Ватан дуруччайминнал кьинилун хасну, жулла рес­публикалий хьунни чIярусса шадлугъру, личIи-личIисса акциярду. Мукун, гьарца шинал ва байрандалул хьунийн дуллай аьдат­равун дагьну дур «Подарок солдату» цIанилусса акция. Му акциялувух хьхьичIунсса гьур­ттушинна дунни республикалул вузирдал студентътуралгу. 

Бадрижамал Аьлиева
Ва акциялул лагрулуву жулва жагьилтал лавгунни Каспийск шагьрулийн АьФ-лул ВМФ-рал 106-сса бригадалул аьралитурачIан ссайгъатир­ттащал ва концертрал программалущал. Республикалул вузирдаву ва акциялул давривух яла чялишну гьуртту хьунни Дагъусттаннал паччахIлугърал халкьуннал хозяйствалул институтралми студентътал.
Ва батIаву дайдирхьунни ДГИНХ-лул «Гордость» цIанилусса ансамбльданул. Гихунмай музыкалул номерду щаллу бунни ДГПУ-рал, ДГТУ-рал студентътурал, хьунни, солдатътурал гьурттушиврийну, бахшишру духлахисса бяст-ччал.
Ахирданий МахIачкъалаллал администрациялучIасса Шагьрулул жагьилтурал центрданул директор Шамил ХIасанхIусайновлул аьрали къуллугъчитал барча бунни МахIачкъалаллал Спортрал, туризмалул ва жагьилтурал иширттал комитетрал председатель Ислам Аьлиевлул цIания, 106-мур бригадалул командир Вадим Смирновлун ва мунал хъиривчу Роман Мясищевлун буллунни дипломру.
Ахирданий жагьилтал ва солдатътал, ччанну тIатIанну, бивзунни къавтIун.

Вара журалул акция дунни Дагъусттаннал паччахIлугърал университет­ралгу. Ва вузрал Жагьилтурал иширтталсса байсса комитет­ралмур, «Посылка солдату» цIанилумур, акциягу ларгунни лавайсса даражалий. Гьарца шинал Ватан дуруччайминнал байрандалийн солдатътурачIан дияйссар жагьилтурал чулуха­сса бахшишру. Ва ххуллухгу студентътурал къуршив буцIин бувну бия солдатътуран чара бакъа аьркинмунил, нацIушиврул ва цамургу дуки-хIачIиялул.
Гьашину ДГУ-ращал ва акциялул давривух гьуртту хьунни Дагъусттаннал паччахIлугърал аграрный университетралми студентъталгу.
ДГУ-рал ва ДГАУ-рал студентътал хъамалу лавгунни Каспийскалийн 6688-мур аьрали бутIувун. Ва хьунабакьавугу хьунни дакIнийхтунусса. Аьрали къуллугъчитал ва студентътал архIал балайрду тIий, хаварду буслай, куннахь куннал аьрали къуллугърая, дуккаврия цIухху-бусу буллай бия.
Ва акциялувух ДГУ-рал факультетирттаву хьхьичIун ливчуну бур экономикалулмур факультет. Ва факультетрал оьрчIал дартIун дур яла чIяруми посылкарду – 38. ХьхьичIунминнавух, мукунма, бур юридический, экологиялул ва географиялул, чил хIукуматирттал мазурдил, информатикалул ва информацион технологиярттал, социал факультетру.
Укунсса акциярдал жулва жагьилтурал дакIурдиву ххи буллалиссар цIими, лагма-ялттуминнахсса къулагъас, личIи-личIийсса регионная Дагъусттаннайн къуллугъ буллан бувкIсса аьралитурал дакIругу ххари, гъили дуллалиссар, миннаву оьрмулухун цалва аьрали къуллугърая ва Дагъусттанная личIантIиссар тIааьнсса дакIнийн бичавуртту.