Мартрал 6-нний Дагъусттаннал ХIукуматрал Председатель Аьбду­ссамад ХIамидов хьунаавкьунни Сириянал Аьрабнал Республикалул диннал иширттал министр, профессор, бусравсса элмурдал доктор щайх МухIаммад Абдус-Сатар Ас Сайид бакIчисса сириянал делегациялущал.

Хъамаллурахь аьла-ссалам буллай, Аьбдуссамад ХIамидовлул ДР-лул БакIчи Рамазан Аьб­дуллатIиповлул цIанияту, Дагъусттаннал агьалинал ва цала цIанияту миннан чIа увкунни цIуллушиву ва барачат.
«Жу барчаллагьрай буру Сириянал каялувчинайн, сивсуну дакьаврил чул бувгьуну ушаврийну, Аьрасатнал кабакьулийну талай унутIий дунияллул халкьуннал террорчишиврущал. Заннал кумаг баннав зу буллалисса хIарачатирттан. На вихну ура ва зул жучIансса аьрххи хьуншиврий Дагъусттан Республикалул ва Сириянал Аьрабнал Республикалул дянивсса хIала-гьурттушиврул хъиндайдихьуну.
Дагъусттаннал каялувчинал хъуннасса къулагъас дуллай ур диннал иширттаву илкиншиву дуруччаврих. Мура чIумал региондалул каялувчинал политика тIайла дацIан дурну дур Дагъусттаннал жяматрал цашиву дуруччаврил чулухуннай, ччимур миллатрал инсантал бунугу, ччимур дин язи дургьуми бунугу», — увкунни премьер-министрнал.
Щайх МухIаммад Абду­с-Са­тар Ас Сайидлул бувсунни барчаллагьрай ушиву Республикалул хъунаманайнгу, Дагъусттаннал ХIукуматрайнгу, Дагъусттаннал муфтинайнгу республикалийн учIан бюхъаврихлу ва Сириянаву буниялагу хъанахъисса иширттая дагъусттанлувтурахь бусан шаврихлу. «Тикку дяъви най бакъарча, тикку уссурвал литIаву хъанай дур. Жу Дагъусттаннайн бувкIру Сириянал агьалинацIун кабакьаврихлу барчаллагь учин. Жу лавайсса кьимат бишлай буру Аьрасатнал ва СКФО-рал цаппара субъектирдал жул чул бугьаврин, экстремистшиврул ва террорчишиврул идеологиялийн къарши буккаврин. Аьркин­сса чIумал зу жул чIарав бавцIунну», — увкунни Щайхнал.
ХIадур бувссар
ХI. Аьдиловлул