МахIаммадлул арс Амин Закаров
Увну ур 1974-кусса шинал Хасав шагьрулий, ТтурчIиял шяраватусса Закаров МахIаммадлул ва Удил къушлий. Гиккува къуртал бувну бур дянивмур даражалул школа.
Бувккуну бур Дагъусттаннал медициналул институтрал стоматологиялул факультет. 1998-кусса шинал къуртал бувну бур Аьрасатнал диплом лавсун махъсса дуккаврил медициналул академия. 2010-кусса шинал, Аьрасатнал стоматологтурал чемпионатрай гьуртту хьуну, увккун ур финалданувун.
2011-кусса шинал Европанал халкьуннал дянивсса стоматологтурал конкурсрай бувгьуну бур цалчинмур кIантту. 2014-кусса шинал дурурччуну дур кандидатнал диссертация. Ххаллилсса специалисталгу лагма лаган бувну, Москавлив сакин бувну бур «Амин Дент» тIисса хъинну сийлийсса клиника.
Дурцуну ур щарсса, бур мукьва оьрчI.
«Ттун ххишала бакъа ххирар нава язи бувгьусса пиша»
1. Цукунсса хьуна оьрчIний вийнма яла гужсса асар биян бувсса зат, иш?
Хасаврай жул хIаятраву ябуллай бикIайссия «бульдог» гьаннарал загълунсса ккаччи. Ттула чIивима уссу Арсланнущал ца кьини жу ттуплий буклай буссияв. Ттуп ккуру лавгуна ккаччи бусса къатлул (будкалул) махъун. Ккаччи бушивугу хъамабивтун, жу левчунма лавгссияв ттуплил хъирив. Цила къатлуву паракьатну уттубивхьуну бивкIсса бульдог, жул аьлагъужалул ццах учин бувну, бувккун бавчуна жул ялун. Жу оьккину нигьабувсунав. Арслан чIивима уссу ухьукун, га ттуна уруччин аьркинниха тIисса асар ттуву, ваца цийнува цуппа кунма, загьир хьухьунссия, на, ххявххун авцIуссияв уссилгу, ккаччилгу дянив. Га чIумал ттун дия 8 шин, Арсланнун – 6 шин. Гания махъ, чув бухьурчагу, бульдог журалул ккаччи ххал хьутари, ттул янил хьхьичI дацIлайнна дикIай га сурат.
2. Цими никирайн дияннинсса кIулли вин вила ппухълуннал нясав? Буси яла архманал цIа.
КIулли ххюра никирайн дияннинсса.
3. Инсаннал хасиятраву винна яла ккарккун къаччимур лишан?
Кьадаршиву, лажин лякъаву.
4. Вила оьрмулуву яла алши бакъамур шин?
1999 шин. Му шинал нязанний ивкIуссар ялув кIицI увсса ттул уссу Арслан, увтссар кьадарсса ккуллалул.
5. Яла алши бумур шин?
2011 шин. Му шинал шанма душнил ялун ттун арс увссар.
6. ВичIара циксса арцу хьукун, дигьаларгун дикIанссия вил дакI?
Арцу чIярусса къадикIайссар учай. Амма инсаннал талихI арцул ххи-чаншивруцIун бавхIусса бикIан къабюхъайссар. Ттун ххишала бакъа ххирар нава язи бувгьусса пиша. Нара дурсса даврил хъунмасса мурадирайн биян бувсса пациентътурал лажиндарай рязисса пиш ххал хьусса чIумал, на навагу ияра ляличIиссава мурадирайн, чIиви-хъунсса талихIрайн.
7. Арцу чун харж дуркун, къашара ина яла пашман?
Арцу лякъайсса гай харж даншиврулли, аьркинманан ва аьркинмунин. ТачIав пашмангу къашара.
8.Чун харж дуркун, шара пашман?
Бюхъай, кув чIумал, личIисса чара бакъашиву дакъасса ххуллийгу харж шайсса дикIан. Миккугу на хIайп къаучара – мугу мукун хьун аьркинну бивкIссар, туну.
9.Инсаннал тахсирдавасса цумур тахсир хьунссия вища бигьану багъишла битан?
Банна тIий къабувмур, хатIалий кунма хьуну лявкъумур.
10.Бувагу къабитан?
Лавмартшиву. Заннал баннав мукунминналсса.
11.Ссан диял къашай вил чIун?
ЦукунчIав диял къашай ттула ичIуссаннах, гъан-маччанах аьркинссаксса къулагъас дансса чIун.
12.Бартлавгун ччисса вила шанма мурад?
Ттула оьрчIру лайкьсса инсанталну хъуни шаву.
