Давудлул душ Исакьова Ххадижат
Февраль зурул 12-нний аьпалувух бивхьунни КIямашрал шяраватусса Исакьова Ххадижат Давудлул душ.
Ххадижат бувну бур 1935 шинал КIямашав Давудлул ва Издаглул хъун бакъасса кулпатраву. Дяъвилул шиннардил оьрчIан кунма, ванингу, оьрчIшиву чIарах дуккан дурну, ччяни хъунма хьун, захIмат буллан лавхьхьуссар. Зий бивкIссар дояркану «ЯтIул ттугъ» колхозрал фермалий. Ххадижат бия душвараву итххявхсса, гулаватилул давуртту дувайсса, вайми душваран тIутIал суратру дирхьуну дулайсса гулаватив щашланшиврул. ИчIаллил давуртту канилух дурксса Ххадижат щар хьуну махъ бивзун бур шагьрулийн. МахIаммад ХIажиевлул цIанийсса заводраву буфетрай зий диялсса шинну дурссия ванил. Вайннал, ласнал Апаннинал ва Ххадижатлул, яла ххирамур кIану бия цивппа зузисса завод, тикку зузисса лак ва кIулсса цаймигу архIал зузими. Хъунмая вайннал хIурмат кIулначIагу.
Ххадижат оьрчIал дардирдал лахIан бувна, чIун дияннинма шанийн бувтуна зирангсса хъамитайпа. Бигьану бакъая жагьилсса шама арс аьпалувух бивхьуну, лякьлуй вярчIу багьсса ниттин. Асттавпируллагь, душманнан къаккакканнав. Лас аьпалувух ивхьуну махъ кьянкьану бавцIуну бивкIсса Ххадижатгу лавхIуна, гъавгъуна. Уссурссуннан ххирасса, бусравсса Ххадижат тамансса хIаллай шанийн багьуна. Арс ва арснал щар, цилва душ кунмасса кIулсса лакку душ цилва ниттих кунма буруглай бия. Чирину тIайла бацIаннав мукун цайминнай аякьа дувайсса инсантуран.
Ххадижатлул бивкIулул кьурчIишиву кIидачIлай, жижара буллай буру арснахь Исланнухь, арснал щар Гулахь, арсурваврал оьрчIахь, уссу Салманнухь, ссурвал ПатIиматлухь, ХIанипатлухь, цинявппагу ссурахъаврахь, уссу-ссурваврал оьрчIахь ва махъсса щалвагу агьлу-авладрахь. Ванил рухI алжаннул ххари даннав, гьав нурданул дуцIиннав. Амин!
КIямашрал жямат
