ХIажиев Сулайман Сиражуттиннул арс Ккуллал райондалул хъунама хIакинну зун увкIун хьуну дур шин ва дачIи. Инсантурах вичIи диширча, къачансса давуртту дурну дур ва чIумул дянив, билаятрайсса кризисгу хIисав дарча.
Чан бакъар хъунама хIакиннайнгу, зузалтрайнгу барчаллагь баян бувара тIий оьвтIутIими, так ца Ккуллал ва Лакрал районная бакъасса, Ахъушиял ва Лаващиял районнаягу.

Зулайхат Тахакьаева
ДР-лул ЦIуллу-сагъшиву дуруччаврил министерствалул эксперт, лакрал районнал цIуллу-сагъшиву дуруччаврил ялув бавцIусса пишакар Рита Мурачуева буслай бур Сулайман Ккуллал райондалул азарханалул хъунама хIакинну итансса маслихIат цила бувну бивкIшиву министрнахь, цанчирча Лакрал райондалий хъунама хIакинну зузисса чIумалгу, ванал цIа ххуйсса ххуттай диркIун тIий. «Уттигу ттул вихшалдаран лайкьну ув­ккунни ва. ХьхьичIунсса, за кIулсса пишакар ушивруцIун, ххаллилсса сакиншинначи ва каялувчигу ур, ванаща бювхъунни, ппив бувну, кIи-шан бивщуну бивкIсса коллектив бавтIун, идаралий низам дишин», — тIий бур Рита.
Лакрал райондалул бакIчи Юсуп МахIаммадовлулгу даин кIицI лагай Сулайман хъунама хIакинну зун учIавривун диялсса ххуйчулийннайсса дахханашивуртту хьуну диркIшиву азарханалий.

Ттигъанну на лавгра Ккуллал райондалул азарханалийн, хьунабавкьура хъунама хIакиннащалгу, зузалтращалгу, къашайшалтращалгу.
— Сулайман Сиражуттинович, ци-ци мурадру бартбигьин бювхъур ина хъунама хIакинну зун увкIун мукьах?
— Нава шиккун зун увкIун барз чIарах букканнин ца къашайшалал цIувххунни: «Яр, больницалий ччатIухун лагаву къадикIайссарив?» куну. БакIрайх рирщусса куна хьунав. Хъирив лаллай айивхьукун, кIул хьуна къашайшалтран ччатIухун дулун ккаккан дурсса лагаву къадуллай диркIшиву, ялагу мукуннасса цайми-цаймигу задру.[pullquote]
Сиражуттиннул арс Сулайманов Сулайман. 1974 шинал Вихьлив школагу къуртал бувну, дуклан увххун ур Дагъусттаннал паччахIлугърал мединститутравун. Му къуртал байхту тIайла увккун ур Архангельскаллал областьрайн. Тих хирургну зий дурну дур 26 шин. ХIакьину ва ур лаваймур даражалул хирург. Цала агьаммур пишалуцIун ванал хьхьичIунну лавхьхьуну бур 4 пиша цаймигу: эндоскопия (эндоскопрал кумаграйну виваллил органну ххал бувайсса); трансфузиология (оьттул элмулул ца жура); травматология. Бур аьрали хIакиннал опытгу – 2002 шинал цаппарасса зурдардий зий ивкIун ур Чачаннаву. КIира шин дурну дур Лакрал райондалул азарханалул хъунама хIакинну зий.

