БивкIу бакъасса назмурду

toto_11Дагъусттаннал халкьуннал шаэр Расул ХIамзатовлул аьпалул вечер хьунни Москавлив шаэр дунияллийн увксса кьини – сентябрьданул 8-нний. Му хьунни дунияллул халкьуннал дянивсса Москавуллал луттирдал выставка-ярмаркалул лагрулий. Аьрасатнал ПрезидентначIасса Дагъусттан Республикалул вакилханалул пресс-службалул баян бувсса куццуй, му выставка-ярмарка цурда тIиртIуну дур мура кьини дяхтта ВДНХ-лул 75-мур павильондалуву.
Вечерданий бувккуну бур шаэрнал шеърирду, хьуну бур мунаясса дакIнийнбичавурттал бувцIусса ихтилатру, ккаккан дурну дур документал кинорду. «Намус» цIанилусса поликультурный центрданул къавтIалтрал унгу-унгуну чIюлу дурну дур ва шадлугъ цалла яргсса къавтIавурттайну. Дуклаки оьрчIал дурккуну дур шаэрнал цIанихми назмурду.
«Литературная газеталий» шаэрнал аьпалул вечер душиву бавну, ванивух гьуртту хьун увкIсса Владимир Смирновлул яла-яла махIаттал бувну бур бавтIми. Ванал бувсун бур цува цикссагу шиннардил лахъишиврий шаэрнал творчествалухун агьну ушиву, цанна мунал чIяруми назмурду дакIних кIулшиву, Расул ХIамзатов цала кумир ушиву ва ва вечер дуллалисса баяйхту, цала буржну чIалан бивкIшиву мунивух гьуртту шаву.
Вечерданувух гьуртту хьу­сса, муний назмурду дурккусса цинявннан «Дагестан» басмаханалул директор УмархIусман ХIажиевлул дуллуну дур бахшишру – Расул ХIамзатовлул творчествалун хас бувсса луттирду.
Москавуллал луттирдал выс­тавка-ярмаркалий цалла продукция дирхьуну дур Аьрасатнавусса 500-нния ливчусса издательствардал, миннувух «Дагъусттан» издательствалулгу. Миннуву лайкьсса кIану бугьлай бур хъунасса шаэрнаясса луттирдалгу.

«Дни Белых журавлей» фестивальданул лагрулий Поэзиялул театрдануву ккаккан дунни Расул ХIамзатовлул оьр­мулул ва творчествалул ххуллиясса фильм «Мой Дагестан. Исповедь».
ДакIнийн бутан, ва фильм­рал премьера хьуссар 2014 шинал. Мунил режиссер – Мурад Ибрагьимбеков. Сценарий чивчуссар цIа дурксса драматург ва кинорежиссер Рустам Ибрагьимбековлул ДР-лул БакIчи Рамазан АьбдуллатIиповлущал цачIу. Фильмрал гьанулун лавсун бур Р. ХIамзатовлул «Мой Дагестан» тIисса лу. Фильм ларсун дур 2013 шинал шаэрнал бу­ттал шяраву ЦIадав. Дур мукунна МахIачкъала, Дарбант шагьрурдай дурсса съемкардугу.
Поэзиялул театрдануву тамашачитурал хьхьичIун ва кьини бувккуна жагьилсса Расул ХIамзатовлул ва мунал буттал ХIамзат ЦIадассал роллу дургьуну бивкIми – жагьилсса актер ХIажи Ибрагьимов ва Аьрасатнал лайкь хьусса артист ХIусайн Казиев. Миннал бувсунни ва фильм­рая гьарта-гьарзану, фильмравух гьуртту хъанайна цанна ци захIматшивуртту хьунадаркьу­ссарив.
Яруссаннал театрданул дирек­тор МахIаммадрасул МахIам­мадрасуловлул бувсунни ва фильм­равунсса актертал цукун язи бугьлай бивкIссарив.
Поэзиялул театрданул директор Елена Гьаруновал цила ихтилатраву умуд бивхьунни уку-укунсса хьунабакьавуртту ялуннингу хъанантIишиврийн.

КIяла кьурукьирттал Кьинирдал лагрулий хьусса чIярусса шадлугъирттавасса цану хьунни Поэзиялул театрдануву дурсса аьдатравун дагьсса «Поэтические чтениярдугу».
— Литературалул ххаллилсса байрандалул хIакьину кIицI лаг­лай дур 30 шинал юбилей. Му сипталул авторнугу ивкIссар Дагъусттаннал хъунасса арс Расул ХIамзатов, — увкунни вечер тIитIлай Поэзиялул театрданул директорнал хъиривчу Ариза Батировал.
Байран шаэрнал язими наз­мурдайну тIиртIунни Ххунзахъуллал райондалиясса дуклаки оьрчIал. Гихуннай шаэрнал назмурду дурккунни МахIачкъалаллал ва Каспийс­каллал школардал дуклаки оьрчIал, жагьилсса шаэртурал «Лира» клубрал гьурттучитурал, Правовая академиялул студентътурал.
Ахирданий дуклаки оьрчIал ссавруннайн итабавкьунни 30 кIяласса гьавалул шарду.
ХIадур бувссар
Бадрижамал Аьлиевал