Дагъусттаннай бартларгун дур кIинтнийнсса хъала лазуни хIадур даврил давуртту. ДР-лул Минсельхозпродрал ккаккиярттайн бувну, республикалий хIадур дурну дур сайки 1 млн. ва 558 азарда тонна лазундарал, яни 80 азарда тоннаксса дукIунияр ххишалану.
ХIасан Аьдилов
ХIадур дурсса лазундарал хъунмур лагру дур ххалал – 1 млн. ва 414 азарда тонна. Щинтасса лазундарал 15 азарда тонналияр ххишаласса дур хIадур дурну, миннува чIяруми дур силос.
Махъсса шиннардий Дагъусттаннай республикалул каялувчитурал хъуннасса къулагъас дуллай бур лазуни хIадур даврих, цанчирча ризкьи гьарзану я булланшиврул, гайннун гьасса лазунигу хIадур дуллан аьркинссар.
ДР-лул Шяраваллил хозяйствалул министерствалий бувсъсса куццуй, республикалий кутIасса мутталий бювхъуну бур ххуйсса хIасиллу хьун дуван. Махъсса цаппара шиннардий республикалий ларсун дур хъаласса лазундарал 1 млн. ва 400 азарда тонна, ми хъанахъиссар Совет заманнай ласайсса диркIссаксса лазуни. Гьашину республикалий лазуни хIадур даврил ккаккияртту ларгми шиннардияминнуяр ялтту дурккун дур.
