Вай гьантрай МахIачкъалалив КОР марцI дуллалисса давурттив най дур. Масалдаран, каналданул зумардая ччюрк дукьлакьисса унгу-унгусса давурттив най дур Кировский райондалул администрациялул зузалтгу гьурттуну.

Ва каналданувасса щинал дузал буллай буссар хъуншагьрулул чIявуми халкь. Мунияту, ванил зумардал ялтту буклай, шикку ччя-ччяни марцI-чапалшиврул давурттив дувайссар хасъсса къуллу­гъирттал. Укун зий, канал марцI дуллай бунугу, чансса бакъар жула халкьуннаву хьхьувайния кIюрххилнин цала къатлувусса ва строительствалул ччюрк (киражрал ххит, гъавгъсса чIирттал чартту, бухсса хьулу, чIавахьултту) ду-дунийн дирчуну кьаритайсса.
Декабрьданул 9-нний Кировский райондалул бакIчи СалихI Сагидовлул цIунилгу цала райондалийсса КОР-данул ялтту увккун, амру бувунни чIявуну ччюрклил бакIурду лякъайсса кIанттурдай хъирив бавцIуну, бунийва протоколлу чичин.
ХIакьинусса кьини КОР-данул чIарах яхъанахъисса халкьуннал къатрава, хIаятирттава канализациялул щинну экьи нанисса ишру сайки бакъасса бур. Амма каналданул чIарах нанисса ливневкардал тагьар дур лап лащинсса. Ми дур пластикрал шушрал, пакетир­ттал ва цаймигу ччюрклил дурцIуну. Вай дакъасса, мива халкьуннал цала канализациялул бургъурдугу бу­сса бур ливневкардавун бурган бувну. Вай укунсса иширтталгу хъирив лавну, чIал къавхьуну къадагъа дишинтIиссар укун зун.