«Российско-Германский молодежный обмен» тIисса программалул лагрулий Германнал Кельн шагьрулийсса «Атлант» тIисса интеграционный центрданущал цачIуну Дагъусттаннал Дакьаврил фондрал дунни Аьрасатнал, Украиннал ва Германнал жагьилтурал хьунабакьаву ва мунийну зузи бунни «Передача демократических ценностей для молодежи» тIисса проект.

Зулайхат Тахакьаева
Ва проект чулийн буккан баншиврул бавтIун бур Да­гъусттанная, Волгоградрая, Харьковрая ва Кельн шагьрулиясса мяй-мяйя студентная сакин бувсса группа. Дагъусттанная ва хьунабакьаврийн лавгун бур Да­гъусттаннал ПаччахIлугърал халкьуннал хозяйствалул университетрал студентътал. Миннал хIадур дурну дур жула рес­публикалия, Дагъусттаннал халкьуннал магьирлугърая, аьда­тирттая бусласисса программа ва миллатирттал балайрдал ва къавтIавурттал концерт.
Ва аьрххилия бувсунни Да­гъусттаннал Дакьаврил фондрал хъунама Мухтар Давудовлул.
Проектрал агьаммур мурад хъанай бур миллатирттал дянивсса арарду цIакь даву, миллатирттал магьирлугъращал, аьда­тирттащал ва багьу-бизулущал кIул баву, мунийну ттизаманнул обществалуву миллатир­ттал ва диннал дянивсса бувчIа-къабувчIавурттал барурду лекьан бан кабакьу баву.
Проектрал лагрулий гьарца кьини хъанай диркIун дур миллатирттал дянивсса дусшиврул арарду цIакь даврил темардан хасъсса хьунабакьавуртту, семинарду, ихтилатру, экскурсияртту. Шанмагу билаятрая бувкIсса этнический группардал кумаграйну ххал диргьуну дур проект­рал агьамсса темарду. Ва кьяйдалий зузаврийну аьч дан бювхъуну бур гьуртту хъанахъиминнал дунияллий хъанахъимунил хIакъиравусса пикрирдал цалащаву ва личIишиву. Куннащал ку гъанну кIул шаву мурадрай, гостиницалуву гьарца номердануву гьантта ивтун ур шанмагу билаятрал студенътурая ца-ца инсан.
Ва проектрал агьамшиву лап­ра хъуннасса дур Украиннаву­сса социал-политикалул тагьар захIматсса душиврийну ва билаятрал баргъбуккавал чулий яра­гъуннищалсса къалмакъал лагь хъанай дакъашиврийнугу. Гьарцагу гьурттучинал чирчуну дур ва къалмакъал леща-лекьа даврил хIакъиравусса цала пикрирду бусласисса сочиненияртту.
Жура-журасса идарарттаву (Кельн шагьрулул кIилчинмур инстанциялул судрай, «Немецкая волна» телецентрданий, «Neven DuMont Haus» издательствалий, «Fachhochschule des mitteelstands» университет­раву) хьусса семинардай хха бивгьуну бур хIакьинусса кьини дунияллий агьамсса социал-экономикалийн багьайсса темарду, демократиялул гьанулий ми масъалартту щаллу бансса ххуллурду.
Ва журалул хьунабакьавур­тту дакъассагу, Кельн шагьрулул концертный залдануву хьуну дур хъуннасса концерт. Муний гьуртту хьуну бур Африканал, Азиянал ва Европанал личIи-личIисса билаятирттаясса вакилтал. Сайки дачIи ссятрай нани­сса Дагъусттаннаясса студентътурал концертрай тамашачитал хIайран бувну бур ахъушиял къавтIаврил, яруссаннал аьдат­рал, лакку балайлул ва «Лезгинка» къавтIаврил.
Экскурсиялий хъамал бувцуну бур Кельн шагьрулул тарихрал гьайкаллачIан, яла яба­цIанми кIанттурдайн: Бонн шагьрулул тарихрал музейравун, «Фантазия Ленд» тIисса аттракционнал паркравун ва Нидерланднал хъун шагьру Амстердамрайн. Студентътал кIул хьуну бур вай шагьрурду хIасул шаврил тарихращал.
Экскурсиялия махъ «Атлант» интеграционный центрданул каялувчи Евгений Ремпельлул цинявппагу гьурттучитуран буллуну бур хъамакъабитулунсса ссайгъатру.
Дагъусттаннал дакьаврил фондрал хъунама Мухтар Давудовлул, «Атлант» центрданул каялувчитурахь дурсса давурттахлу барчаллагьгу увкуну, буллуну бур «Российский фонд мира» дунияллул халкьуннал дянивсса жяматийсса фондрал чулухасса диплом, Аьрасатнал ва Германнал цачIусса жагьилтурал дунияллул лагрулийсса проектру зузи бавриву дуллалисса гьурттушиндарахлу.
Дагъусттаннал Дакьаврил фондрал цIания Мухтар Давудов барчаллагь тIий ур ДГУНХ-рал ректор ЯхIия Бучаевлухь ва Жагьилтурал иширттал комитетрал хъунама Нурул-Ислам Хъунбуттаевлухь, Дагъусттаннал рес­публика дунияллул лагрулий лайкьну ккаккан дан бувсса кабакьулухлу.