Дагъусттаннал УФСИН-лул 8-мур исправительный колониялий (ИК-8) щябивкIсса хъаннищал хьунабавкьунни Дагъусттаннал Муфтиятрал просвещениялул отделданул вакилтал.
Вайннал ихтилатирттах вичIи дирхьуну махъ колониялийсса хъами цала оьрмулул иширттах ва масъаларттах цамур куццуй буруглан бивкIунни.
ТанмихIрайн кIункIу бувсса хъаннил дакIурдивун ххуллу лякъаву, ми тIулдакъашивурттая арх баву ва тIайла бацIан баву мурадрай вайннащал хьунабавкьунни Асият Мукошдибирова ва Мадина ХIамзаева. Асият Мукошдибировал бувсунни исламрал диндалуву кьиматраймуния, бувчIин бунни, цайми диннаву кунна, исламравугу инсаншиврул, яхI-намусрал кьимат лахъну бушиву. Цила ихтилатраву Мадина ХIамзаевал маслихIат бунни шиккусса хъаннихь исламрал ххуллур тIий бявкьусса ххуллийн къабуккан личIлулну бикIияра куну. Колониялийсса хъанниву сайки бувагу бакъар исламрал дин ххуйну кIулсса. Укунсса хьунабакьавурттай ми буллан бикIай цанма кIул хьун ччимунил хIакъиравусса суаллу, маслихIат ккаклан бикIай цания ца ишираву ци зун, цукун занакьулу бикIан аьркинссарив. Ва ххуллухгу хъаннил буллалисса суаллу чIявусса бия. Муфтиятрал вакилтурал, миннун жавабругу дуллуну, хъаннин мюнпатсса маслихIатругу бунни.
— Укунсса хьунабакьавурттая, дуснакь бувмигу, диндалул вакилталгу цачIу щябивкIун бувсса ихтилатирттая хъунмасса кумаг шай хъами цаймигу тIулдакъашивурттая арх бан, миннал багьу-бизу, пикри-хияллу баххана бан, оьккимур ва ххуймур личIи бан кIулну, цIунилгу бяйкьусса ишру къахьун, — тIий ур колониялул хъунама, виваллил службалул полковник АьлигъалбацI МахIаммадов.
Дагъусттаннал УФСИН-лул пресс-служба
ХIадур бувссар
А. Аьбдуллаевал
