Сентябрьданул 22-нний Дагъусттаннал ХIукуматрал Председатель Аьбдуссамад ХIамидов Ставрополлай гьуртту хьунни Дунияллул халкьуннал «АгроЮг-2016 форумрай.

Форумрал цалчинмур кьини хьунни пленар заседание. Тикку ихтилат буллай, Ставрополлал крайрал губернатор Владимир Владимировлул увкунни: «Шяраваллил хозяйство – ччимур билаятран стратегиялул бутIану хъанахъиссар, му дакъа хьхьичIуннайшиву хьун къабюхъайссар. ХIакьину жува цIакь буван аьркинссар му хьхьичIуннайшиврул гьану: азад хьун аьркинссар чил технологиярттая, гьаннарая, материаллая – цIубуккан буван Ватандалул АПК-рал потенциал».
Дагъусттаннал БакIчинал цIанияту форумрай гьуртту хьуминнахь аьла-ссалам бунни Дагъусттаннал премьер-министр Аьбдуссамад ХIамидовлул: «АгроЮг-2016» — му чара бакъа аьркинсса ва мюнпатсса дунияллул халкьуннал площадка хъанахъиссар, мунил щаллу дантIиссар агропромышленностьрал комплексрал лябу­ккаву Ухссавнил Ккавкказуллал ва Кьиблалул федерал округирттай.
Форумрай ккаккан дуллай бур переработкалул производствалунсса цIусса кьай-кьуй, дуллай бур ттизаманнул мюнпатсса проектирдал презентациярду, кунная ку за лахьлай бур, цIусса технологияртту ду­ккан дуллай бур, ми ишла дуллай бур, чичлай бур мюнпатсса контракт_ру. Миннул кумаграйну АПК-раву лябукку хьунтIиссар, кумаг хьунтIиссар импортозамещениялул задачартту щаллу буван ва щаллу дуван билаятрал продовольствиялул мюхчаншиву.
Форумрал гьурттучиту­ран чIа тIий ура цIусса хьхьи­чIуннай­шивуртту жула билаят тIутIайх бичаврил цIаний», — увкунни Дагъусттаннал премьер-министрнал.
Дискуссиялул чIумал Аьбду­ссамад ХIамидовлул бувсунни республикалий ласлай бушиву билаятрай ласайсса къюмайтIутIул 35% ва Аьрасатнаву бугьлай бушиву 2-мур кIану къюмайтIутIул бакIлахъия ласавриву ва чяхир дуккан давриву. Ганал му­къурттийн бувну, республикалий къюмайтIутIи бугьаву гьарза дурну дур, цIанасса ппурттуву тIутIи бугьлай бур 23,1 азарда гектарданий. 2015 шинал республикалий ларсун дур тIутIул 147,5 азарда тонна, 1 гектардания 88 центнер хIисавну, миннувату переработкалун ишла бувну бур 96,7 азарда тонна тIутIул.
ДакIнийн бутанну, Дагъус­ттан Республика Аьрасатнал регионнаву 10-ннивун духлай дур дикI, накI, ккунукру ва цамургу журалул продукция ласаврин хасну.
Форум тIитIавривух гьур­тту хьунни цаппара регионнал бакIчитал, Беларусь Республикалул промышленностьрал министр Виталий Вовк, АьФ-лул шяраваллил хозяйствалул министрнал хъиривчу Игорь Кузин ва цаймигу. Гара кьини Дагъус­ттаннал ХIукуматрал Председатель ивунни Ставрополлал крайрай ца яла хъунмурну хъана­хъисса «Чапаевское» ООО СП тIисса накIлил фермалийн.
Дагъусттаннал премьер-министрнащал архIал бия Ставрополлал крайрал ХIукуматрал Председательнал хъиривчу Юрий Скворцов, ДР-лул ХIукуматрал вице-премьер Билал Оьмаров ва цаймигу.
ХIадур бувссар
ХI. Аьдиловлул