Жулва лакку душ, Дагъусттаннал лайкь хьусса учитель Наргиз Далгатовал каялувшиндаралусса къавтIалтрал уттинингу цимилгу цалчинсса кIанттурду бувгьуссар республикалул, билаятрал ва дунияллул халкьуннал даражалул лагрулийсса конкурсирттай.
Уттигъаннугу Б. Мурадовал цIанийсса Дагъусттаннал культуралул ва искусствалул колледжрал, Наргиз Далгатовал каялувшиндаралусса къавтIаврил «Зунттал жагьилшиву» цIанилусса ансамбльданул Бакуй хьусса дунияллул халкьуннал дянивсса фольклорданул «Ккавкказуллал оьрчIру Ккавкказнавусса дакьаврихлу» тIисса шамилчинсса фестивальданий бувгьунни цалчинсса кIану.
Баку шагьрулийсса ХIайдар Аьлиевлул цIанийсса Культуралул центрданул концертру дай залдануву жулва оьрчIал (колледжрал 1-4-ми курсирдал 45-нния ливчусса студентътурал) ккаккан дурну дур «Рутуллал фольклорданул» ва «Жагьилтурал байрандалул» къавтIавуртту. Жюрилул жулва жагьилтурал гьунарданун лайкьсса кьимат бивщуну бур, цалчинмур кIану буллуну. Фестиваль къуртал хьуну махъ колледжрал директор Патма Муртазялиевайн ва цийнма Наргиз Далгатовайн оьвкуну бур азирбижаннал «Лидер» телевидениялийн. Микку ихтилат, туну, хъунмурчIин хьуну бур къавтIавурттая, миннал цалла даврил опытгу кIибавчIуну бур тамашачитурайх.
Шиккува кIицI лаган, «Зунттал жагьилшиву» ансамбльданул тарих цалсса хъунмасса бакъанугу (ва коллектив сакин бувну бур 2014 шинал), му мутталий цимилгу лайкь хьуну бур хьхьичIунсса кIанттурдан, миннува ца яла яргмурну хъанай бур 2015 шинал Москавлив хьусса «ТIиртIусса планета» тIисса оьрчIал ва чIава жагьилтурал творчествалул дунияллул халкьуннал дянивсса фестиваль-конкурсрай гран-при ласаву.
Бадрижамал Аьлиева