Гъан-маччаминнал ва дустурал дянив ттулва кьадругу, кьиматгу, чIиви личIан къабитаву, даврил уртакьтурал ва пациентътурал чулухасса ттула хIурматгу бурувччуну личIаву.
Аьрщарайн дакьаву ва паракьатшиву ликкаву.
13.Вила оьрмулуву хъинну ххирасса кIантту бувгьусса шама инсаннал цIа?
МахIаммад, Уди, Жанна.
14.Вина кьамулсса чув-адаминал сурат?
Ттула бутта ва аьпалухьхьун лавгсса буттауссу Сиражуттин.
15.Винма ххуй бизайсса хъамитайпалул сурат?
Нину ва ссу.
16.Агарда, бюхъайсса бивкIссания, инава ци кIанттай, ци чIумал увну ва ци билаятрай яхъанай ччива вин?
Гъурбат – му бур хIалтIилухун гьан ва хъамалу ликкан хъинсса кIантту. ДакIнил минану тIурча, мудангу бикIан аьркинссар Буттал кIантту, Ватан.
17.Ссаяту бикIай вил яла хъунмур пахру?
Пахру тIисса махъ цахъи дакI хъуншиву тIисса мяъналучIангу гъансса махъ бур. На рязину ура ттинин ттущава лахъан бювхъусса шачIанттая. Лап чIавасса чIумала увкIссияв на навалу Москавлив. Мукунсса чIуннугума шайссия, жипливу харж бансса шагьи бухлавгун, вокзалданий гьантта ливчIссагума. Ттунна дукиялухсса арцу хьун даншиврул лагайссияв хьхьувай грузчикну зун. ХIакьину нава ивсса даражагу, хьхьичIуншивурттугу на хьун дурссар так ттула дакI тIайласса захIматрайну ва хIарачатрайну.
18.Цукунсса дур виятурасса къарязишиву?
Дан шайссакссанияр чансса хъанай дурхха нара дуллалимур тIун икIара чIявуну.
19.Яла ххирамур дукра?
Шаппасса лапшагу бувну дурсса шагьнал хъюруврал накь, лакку гьавккури. Ттула ниттил байсса, канай кьабитан къашайсса, «Дамский каприз».
20.Яла къаххирамур дукра?
На дукралий хъихъисса акъара. Думур дукара.
21.Ссаятусса бикIай яла хъунмамур хIучI?
Ттула аьзизсса инсантал цIуллуну битаву. Мюхтажшин дакъасса шинну тIурча, на миннан чан хьун къаританна хъунив хьуну махъгу, Аллагьнал кабавкьуну. КIава Заннал ттухьхьуннагу цIуллушиву дулурча.
22.Хьуссарив вил оьрмулуву винна инара ттинин багъишла ритан къахъанахъисса къел?
Хьуссар. ХIакьинусса кьинигу ттунма нава багъишла битан хъанай акъара ттула уссу Арслан ттучIана Москавлив ца-кIива гьантлул хьхьичI учIан къаувнува личIаву. Май зурул 1-нний хьуссар 18 шин Арслан акъа. Мунал ххаллилну къуртал бувссия Дагъусттаннал университетрал факультет. Хияллай уссия стажировкалий дазул кьатIув гьан. Амма, буттан цамур куццуй ччан бивкIун, документру буллуссия ФСБ-лул органнайн. Гиччасса жавабрах ялугьлагьиссаксса хIаллай, хIукму хьуну буссия ттучIана Москавлив уцин – техникнал даву дуллали ан. Мунал мусил кару дуссия. Майрал байран кьинирду хьуну махъ учIан куну, авцIуну уссия шава. Майрал 1-нний хьуссия мунан му оьзругу, байран дан лухччинийн лавгун унува. Мунаву цимивагу гьунар бия: дишайссия ххаллилну сурат, дайссия скульптура. Жу цаннах ца ччаву дусса уссурвал бияв. Му акъа на ттуна нава ятинну чIалан ивкIунав, буттайхчинсса кIия уссу цаймигу бунува.
23.Лавгсса заманардавасса цIанихсса инсантуравасса цуманащал хьунаакьин ччива вин?
Виссарионнул арс Иосиф Сталиннущал.
24.Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
Кланналмур бияла ялтту буклай бушиву, халкь цинявппагу ца хьуну бакъашиву. Жува, так ца Дагъусттаннал бакъассагу, пикрирдай бикIан аьркинссару щалагу Аьрасатнаву хъанахъимунил. Щалвагу билаятрал даража лахъсса чIумалли кIантту-кIанттурдайсса миллатирттал мурадругу бартлаглан бикIайсса.