[/pullquote]
Дакъая щин. Емкость машан ларсун, щаллусса хьхьу-кьини дузал дан къахьурчагу, гьантлун шаннагу чIумуй щин дулайссар, санитаркахъалгу, къашайшалтралгу цанна аьркин дансса ратIиннин. Къазий дия канализация, санузел. Ми дакьин дурссар. Баххана барду 67 чIавахьулттил стеклопакет. ЦIу дарду инфекцион корпусрал магъи. ЦIанакулгу тикку усттартал зийнма буссар. ЧIиртту ххартI бувну, поллу дизан дурну, цимурца цIу дантIиссар. ДишинтIиссар цIусса сантехника. КризисрацIун бавхIуну, чIал хъанай дур давуртту къуртал дан. Къашайшалт чIумуйнусса утту­бишин бувну буссар терапиялул отделениялий, ца палата личIи бувну.
Дансса давуртту ттигу чIярур. Арулла шяравусса медпунктрал къатри дур экспертизалул цIу дан, дакьин дан ккаккан дурсса: Хъусрахь ва кIивагу ЦIувкIравсса ФАП-ру лекьавайсса тагьарданий бур; СумбатIлив дурагу дакъар ФАП-рал къатри, му бивхьуну бур администрациялул къатраву; Вихьлив ва Ккулувсса участкарттал азарханардайгу ремонтру дан багьлай бур.
Ххюя жагьилсса хIакин учIан увссар «Земский доктор» программалийхчил: акушер-гинеколог; педиатр, вава бур неанатолог (вилттили оьрчIал чурх буккаврил, кIулши итххяххаврил ялув бавцIусса ва лякьлуварасса азарду хъин дуллалисса хIакин), цIанасса, лякьлуварасса къашайшивуртту гьарзану хьунадакьлакьисса чIумал акъа чара бакъасса пишакар ур ва; дермато-венеролог; оториноларинголог ва эпидемиолог.
— Утти биялну бурив хIа­кинтал?
— УрчIра вакансия ттигу дур. Цалчина-цалчин аьркинну ур анестезиолог-реаниматолог. Операция буллалийни Гъумучату Шагьмандара Рамазанов учIан айссар. Агарда гихгу, шихгу архIал операция бан багьлагьи­сса иш хьурча, наркоз дулунсса пишакар хIакьину жучIа ­акъар. Аьркинну ур ялагу психиатр, инфекционист, ца ттигу акушер-гинеколог.
— Цими къашайшала ур хIакьину зучIа, ци журалул къашайшивуртту дур миннай?
— РяхцIалунниха ливчусса ряха къашайшала. ЧIун дургьуну ппив шай­сса азардая – шярая, гриппрая – гъалгъа къатIунна. Давление лахъсса, туннурдал, къюкIлил къашайшалт гьарза хъанай бур. Гипертония сававну, оькъавкусса гьантта лях лаглай бакъар. Мунил ялув, ФАП-ирдай зузисса медсестрахъул бавтIун, ми буржлув бувссар, давление гьаз хьуну, «Анаварсса кумаг» бучIан бан багьсса инсаннал давление дуцин занан шаппа-шаппай.
Ялу-ялун гьарза хъанай дур онкологиялул азарду. ХIакьину 156 инсан ур сияхIрай.
— Шинал хIасиллу дуллали­сса батIаврий республикалул цIуллу-сагъшиву дуру­ччаврил министрнал кIицI лавгуна жучIара гьарза хъанай душиву оьрчI лиллалавуртту, биял бакъа зурухь бувсса оьрчIру, лякьлуварасса къашайшивуртту. Жула райондалий ци тагьар дур?
— Бувагу 26 оьрчI бувну бур райондалий ларгсса шинал. Акушер-гинеколог акъашиврийн бувну, хъами шагьрурдайн тIайла буккан багьлай бия, чIявуми оьрчIру гила-тилах бувунни. Утти щалла вихшала цIуну бувкIсса жагьилсса пишакарнайн дур.
ОьрчIал къашайшивурттая педиатрнал бусанссар. На ацIа­вияв аьра­луннаву къуллугъ бан буцлаци­сса жагьилтурай, коми­ссия буллалийни, ялун личлачи­сса цIуцIавурттай – нажагьссавагу ­акъар сколиоз (бурхIал ттаркI да­ччаву) ва плоскостопие дакъасса.
БурхIал ттаркI даччаврил савав ттунна ссаву чIалай дур учирча, школардай, байбихьулул кла­ссирттава тIайла хьуну, оьрчIру столлах щябитлай бур. ОьрчIал бархI тIайлану бугьан партарду къулай­сса дикIайва. Столлал тIурча, чур­ххал куц зия буллай бур. ЦукунчIав къабучIиссар ттаркI кьянкьа хьуннин столлах щябитлан. Мунияту партарду зана дан аьркинссар школарттайн. Ва ялагу, ххи дан аьркин­ссар къавтIаврил дарсру.

