Ноябрь зурул 15-нний ЦIу­ссалакрал райондалийн увкIунни ДР-лул промышленностьрал ва машлул министр Юсуп Умавов. Ва ивунни ЦIуссалакрал райондалий буллалисса объектирдайн: ЦIусса миналий Гьамиящиял шяраву бувну къуртал хъанахъисса му­ххал конструкциярдал заводрайн, ва ЦIуссаккуллал шяраву помидорду бугьлан 7 гектар аьрщарай буллалисса теплицардал комплексрайн.

Муххал конструкциярдал заводрал инвестор хъанай дур «Алмар Каспиан» тIисса туркнал компания.
Теплицардал комплексрал инвестор – ООО «АГРО АС».
Министрнащал райондалий дуллалисса объектирдайн бувкIунни ЦIуссалакрал райондалул бакIчи ХIажи Айдиев, лак цIусса миналийн бизан баврил ва Аухуллал район цIудуккан даврил масъаларттаха зузисса ДР-лул ХIукуматрал управлениялул хъунама МахIаммадаьли МахIаммадаьлиев.
ХьхьичIва-хьхьичI делегация бивунни «Алмар Каспиан» завод­райн. Завод бан итадаркьуну дур 3,5 гектар аьрщарал. Проект щаллу буллай, цалчинмур этапрай дан тIий бур къатри дуллалийни ишла дайсса муххал конструкцияртту, инсантал ялапар хъанансса вагонну ва производствалул цехру.
КIилчинмур этапрай бан кка­ккан бувну бур дикIул комбинат ва теплицарду. Му бакъассагу, бан тIий бур оьрчIал багъгу. 1500-нния ливчусса инсантал щаллу бан тIий бур давурттал. Миннал 20-24 азарда къуруш харжирдал ласлан тIий бур.
Инвестициялул проект дузал бан тIий бур так инвесторнал арцух. Туркнал бизнесментал махъ буллай бур чIирисса чIумул дянив цIакьсса къатри дуван. Машан ласун бюхълай бур хIадурсса къатри, так ми конструктор кунма батIин аьркинну бур. Укунсса технологиялий дур­сса къатран ххишаласса материаллу ласун багьлай бакъар, вай хъунма­сса хIаллай дияйсса дур, ца кIаная ца кIанайн диян дан чансса харж бук­лай бур, къатрал монтаж бигьа дуллай дур. Къатри цирдагу ца зурул дянив дурну къуртал хъанай дур. Компаниялул тIутIимунийн бувну, къатри дуллай бур тIабиаьтрал шартIру хIисавравун ларсун. Вай къатрал къулайшиннардавасса ца дур аьрщи сукку хьурчагу цIакьну дацIантIишиву.
Завод ххал бувну махъ делегация бувкIунни ЦIуссаккуллал шяравун, теплицардал комплекс ккаккан.
Предприятиялул каялувчитурал бусласимунийн бувну, хIакьинусса кьини шикку зий бур котельныйлул, къатри гъили дайсса системалул монтажраха, къуртал шавай бур теплицардай пюрунт бивхьуну. Шикку зий бур лавайсса даражалул пишакартал. Предприятиялул каялувчинал барчаллагь увкунни райондалул администрациялухь теплица буллалисса давурттан кумаг баврихлу.
ЦIанасса чIумал объектру буллалисса давуртту пландалий кка­ккан дурсса куццуй най дур.
Теплицардал комплекс ва му­ххал конструкциярдал завод шинал ахирданий зун тIий бур.