Уттигъанну Каспийскалий шагьрулул ЦБС-рал 4-мур филиалданий хьунни шаэр Римма Казаковал оьрмулун ва творчествалун хас дурсса литературалул вечер. Римма Казакован вай гьантрай там хьунтIиссия 85 шин.

Мажлис хIадур бувну бия ЦБС-рал 1-мур ва 4-мур филиаллал зузалтрал, шагьрулул гимназиялущал ва 6-мур школалущал цачIу.
Вечер тIитIлай, ихтилат бунни 1-мур филиалданул хъунмур Саида Хурияловал:
— Римма Казакова варх куну бувххунни шестидесятниктурал (Евтушенко, Вознесенский, Рождественский, Ахмадулина) аьлагъужасса компаниялувун, чарив Дальний Восток­рая, жагьилсса, бакIрал ххуй­сса, гьунар бусса душ. Мунил дакIнийхтунусса, куртIсса творчествалущал кIул хьума оьрмулухун ясир уллай бур…
Ва вечер дачин дурсса гимназиялул дуклаки оьрчIал – Данила Федоровлул ва Саида ШайхмахIаммадовал – бавтIми кIул бунни шаэрнал оьрмулул ва творчествалул ххуллущал. Римма Казаковал шеърирдал цалчинсса сборник бувккун бур 1958 шинал. Шаэр машгьур хьуну бур дусшивриясса, эшкьи-ччавриясса, хаин къашавриясса шеърирдайн бувну. 1959 шинал Римма Казакова кьамул бувну бур СССР-данул Чичултрал союзравун. Махъ мунил къуртал бувну бур М. Горькийл цIанийсса Литературалул институтрачIасса литературалул лавайми курсру. Римма Казакован дуллуну дур ЗахIматрал ЯтIул Ттугълил ва Дусшиврул орденну, Кириллул ва Мефодийл орден.
Шагьрулул школардал дук_лаки оьрчIал дурккунни шаэрнал цIа дуркми ва нажагьссаннан дакъа къакIулми назмурду. Вечерданий мукунна ккаккан дунни Римма Казаковаясса видеофильм, итабавкьунни сайки гьарцагу аьрасатлувнан кIулсса, ванил му_къурттийсса балайрду, цивгу утти­заманнул эстрадалул артистътурал щаллу бувайсса – «Ты меня любишь», «Мадонна», «Музыка венчальная», «Поздняя женщина» ва цаймигу.
Ахирданий ва мажлисравух хьхьичIунсса гьурттушинна дурминнан грамотартту дуллунни.