ОьрчIал къашайшивурттая буслай бур лаваймур категориялул хIакин, ДР-лул лайкь хьу­сса хIакин, педиатр Асланбагова ПатIимат.
— Март зурул дайдихьулий щалла республикалийра дайдишай шярал, гриппрал эпидемия, гьутрурдал къашайшивуртту. Жула райондалий щинаву йод чанну бушиврийну, эндокрин цIуцIавуртту-зоб дур чIявуссаннай. Чансса ба­къар личиннинна ккарччив аьллали­сса оьрчIругу, мунил савав щинаву фтор биялну бакъашивур. Вай къашайшивуртту яла чIяруну хьунадакьлай дур Вихьлив ва Хъусрахь.

Кьубатаев Аьли, поликлиникалул хъунама хIакин, терапиялул отделданул каялувчи бу­с­лай ур:
— Давление лахъсса, инсульт, инфаркт хьусса къашайшалт чIявусса букIлай бур дукIу-гьашину. 2007 шиналгу диркIун дур укуннасса тагьар. Нава дахьа зун увкIсса шиннардий я давление лахъ хьусса, я инфаркт, инсульт хьусса иш дакIний бакъар ттун. ЦIанакул жагьилсса инсанталва бур ми цIуцIавурттащал букIлай. Ттигъанну 20 шин хьусса душ бия 170-нийн дияннин давление лахъ хьуну, 35 шинавусса хъамитайпа бу­ссия инсульт хьуну бувкIун. Цийнма-цуппа бувкIун, цила даврий зий бур цIана. КIанила хъирив 32 шин хьу­сса цамургу бувкIунни инсульт хьуну. Вай цIуцIавуртту шиная шинайн жагьил хъанай дур. Цалчинсса савав дур дукралул ялув къабацIлацIаву. КIилчинсса савав – зана-кьулушин, кушу чансса бушиву. Гьарца кьини 40-45 минутIрайссарагу заназин даван аьркинссар чара бакъа.
Компьютердавун, телефоннавун бувххун, цIанасса никирал инсантал таммал хьуну бур. Компьютерду, телефонну дуркния махъ нярал рак, дурухлурду чIяру хьуну дур тIий бур пишакартал.

Аьшаев Нуруллагь, 22 шин азарханалул хъунама хIакинну (1978 – 2000 ш.ш.) зий дурсса лаваймур категориялул хIакин, Аьрасатнал цIуллу-сагъшиву дуруччаврил бусравсса зузала. ХIакьину зий ур Функционал терапиялул кабинетраву.
Нуруллагь хъинну рязину ур хIакьину азарханалул хъунама хIакинну лавайсса даражалул пишакар, бюхъу бусса сакиншинначи, тIалавшинна ххисса каялувчи учIаврий:
— Диялсса дахханашиннарду хьунни Сулайман увкIун мукьах. Щаллу бунни муниннин захIматну бивкIсса щинал масъала. Дурагу зий дакъассия канализация ва санузел. Бигьану къабикIайва къашайшалтран, хъунмасса ххуллугу бивтун, кьатIув занан, хаснува кIинттул чIумал. Му иш сававну, азарханалий уттубишин букIлайвагу къабикIайва инсантал. ЦIусса хъунама учIавривун (ва цувагу лавайсса даражалул хирург ур) операцияртту баву гьарза хьунни, хIатта чIаххувсса Лакрал, Ахъушиял, Лаващиял районнаягу букIлай бур къашайшалт.
Транспортрал иш ххуйну бур. Ттинин къабивкIсса холцинский аппарат бучIан бунни, чIал къавхьуну зузи банссар. Узи, частнайну бакъа, азарханалий зий бакъассия, мугу зузи бунни. Бакьин бунни щархъайсса медпунктру: ЦIущарнив, ЦIуйшав, Хъювхъав, Ссухъияхь, Хъюй. Кадрарду цIу буллай ур.