Ларгсса нюжмардий Каспийскалийсса Аьрасатнал миллатирттал Аьдатрал культуралул центрданий хьунни Кьурбан-Байрандалун хасъсса шадлугъ. Ванивух гьуртту хьунни Дагъусттаннал бусурманнал РувхIанийсса управлениялул кIулшивуртту дулаврил отделданул вакилтал, шагьрулул администрациялучIасса культуралул ва жагьилтурал политикалул отделданул пишакартал ва №1 школалул дуклаки оьрчIру.

З.АьбдурахIманова
БатIаву тIитIлай, Центрданул хъунмур Башикар Вагьабовал бувсунни ва бусурманнал уммалун ца яла ххирасса байрандалул тарихрая.
-Кьурбан-байран исламрал ххуйшиву, рувхIанийшиву тасттикь дуллалисса байранни. Ва кьини бувайсса кьурвандалул цал ялагу тикрал буллалиссар Хъунасса Заннал къадагъалуву бушиву инсаннал оь экьибутIаву. Ва дур Аллагьная нигьа увсун икIан аьркиншиву кка­ккан буллалисса байран, -увкунни ванил.
Байрандалия мукунма шикку бувсунни ДУМД-рал зузала, Каспийскаллал мизитрал имам Аьбдулла Салимовлулгу.
-Ва дур жула бусурманнал халкь цачIун буллалисса, жунма буллусса циняв неъматирттах Аллагьнайн щукру буваншиву дакIнийн бутлатисса байран,-увкунни имамнал.
Каспийскаллал №1-мур школалул директор Ферида Аьлиевал цила ихтилатраву кIицI бувунни аьдатрал исламрал исватмуниясса кIулшивурттая гьарнангу гьарта-гьарзану кIулну хъиншиву. ЧIурчIав дурунни укунсса батIавурттал тарбиялулмургу хъар ларсун нанишиврий. Каспийскаллал Жагьилтурал союзрал хъунама Шамил Аьлиевлул бувсунни, чIявуну жагьилтуран жула диндалия кIулну бикIан аьркинмурвагу кIулну къабикIайшиву, цанма къакIулмур кIул бан интернетраву ххилтIу тIий лякъайшиву, гиву бумур тIурча, исламрал диндалия архсса, щялусса бушиву. Ванал кIицI бувунни диндалуву кIулмур-къакIулмунил хъирив аьлимтурайн буккан аьркиншиву, цIуххаймур миннахь цIувххуну хъиншиву.
Хьуна шикку ихтилатру хIакьину исламрацIун бавхIусса дунияллул иширттаягу, ислам ишла дурну, мунил душмантурал дуллали­сса кьадарсса тIуллаягу, мукунсса иширттая жула марцIсса аслийсса диндалийн биллалисса зараллаягу. ДУМД-рал вакилтурал бувсунни оьрчIахь МухIаммад идавсил (с.аь.в) оьрмулул лахIзардаягу ва умуд бивхьунни идавсил эбратрай оьрмулул ххуллийх дачинтIишиврийн жула ялун нанисса никгу.
БатIаврия махъ хъамаллурал ххал дурунни выставкалийн дуккан дурсса суратирттащалсса стендру.