччаву мурадрай ци дуллай буссарив хъирив лаян.
Делегациялувасса Ив Россьел кIицI бувунни цанма жучIана хъамалу учIан хьхьичI Ккавкказуллая мяълумну цичIав кIулну къабивкIшиву.
— Ттун гъира багьунни миллатирттал «квотирование» ци тIиссарив бувчIин. Ттул пикрилий, му инсаннал бюхъу-хIарачат, мунал каширду ялун личин къаритлатисса, дайшишру куннасса зат дур.
Ва иширан Татьяна Гамалейл ххи бувунни хIукуматрал даражалий, мяълумну учин, закондалул ххуллий цIакь дурсса миллатирттал «квотирование» тIисса зат республикалий дакъашиву. Амма гьарца миллатраясса инсан хIукуматрал къуллугърай итаву – му республикалул халкьуннал дяниву паракьатшиву, дусшиву дуруччаву мурадрай, ишла дуллалисса аьдат душиву.
Республикалул цIуллу-сагъшиву дуруччаврил министрнал хъиривчу Салман АхIмадовлул хъамаллурахь бувсунни цIуллу-сагъшиврул аралувусса иш-тагьардания.
ДР-лул культуралул министрнал хъиривчу Муслим Телякавовлул мукунма бувсунни аьдатирттал культура ва миллатирттал мазру буруччаврил ялув дуллалисса давурттая.
Республикалул МВД-лул Миграциялул масъаларттаха зузисса управлениялул хъунама МахIаммад МахIаммадовлул хъамаллурал буллусса цаппара суаллахьхьун жавабру дуллунни ва хIукуматрал миграциялул политикалуву дачин дурсса даврия аьмну бувсунни.
БатIаврия махъ делегация бувцунни Аьрасатнал миллатирттал музейравун, Тахо-Годил цIанийсса ДР-лул Миллатирттал музейравун, П. ХIамзатовал цIанийсса магьирлугърал музейравун. Яла вай лавгунни Каспийскалийсса «Москва» КРЦ-луву ккаккан дантIисса, Швейцариянал режиссертурал ларсъсса, « HIVER NOVADE» тIисса кино ккаккан.
Хъиривмур кьини делегация хьунабавкьунни Дагъусттаннал паччахIлугърал университетрал ректор Муртазяли Рабадановлущал ва аьрххилул ахирданий бивунни аьвзалзаманнул Дарбантлив.

З. АьбдурахIманова