2014 шиная шиннай декабрьданул 3-нний жула билаятрай кIицI лагайссар ЯтIа-тIар бакъа акъа хьусса солдатнал кьини. Ва кьинилун хасну МахIачкъалаллал цаппара школарттай ва библиотекардайгу дурунни аьпалул шадлугъру.

Ца мукунсса «Подвигу жить в веках!» цIанилусса шад­лугъ хьунни вай гьантрай №6 Николаевлул цIанийсса кIичIиравусса ОьрчIал библиотекардавасса № 2-мур филиал-библиотекалийгу.

З. АьбдурахIманова
Шадлугърал «ЦучIав хъамакъаивтссар, цикIуй хъамакъабивтссар!» тIисса бутIа хас бувну бия жула билаятрайн ххявхсса чапхунчитуращалсса дяъвирдал майданнай ятIа-тIар бакъа бакъа хьусса аьралийтуран. Ванил мурадгу бия шадлугърай гьуртту хьусса МахIачкъалаллал № 37-мур школа-гимназиялиясса дук­лаки оьрчIахь ва ДГПУ-рал тарихрал факультетрал студентътурахь Ватандалул цIаний жанну харж дурсса солдатътурал чувшивурттая бусан, минная аьпалул махъ учин ва жагьилмур никирангу кIулну бикIан аьркиншиву вания гихунмайгу ирсирая ирсирайн минначIансса хIурмат чан хьун битан къабучIишиву.
Шадлугърал «Ттун дакIний бур! Ттун пахру бур!» тIисса кIилчинмур бутIарив хас бувну бия 2007 шиная шиннай декабрьданул 9-нний кIицI лагай­сса Аьрасатнал

Виричунал кьинилун. Ванилмур мурадгу бия жагьилмур никираву аьрали-патриотсса литература машгьур даву, ми ккалансса гъира, гьавас ххи баву, хъунмур никирал дурсса чувшиврий жагьилтал тарбия баву.
Вай шадлугъирттая махъ, биб­лиотекалул луттирду бу­ккаймур залдануву «Пусть поколения знают» тIисса луттирал презентациягу хьунни.
«Дагъусттанлувтал – Аьра­сатнал вирттал» тIисса ихтилат­равугу библиотекалул зузалт­рал оьрчIахь бувсу­нни Аьра­сатнал Вирттал Исяй Мутаевлул, МахIаммад Оьма­ровлул, МахIаммадшамил Аьбду­ра­хIимовлул, Загьид Загьидовлул, Халид Мурачуевлул ва цаймигу вирттаврал дурсса чувшивурттая ва вайннан дуллусса орден-медаллая. Бувсунни вайннал оьрчIахь мукунма Аьрасатнал тарихравун ларгсса личIи-личIисса талатавурттая, микку ххувшавуртту ларсъсса оьруснал вирттаврая, халкьуннал чувшиврия, бувхIусса захIматрая ва душманна­хьхьун рай къабулун бувсса яхI-гужирая.
Ва кьини чIяруя библиотекалул пишакартурал цала мюрщи хъамаллуран хIадур дур­сса бахшишру. ЛичIи-личIисса хIазсса хавардацIун, луттирдал презентациярдацIун, вайннал хIадур дурну дия мукунна «Отвага. Мужество. Честь» тIисса цIанилусса луттирдал выставкагу. Дуклаки оьрчIру ва студентъталгу шиккун бачIва бувкIун бакъая. Вайннал шикку буккин хIадур бувну бия аьралийтуран, чувшиврий жанну харж дурминнан хасъсса шеърирду.
Библиотекалул пишакартурал хIадур дурсса, цал архIал пашмансса ва мяъналул куртIсса ва шадлугъ цурдагу хьунни дук­лаки оьрчIал, студентътурал дакIурдиву чаннасса асарду ва дяъвирдай яла аргъира­вусса жагьилсса оьрмурду бяливчIминнал аьпа абад був­сса шадлугъну.