Булбул Оьмариева

* * *
Дахлай бур уртту-тIутIив,
Дахлай бур хъус-ххазина,
Ссал къабагьар, ххарину,
Ххалгу дуллай, хъус ласлан.

Амма цукунни ласун
Багьа бищун къашаймур,
Чани ххинал дакIнива
ДакI мусил инсаншиву?

* * *
Булбул-чIелму бикIайссар,
Эшкьилуха балай тIий,
КъюкIлий хIасратрал лама
ДакIний нурданул лахълай,

Аммарив хъункIултIутIун,
Бакъаний ччаврил асар,
КъахьунтIиссар пишкаш бан,
Пишвагу булбулданун.

* * *
Нину ва ппу бунири
ОьрчIал дакIру ххарисса,
Къабукканнав кулпатран
ОьрчIая личIи хьунсса.

КIирагу хъа дунири
Лелуххул гьава байсса,
Нину-ппу личIи хьуни,
ОьрчIал дакIру гъагъайссар.

* * *
Архния чIалачIийни,
Кавс щилчIавмур щюллиссар,
Ялун ивну, урувгни,
Бюрув-къатIри чIявуссар.

Хъус чару, кьини чару –
Чил думуний мяш шару.
Агь, ци дуссар дунъяллий,
Мусил кIюрхнияр ххуйсса!

* * *
Гьава бявкъуний дакъа,
Силгу тачIав къаритай,
Силгу, туну, тихара
Замгьарданущал дачай.

Ци тахсирди инсаннай,
Силданухьхьун иривни,
ЗахIматсса заманалул,
Зурзу бакьлакьи увни?

* * *
Агь, инай, ва дуниял,
Чани шавай, цIан шавай,
Вас-ццах бикIай дакIниву,
Ссайн дуккайвав ина тIий.

БакI гьаз дара, бургара,
Чани шавай дурвав тIий,
Чаннал ва цIаннал дянив
Цуксса манзил бурвав тIий.

* * *
Инсан буттал улклуцIа
Уцансса къабукканнав,
Шарда гьарта дуниял
Чил кIанай къума шайссар.

Гъурбатрайсса талихIгу
ТанмихIрайн кIура бавну,
Дунияллул кIушиву
КIул хъанай дайдишайссар.

* * *
Гьузуй бунува ялув,
Хьхьирин жами кIу къашай,
ВибуцIирчаннив щинал,
Бювкьун лагай чIанулун.

Жамиривав жулла дакI,
Дард дакъани, куклусса,
ХIасратрал кIу дарчаннив,
Аьрщинияр кIу шайсса.

* * *
Хъит тIий бакъар къахъну
Хъатлийсса хъалуйн,
ХIучI тIий бур букъагьан,
Инсаннал канил,

Буччиннин хъа канай
Канивунияр,
Илкинну лехлайсса
Тархъаншиву ччай.

* * *
ЧIивисса хъинбала
Хъамакъабитлай,
Ца уссар дувансса
Хъиншиврух луглай.

Цалашиврий оьрму
Харж бувну буна,
Цама уссар бувмур
КIулвагу бакъа.

* * *
Кувннил кув ппив-ххив буллай
Биллалисса ккаччачIан
БарцIру ялун бачирчан,
Ца хьуну, цачIун шайссар.

Дяъвирдал пасат дуллай
Буруча зу ва аьрщи,
Аьламрава ца бала
Ликкарча, зу ци зунну?

* * *
Ай-гьарай, ва дуниял
Ца хIисаврай хьусса дур,
Лякьлувусса оьрчIгума
АьтIий уккай Аьрщарайн.

ЦIуну увсса чIивитIу
Ккуккулий ишай ниттил,
Ниттил чIивитIу куна,
Хьувух ишай гьатталгу.

* * *
Ххал шайссия лахъния
Ххяллуйсса тIутIал аргу,
Ссавруннай кIяла читIул
ЛипI-липI тIисса хъаругу.

Тти щиннивав ккаккайсса
Щюлли хьхьемай някIшиву,
МарцIну ятIу-кIяласса
ХIурия-тIутIал паргу.

Щилли тяхъа бувайсса
Кьуллардай чарил ккурчIа,
ЧIиви-хъун личIи акъа,
Хъярч ва хъяхъаврил сахIна.

Агь, инай, агь, заманай
Ххинилсса ххаришивуй,
Ардайсса тIутIал хъюлчу,
Урттул угьлива личай.

