Ванияр ца зурул хьхьичI ДР-лул Культуралул министерствалул сипталийну, буллай байбивхьуссия «Магьирлугърал селфи» тIисса жагьилтурал акция. Мунил мурадругу бия республикалул культуралул идарартту машгьур баву, миннувун заназисса жагьилтал чIяву баву.
Бадрижамал Аьлиева
Акциялувух гьуртту хьуншиврул, аьркинну бия республикалул культуралул ччимур идаралийн лавгун, музей, библиотека бикIу, театр, концертрал зал бикIу, дуван селфи (цала цалла рирщусса сурат) ва му сурат дишин соцсетирдаву. Акция баян бувну буссия дурусну ца зуруйсса, яни мартрал 1-ннийн бияннин. Му хIаллай акциялувух гьуртту хьунни 600-ннийн бивсса жагьилтал.
Мартрал 2-нний Культуралул министерствалуву хьунни му акциялувух яла хьхьичIунну гьуртту хьусса жагьилтуран бахшишру дуллалисса батIаву. Суратирттан бивхьусса «лайкирдал» хIисав-ккал дурну, язи увгьунни ххув хьусса 3 инсан: Юлия Тимохина, Апанни Айнуттинов – МахIачкъалалиясса; Тельман Абукаров – Дарбант шагьрулиясса (Табасараннал театрданул рекламалул менеджер).
Жагьилтурахь барчаллагьгу куну, миннан бахшишру дуллунни ДР-лул культуралул министрнал цалчинма хъиривчу Муслим Телякавовлул. Жагьилтуран бахшиширттан буллунни: «Дагъусттаннал областрал Дарбант. Бухзаманнул Дарбантуллал стереографиялул чIалачIинну» тIисса тарихийсса 3D-суратирттал альбом, «Дагъусттаннал халкьуннал творчество» тIисса луттирду, Аь. Тахо-Годил цIанийсса Дагъусттаннал цачIун був тарихрал ва архитектуралул музейравунсса абонементру, Оьруснал театрданувунсса билетру, мукунма «Дунияллул гьунарлувтал» фондрал президент ва художествалул каялувчи, дунияллул лагрулийсса цикссагу фестиваллай ва конкурсирттай гьуртту хьусса Давид Гвенианидзел концертрайнсса билетру.
