Дагъусттаннал Пенсион фондрал отделениялул вакилтал гьур­тту хьунни «Азбука интернета» тIисса, пенсионертуран компьютердай зун лахьхьин буллалисса программалуха зузисса преподавательтуран хас дурсса семинар-видеоконференциялий.

ВидеодахIаврил кумаграйну конференция най дия Дагъусттаннай ва Аьрасатнал личIи-личIисса регионнай. Семинарданул даву дачин дурну бия Аьрасатнал Пенсион фондрал правлениялул председательнал хъиривчу Лилия Чижик ва «Ростелекомрал» вице-президент Александр Маслов.
Лилия Чижиклул бувсунни 2017 шинал пенсионертуран компьютерданий зун лахьхьин буллалисса программа хьхьичIуннай даву мурадрай кьамул дурсса цIушиннардия (Аьра­сатнал Пенсион фондрал электрон журалул хIаллихшиннардия ва Аьра­сатнал Пенсион фондрал мобильный приложениярдая).
Александр Масловлул кIицI лавгунни «Азбука интернета» программа ва анаварсса бущилий интернет зузи буллалисса «Ростелекомрал» проект хъинну хъунна­сса агьамшиву дусса душиву. Вай кIирагу проектру буниялагу дакъа чара бакъасса дур, хаснура зун­ттал щархъаву ялапар хъанахъисса агьалинан.
Семинарданий преподавательтурал хьхьичIун лавсунни «Азбука интернета» тIисса курсру бачин бувсса преподавательтуран­сса методикалул маслихIатру бу­сса лу­ттирду. Мукунма шикку ккаккан бунни уттинин дарсру дихьлай, хьхьичIунсса хIасиллу дурсса преподавательтурал даврил опытру.
Дагъусттаннал Пенсион фонд­рал отделениялул хъунама Ма­хIаммад Исяевлул кIицI лавгунни семинарданул даврил агьамшиву. Ванал мукунма шикку гьуртту хьуминная тIалав бунни дагъус­ттаннал пенсионертуран компьютердай зун лахьхьин буллалисса давуртту хьхьичIуннай даву.
Семинарданул давриву гьур­ттушинна дунни Дагъусттаннаймур «Ростелеком» ПАО-лул филиалданул директор ХIамзат ХIамзатовлул, ДР-лул ЗахIматрал ва социал хьхьичIунмайшиврул управлениялул хъунама Макка­махIаммад Жамаевлул, республикалул кIул­шивуртту дулаврил ва социал идарарттал каялувчитурал.