Гьарца шинал февральданул 15-нний кIицI лагай Авгъаннава совет аьрал буккан бувсса дата. Му кьинилул хьунийнсса батIаву хьунни Каспийскалийгу Аьрасатнал халкьуннал аслийсса культуралул центрданий. Мунивух гьуртту хьунни шагьрулул администрациялул бакIчинал хъиривчу Людмила Левицкая, Культуралул ишир­ттал ва жагьилтурал политикалул управлениялул начальник Аьйшат Айсаева, КМШИ-рал (Кадетская морская школа-интернат) директорнал хъиривчу Светлана Корниенко, Авгъаннал дяъвилул гьурттучитал ва цаймигу хъамал. Ва ххари дакъасса кьинилуцIун дархIусса батIавривух гьурттушинна дунни Хьхьирил кадетуллал школа-интернатрай тарбия хъанахъисса ва ОьрчIал творчествалул къатлувун заназисса оьрчIалгу.

Мероприятие дайдихьлай, ихтилат бунни Каспийскалийсса Аьрасатнал халкьуннал аслийсса культуралул центрданул директор Башикар Вагьабовал. Ванил дакIнийн бувтунни 1989 шинал февральданул 15-нний Совет аьра­луннал махъра-махъсса колонналул кьадиртшиву Авгъаннал аьрщи, ацIра шинай лахъи лавгсса дяъви сававну, цикссагу совет жагьилтурал жанну дуллушиву ва чIурчIав дунни му дяъвилул къювурду оьрмул оьрмулухунгу дуллайна дикIантIишиврий.
Авгъаннавусса дяъвилул бакI­щаращуя бувсунни ва Центрданул зузала Сабина ТIа­гьировал.
Хъирив ихтилат бунни Светлана Корниенкол.
— Авгъаннал дяъви хьуссар жулва билаятран 1945 шиная махъ гьуртту хъанан багьсса ца яла оьхIалмур ва чIявусса оьтту экьибувтIумур дяъвилул питнану. Ва дяъвилий ливтIуссар 15-нния ливчусса жулва жагьилтал, цала интернационал бурж би­ттур буллай бивкIсса. Авгъаннал дяъвилувух Каспийскалиясса 150 жагьилналгу гьурттушинна дурссар, миннавагу 6 ивкIуссар, 45 ливчIссар оьрмулухун мушакъатну. ХIакьинусса кьини Авгъаннал ветерантурал шагьрулул советраву ур 124 инсан, — увкунни ванил.
Махъ лавхъунни КМШИ-рал преподаватель, аьралуннаясса-интернационалистътураясса лу­ттирал автор Айдемир Мирзахановлулгу. Мунал бувсунни цалла луттиран аьркинсса материал цукун датIлай ивкIссарив, мунин хасну авгъанцынащал хьусса хьунабакьавурттая.
Авгъаннал дяъвилул ветеран, Каспийск шагьрулул гимназиялул педагог Шамил МахIаммадовлул бувсунни оьрчIахь тай шиннардил иширттая цанма дакIниймур:
— Совет аьрал, анжагъ аьрали иширттавух гьуртту хъанай бакъассагу, бивкIссар та билаят­рал инфраструктура ччаннай дацIан дуллайгу. Жулва учительтал бикIайва авгъаннал оьрчIан оьрус маз лахьхьин буллай, мукунма тайннал инсантуран аьркинсса, медициналул тIий, цамур тIий, кумаг бувайссия жува. Авгъаннавун гьаннин жу дуккаврил бутIраву ххуйсса хIадуршинна дувайссия, къуллугъ буллайна мунияту ххуйсса кумаг шайва. Гьарцагу инсаннал хIарачат буван аьркинссар дакьаву дуруччин. Цанчирча, дяъви, цумур бунугу, му – балари, литIавурттур, лекьавурттур, пуч-палачат бувсса кьадардур. ЧIа тIий ура цинявннан дакьаву ва паракьатшиву, – увкунни ванал.
— Ванияр 28 шинал хьхьичI жулва билаят ххари хъанай бивкI­ссар жулва солдат шаппай зана шаврия, 10 шинал лахъишиврий най бивкIсса дяъви къуртал шаврия. Зу, оьрчIру, ялапар хъанай, хъуни хъанай буру дакьаврил чIумал, амма аьрщарай дакъар паракьатшиву. Хъуннасса агьамшиву ду­ссар зун вай вирттал дакIний бушиврул, мюрщиния шинмайва зу вайннаха лавхьхьуну къу­ццу тIутIаврил ва ватандалух­сса ччаву, виричушиву тIисса му­къурттил куртIшиву дурчIаврил, — увкунни Людмила Левицкаял.
Мукунма ванил дакIнийн бувтунни Авгъаннаву талай бивкIсса чиваркIуннан хасну шагьрулул паркраву дацIан дурсса гьайкал дуршиву муниципал сакиншиндарал бакIчи МахIаммад Аьбдуллаевлул кабакьаврийну, ветерантурал дяъвилий жанну дуллусса цала гьалмахтурал аьпа абад бувансса тавакъю щаллу буллай.
Дуклаки оьрчIал дурккунни цIаран лархъун най диркIсса