Гьарца шинал жулва билаятрай февральданул 8-нний кIицI лагай Аьрасатнал элмулул кьини. Ва Кьини цIакь дурссар Аьрасатнал Федерациялул Президентнал хIукмулийн бувну 1999 шинал.
Аьрасатнал элмулул кьини кIицI ларгунни МахIачкъалалив Республикалул Оьрус мазрал ва культуралул центрданийгу. Цалчинна цалчин Элмулул кьини шикку кIицI ларгссия шинал хьхьичI.
Ва ххуллухмур батIаврийнгу оьвкуну бия аьлимтурайн-лингвистътурайн ва ДГУ-лул ва ДГПУ-лул филологиялул факультетирттал студентътурайн.
А. Абиловлул цIанийсса Элмийсса библиотекалул конференц-залдануву оьрус мазраха зузисса аьлимтурал ва цалва оьрму оьрус мазран хас буван пикри бувсса жагьилтурал цачIу ххал бивгьунни оьрус мазрацIун бавхIусса масъалартту. Буллалисса ихтилатирттацIун ккаккан дуллай бия оьрус мазрацIун дархIусса видеороликру.
Ихтилатру бунни ДГПУ-лул литературалул кафедралул доцент, филологиялул элмурдал кандидат АхIмад АхIмадовлул, ДГУ-лул оьрус мазрал кафедралул доцент, филологиялул элмурдал кандидат ПатIимат Лековал ва м.ц..
БатIаврил хIасиллу дуллалисса ихтилат бунни Республикалул Оьрус мазрал ва культуралул центрданул директор Лариса Кукановал.
БатIаврил лагрулий хIадур дурну дия Дагъусттаннал русистътурал элмийсса давурттал выставкагу.
