Дагъусттаннал халкьуннал шаэр Расул ХIамзатовлул «КIя­ла кьурукьру» байрандалул (ХIамзатовлул кьинирду учару му байрандалийн) дайдихьу дуллалисса митинг хьунни МахIачкъалалив шаэр увсса кьини, сентябрьданул 8-нний.

ПатIимат Рамазанова
Цал машгьурсса «Кьурукьру» балайлухун Лениннул Комсомолданул паркраву­сса СаллатIнал гьайкалданучIа тIутIив дирхьунни. Митинг дайдихьлахьисса махъ лахълай, ХIукуматрал Председательнал цалчинма хъиривчу Анатолий Карибовлул бувсунни гьашину ХIамзатовлул кьинирду дуллай 30 шин хъанай душиву, ми, хъунасса шаэрнал хIурмат бушиву исват буллалисса кьинирдацIун, аьрай ливтIуцириннал аьпалул хIурмат жучIава лахъну бушиву ккаккан буллалисса кьинирду душиву. Дагъусттаннал Чичултрал союзрал председатель МахIаммад АхIмадовлул кIицI лавгунни, Дагъусттаннай кIяла кьурукьирттансса цалчинсса гьайкал Гъунив дацIан дурну 30 шин хьушиву. Аьрасатнал Чичултрал союзрал цалчинма секретарь Сергей Ивановлул бувсунни Расул ХIамзатовлул «КIяла кьурукьру», «БивкIубакъасса полкращал» архIал, аьрая зана къавхьуминнал аьпалул ттарцIруну хъанахъишиву.
Фестивальданул хъамал митинграя мукьах шаэрнал къатлувун бивунни. Вара кьини Поэзиялул театрдануву хьунни аьрасатнал поэзиялул мажлис. Тиккугу гьуртту хьунни Рес­публикалул БакIчи Рамазан АьбдуллатIипов. Ванал чIурчIав дунни шаэрнал пасихIсса му­къул биялагу, цIакьгу хъунма­сса бушиврий, шаэрнал му­къул хIукуматру ва миллатру гъан буллалишиврий. Цала-цала шеърирду бувккунни ялув кIицI лавг­сса Геннадий Ивановлул, Москавлив «КIяла кьурукьирттал» фестиваль дурсса шаэр Сергей Соколкиннул, регионал чичултрал союзирттай каялувшиву дуллалиминнал. Къиримнал Чичултрал союзрал председатель Валерий Басыровлул Дагъус­ттаннал цаппара чичултран дуллунни хIурматрал грамотартту ва Расул ХIамзатовлул музейран пишкаш дунни сурат (картина).