Декабрьданул 11-нний Дагъусттаннал политехнический ко­л­леджрал спортрал къатраву хьунни республикалул оьрчIал ва чIава жагьилтурал панкратиондалул Сурхай-ханнал цIа абад даврин хас дурсса тIиртIусса 1-мур турнир.

ХI. Аьдилов
Турнирданий гьуртту хьунни 6-17 шиннардил оьрмулувусса оьрчIру ва чIава жагьилтал.
Бяст-ччаллах тамаша буван бувкIун бия республикалий цIа дурксса хIала-ккаласса дандибуккавур­ттал, каратэрал, самболул, дзюдорал цIа дурксса ччалли буккулт, журналистътал ва цаймигу.
Турнир дачин дурну ия РГВК-лул журналист Марат Бигаев.
Бяст-ччаллу сакин бувссар СКФО-рал боевой искусствардал федерациялул президент ва панкратиондалул республикалул хъунама тренер Аьбдулкерим Айгуновлул. Турнирданул хъунама судьяну ия панкратиондалул Да­гъусттаннал федерациялул президент Олег МахIаммадов. Командарттавату 1-мур кIану бувгьунни «Молодой дракон» спортклубрал (тренер Олег МахIаммадов).
2-мур кIану бувгьунни «Воины» тIисса спортклубрал
3-мур кIану – «Ночные волки» спортклубрал.
1-мур кIану бувгьунни 6 шинавусса Чаканай Сагидовлул (20 кило) ва 8 шинавусса Сажид Сагидовлул (23 кило). Вай бур МахIачкъалаллал Кировлул райондалул бакIчи СалихI Сагидовлул арсру.
2-мур кIану бувгьунни Хъусращатусса Ттаттаев АьбдурахIманнул, ванал дур 6 шин (20 кило).
Шамулчинмур кIану бувгьунни Ттаттаев Умардул (20 кило).
Шамулчинмур кIану бувгьунни 66 килорал кIушиврий АхIмадханов Казбеклул. Шиккува бусан, ва цалчин гьуртту хьу­ссар укунсса турнирданий ва бувгьуссар призрансса кIану. Ва ур М. Даххаевлул ссил арс.
Вай лавай кIицI бувсса циняв лакку оьрчIру бур. Барча зул хьхьичIунсса кIанттурду, бюхълай личIаннав. Ххув хьуминнан ва хьхьичIунсса кIанттурду бувгьуминнан буллунни хасъсса кубокру, медаллу, грамотартту, бахшишран буллунни футболкарду, боксертурал катIри, Сурхай-ханнал суратру, боксрал груша, Дагъусттаннал жагьилтурал иширттал министрнал цIаниясса барчаллагьрал чагъарду.
Турнир тIитIаврий балайрду увкунни лакрал театрданул артист ва балайчи Аьбдул Мурадовлул ва Жаклинал.
Аьбдулкерим Айгуновлул цалва чулуха барчаллагь тIий ур турнир сакин давриву кумаг був­сса Кировский райондалул мировой судья Мащилиев Камиллухь, ДР-лул Шяраваллил хозяйствалул бюджетрал финансированиялул управлениялул хъунама Эмил Ттаттаевлухь, каратэрал дунияллул чемпионатрал призер чIурттащатусса МахIаммад Аьли­шаевлухь, Нотариусрал хъунама ЦIуссалакрал шяраватусса Аьбдул Рамазановлухь.