Июньдалул 29-нний Дагъусттаннал БакIчи Рамазан АьбдуллатIипов хьунаавкьунни Аьрасатнал Федерациялийсса Швейцариянал Конфедерациялул Вакилханалул делегациялущал. Му делегациялул бакIчину ия Швейцариянал АьФ-лийсса Вакил Ив Россье.
Хьунабакьаврий кIивагу чулухаллил ххал бивгьунни Дагъусттан Республикалийсса миллатирттал ва диннал дянивсса арардал хIал-тагьар.
— Ххарира зу хьунабакьин хъамал ххирасса Дагъусттаннал аьрщарай. На ивссара Швейцариянавунгу ва дакI дарцIуну учин бюхъанссар, зул хъинну ябацIансса билаят бур куну, – увкунни региондалул БакIчинал.
Гихунмайсса ихтилатраву ванал кIицI лавгунни Дагъусттан Аьрасатнал Федерациялул субъекттирдавасса ца яла тарихиймур бушиву, ларгсса шинал билаятрал ца яла хьхьичIавамур шагьрулун ккаллийсса Дарбантуллал кIицI ларгшиву 2 000 шинал юбилей. ЧIурчIав дунни Дагъусттан хъанай бушиврий миллатирттал дянивсса арардал лабораторияну, миллатирттал дянивсса ара – му хъинну асар шайсса ара дунугу, миллатирттал, диннал дянивсса захIматшивурттал масъалартту шикку гьаз къашайшиврий. Швейцариянавасса хъамаллурахь ялагу Республикалул БакIчинал бувсунни Дагъусттаннай лахьхьайшиву агьамсса 14 миллатрал маз, ми мазурдийсса передачартту душиву радиолий ва телевидениялий, бувсунни республикалий бушиву 12 театр, миннувагу 7 – миллатирттал мазурдийсса.
Ив Россьел барчаллагь увкунни Рамазан АьбдуллатIиповлухь дакIнийхтуну цивппа хьунабакьаврихлу.
— Жу махIаттал-хIайран бувунну Дагъусттан Республикалийсса политикалул, диндалул, социал ва культуралул тагьардал. Республикалий жу мукунма дакIний буру хьунабакьин духовенствалул вакилтуращал, элмулул ва культуралул ишккаккултращал, жагьилтуращал. ДакI дарцIуну ура вай хьунабакьавуртту жула билаятирттал дянивсса миллатирттал ва диннал арардал ламуну хьунтIишиврий, — увкунни хъамаличунал.

Бадрижамал Аьлиева