Чарттал бюхттул билаят

Агь, ци бави кIай чарттан,
КIаксса цIурттачIан гъансса,
ТIутIайх бичай кIайннуву
Багъругу, бахчардугу.

КIусса заккантту кунма
Зунттайсса кIай кьунттала
КIурхру личай чулданийн
ШанчIапIалгу, тIутIалгу.

Хьхьунивусса някI цIаннай,
ТIурщу бакъа, пахъ багьай,
Лагма цучIавгу акъа,
Чарттал абадсса оьрму.

Яргри цIурттал чанигу
Хъахъи-цIансса цIайлуву,
Пар аьчух бай хьхьемаву
Хьхьувай тIутIал чIапIаву.

Шаэр Башаевлулгу
ЛавчIунни цIуртти чарттай.
КIай ссавнийми цIурттигу,
Чарттаятур тIар хьусса.

Шайссарив хъамабитан
Чарттал бюхттул билаят,
Хъахъи цIурттал цIу лахълай,
Итталух занай буна.

Агь, Салли ар, Салли ар

Агь, Салли ар, Салли ар,
Ущу-щулгъилул дунъял,
ХьхьунцIуллуй пятту-тIутIал
ЦIу лархъусса Салли ар.

Хъяр-хъяр тIисса бюнбутIив
Хъя чин буллай урттуву,
Ччяп-ччяп тIисса оьрватIив
ТIанкIа тIий бур щинавух.

Урттуй мяххи ххартI дуллай,
ОьхI-чаптIи митIикьукьу,
Оьтту-кьункьу буцавай,
Цирвав ххюрхху дуллайсса.

Гъаттарал хъуттал бакIуй
Зисса куц гъангъаратIи,
Къартту, бавахъул кунма,
Булувкьуну зузисса.

Оьру аьрщи ппив дуллай,
Ххяп-шаплий бурхха къулчча,
ТIитIалалул дуниял
ТIитIин дуллай циннагу.

Кьюнувравун кьувтIуну,
КьюлтI хьусса кьюнукьигу
Магъ оьрчIисса чIемуллул,
Къеп куну, бюкьайсса куц.

КIа ссурулух ссурхьа тIун
Шайсса хьурдай цIана тIий,
Кьунттарилу кьабагьну,
Ялугьлай бур хъун шатта.

Ххаллая чухъа щашлай,
ЩиривкIуну бур ххялцу.
Зев-зев тIисса зимизру
Зизлай бур закI-урттурайн

Гьайчагу тIий, тIутIавух
ТIанкIа тIий бур, барзукка.
Агь, хаварвагу бакъа,
КъаличIан къатта бакъа!

Агь, Саллиар, Саллиар,
Пятту тIутIал Саллиар,
Ущу-щулгъилун дунъял
ТIитIин дурсса Саллиар.

ЧIарттал-Ар

Хъусрал-ЧIарттал чIаттирдал
ЧIаравра дур ЧIарттал-Ар,
ЧIелму буна чIу буллай,
ЧIарах цучIав къалаглай.

Оьллааргу оьнна дур,
Оьллал газурду чув дур?
Оьллу ттизай оьртурду
Оьнма бачIва ливчIун бур.

Ухха-Аргу, уххай тIий,
Шанавух дур ццахха тIий,
Ххивну найсса жуява
Ххаришиву дакъар тIий.

Щамарайгу щюллисса
Ца Щюллу бур щюллинма,
Щюллиурттуй щюлли гъи,
ЩютIагу тIий, гьан дуллай.

* * *
Агь, лагабаргъ лавгунни,
Мусил паргу лавсуну,
Ттуруллайх кIункIу буллай
ЯтIу-парсса чанигу.

Лухччиний зунттурдугу
БавцIунни къаралданий,
Гьунттийсса мусил кьини
Хьунадакьин хьулданий.

Ци дикIанавав дунъял,
Бургъил симан дакъани,
ТалихIрал чани ххи бан
ЦIусса кьини къадуркIни.

Ххал шай бургъин аьрщарай,
Ччарча, талихI, ччарча, дард,
Агь, ва оьрму, дуниял –
Жагь кьурчIисса, жагь шадсса,

Бунугу баргъ дунъяллийх
БутIлай чумартсса чани,
Халкьру тIурчан, аьрщарай
Буссар кувннал кув литIлай.