Декабрь зуруй Аьрасатнал Президент Владимир Путиннул баян бувна дуклаки оьрчIал лаххия язи дугьаврил ихтияр школардахь цахьра душиву. Амма Аьрасатнал кIулшиву дулаврил ва элмулул министр Ольга Васильевал январь зурул 24-нний Москавлив хьусса пресс- конференциялий баян бувна школардайн карщаву заназаврил къадагъа дикIан аьркиншиву, му Аьрасатнал Конституционный судрал хIукму бушиву.

ПатIимат Рамазанова
«ДакIнийхтуну дин дуллали­сса инсан атрибутикалийну цалла дин ккаккан къадуллантIиссар, хаснува дуниявийсса школардай». Мунил му увкуна Мордовиянаву, Белозерье тIисса татарнал шяраву кIанттул властирдал дуклаки душвавран ва учительницахъан хиджаб лаххаврин къадагъа даву тIайлассар тIисса мяъналий. ЧIявусса инсантал, прессалий ва социал сетирдай, Ольга Васильевал махъру дащуй бихьлай сукку хьуна, ца зумату кунма, хиджаб – шариаьт­рал тIалавшиндарайсса хъаннил лаххияр, школардай бикIу, чув бикIу, душру чурххал базурду кIучI бувну бикIан аьркин­ссар тIий. «МурцIу – му атрибутика дакъар, бусурман хъаннил лаххиялул ца бутIар. Ттул шанма душ школалий дуклай бур, марцIну ххювардай дуклай бур, карщив дирчуну занай бур. Ольга Васильева минная карщив дукьаву тIалав буллалиссарив? ТачIав къадукьантIиссар миннал карщив! Карщалсса къабуллай, школардайсса цIурувкьюсса цайми масъалартталсса, наркоманиялулсса, хIанттихун багьминналсса буллан аьркинни, лачакирттащал къаталай, оьрчIал мяърипат лиян дуллалиминнащал талан аьркинни», – тIий, чивчуна Чачаннал БакIчи Рамзан Кьадировлул «Инстаграммраву». Чачаннал КIулшиву дулаврил ва элмулул министерствалул отделданул хъунмур Элиса Одаевалгу баян бувна Чачаннаву сайки циняв душру бакIрайн мурцIурду бивчуну занай бушиву, мурцIу къабутаву цала менталитетрацIун къабавкьусса зат бушиву. «Карщи – му жучIа цинявннан кьамул­сса дресс-кодри, цалчинми кла­ссирттава байбивхьуну, душру мурцIурдавур бикIайсса», — увкунни чачаннал чичу ва политолог Руслан Мартаговлул. «Агар душнин школалий ягу вузраву хиджаб лаххан ччай бухьурча, му мунил ихтиярди, ла­ххича, амма, цаппара ккавкказуллал регионнай кунма, хиджаб ялув духIлан къабучIиссар», — тIий ур исламовед Алексей Малашенко.
Хиджабрал чул бувгьу­мин­нацIун бувагу къабакьлакьи­ссагу бусурман динчитуравугу чансса бакъар. Аьрасатнал Бусурманнал рувхIаний управлениялул (ДУМ РФ) хъунаманал хъиривчу Дамир МухIуттинов ур гьайгу-дайгу хиджаб лаххан аьркинссар тIисса тIалавшинна дакъассар тIий. Мунияту ванайн «погоннавусса муфтий» тIий бур, му бусурманнал чIарахацIу акъашиврий чIурчIав дуллай.
Экспертътураву цайми диннал агьлугу бур хиджабирттал чул бувгьусса.
Аьрасатнал Президентнал пресс-секретарь Дмитрий Песковлул баян бунни хиджабир­ттал хIакъиравусса дискуссиялуву цавайнналвагу чул бугьан ччай бакъашиву.
Тикрал буван ливчIунни, хиджабру школарттай ва вузирдаву бучIи-къабучIишиврул хIакъиравусса бяст-ччаллийсса ихтилатру 2012 шиная шинмай най бушиву. Таний Ставропольлал крайрайсса Кара-Тюбе тIисса шяраву школалул администрациялул хиджабирттаву школардайн занансса къадагъа дурссия.
«Эхо Москвы» радиолул баян бунни, расмийсса социологиялул хIасиллайн бувну, вай гьантрай ВЦИОМ-рал дурсса цIуххавурттайн бувну, Аьрасатнаву гьарца кIилчинма инсан хиджабрал муттаэ акъашиву. Яъни, Аьрасатнал агьалинан 50 процент хиджабру лаххансса ихтияр дикIан аьркин­ссар тIутIиминнал тарап дургьуну бусса бур.