Хасъсса аьралий операциялийминнан чIявусса кумагру буллалисса МахIачкъалалив, Юсуповлул( нукIувасса Хуршилова) цIанийсса кIичIиравусса «Солидарность и Свобода» организациялул штабрая къабавсса нажагьсса бухьунссар. СВО байбишайхту, аьрайн гьан бансса гуманитар кумаг батIаву ва биян баву мурадрай сакин хьусса халкьуннал штаб хIакьину азарахъул волонтертал лагма лаган бувсса, хъунмасса гуж бусса суккушиннарайн кIура бавну бур.
Штабравусса ва вайннащал уртакьну зузисса волонтертал «хуршиловцы» тIий кIулну бур щалагу республикалий. Шиккура щашлашисса къерттая дука-хIачIанмунийн, техникалийн дияннин тоннардайсса гуманитар кьай гьан дурссар «хуршиловцынал» аьрайн. Аьрал цIакьссар вихшаласса къинтта буссаксса. Жула аьралуннал мукунсса цIакьсса къинтта бушиврий мукIру шара гьар мудан шиккун бувкIсса чIумал.
Вай гьантрайгу штабрай хьунни «арцул волонтертуран» хас дурсса «Герои тыла: связь поколений» цIанилусса мероприятие. Мероприятиялул лагрулий лахъа-хъун буллай бия аьраяллин кумагру буллалисса волонтертал ва жяматийсса организацияртту. Чансса бакъар вайннаву арсру, уссурвал, гъанчув цIанасса чIумал хасъсса аьралий операциялий буссагу. Бур хасъсса аьралий операциялий жанну дуллусса къучагътурал нину-ппугу.
Низами Сулаймановлул ва Рамазан Исраповичлул кIи-кIия арснал жан дуллуну дур Ватандалул мурадру буручлай.
Мероприятиялий штабрал давурттая бусласисса, волонтертурахь барчаллагь тIисса ихтилатру бунни «Солидарность и Свобода» жяматийсса организациялул советрал хъунама МахIаммад КьурамахIаммадовлул, 1999-ку шиналсса цачIусса ополчениялул ветерантуран кабакьу буллалисса жяматийсса организациялул президент Абубакар Кьурбанисмяиловлул, чялишсса волонтертурал. Дачин дурну бия мероприятие волонтершиву миссиялийн кIура дарну, хасъсса аьралий операциялун кумагру буллалими цачIун буллалисса ва кумаг аьралийтурачIан биян бан цуппа лагайсса, аьралийтурал «Сестренка» тIисса позывной дуллусса отставкалийсса полициялул майор Ума Аскерханова. Ванил дуллунни чялишсса волонтертуран аьралуннал штабрал чулухасса наградартту. Шиккува кIицI лаган, чIявусса лак буссар шикку мудан аьрайн кумаг тIайла буклакисса. ЧIятусса Бадуржагьан,ЧIаратусса Сарбижамал, ПатIимат, Таибат, КIувратусса Исмяил ва Мисиду Гьаруновхъул, 2-мур ЦIувкIратусса Садаят, ЦIуссаккулатусса Имара, Бархъаратусса Аьлибецов Оьмар, Хамзина ПатIима. Штабрай дуллалисса гьарица мероприятиялул чIарав ацIайссар ва музыкалул щаллушинна дайссар 1-мур ЦIувкIратусса Шарапи Ажубовлул. Шикку дуллалисса циняв мероприятиярттай хъуннасса хъар лахъай сакиншиннарал, дука-хIачIанмунил ялув бавцIусса Наниш Мажидовал.
Ва кьини, мероприятие къуртал хьуну махъ, волонтертурал, дуаьрдугу дурну, гуманитар кумагращал хасъсса аьралий операциялийн цIунилгу тIайла бувккунни Ума Аскерханова. Ва ванил 62-мур аьрххи бия СВО-лийн. Ванищал лавгунни ва аьрххилул сиптачи ва сакиншинначи хьусса МахIачкъалаллал Н.ХIажимахIаммадовлул цIанийсса 42-мур школалул педагог Аьйшат Далгатова.
Аьрайн нанисса гуманитар кумаг хъунмурчIин бия ва школалул (директор Ххадижат ХIусманова, завучтал Сельми СаидахIмадовна ва Байгинат Мусаева, учитель Дильшад Мехрабова) коллективрал, дуклаки оьрчIал ва нитти-буттал чулухасса. Вайннавух хIала хьунни Испаният Шамхаловнал каялувшиннаралусса МахIачкъалаллал 63-мур оьрчIал багъгу, Аьйшатлул дустал, гъан-маччамигу. Цила зумуну дугърину ка дургьунни жула Бадуржагьаннулгу.
— Жул школалул хьхьичIрагу салкьи дурссар аьрайн гьан данмур. Ми личIи-личIисса организациярттайхчин тIайла дуклан бикIай. Жу «хуршиловцынахьхьун» дулун хIарачат барду, цанчирча мукIруну буру кумаг аьркиннийн, саллатIначIан бияншиврий, — тIий бур Аьйшат. Ва ххуллухь, ва цуппа лавгунни Ума Аскерхановащал хьхьичI ххуттай бавцIуминначIан кумаг биян бан. Ккуччу тIий буцIин бувсса машиналий кIивагу хъамитайпа тIайла буклай, дуаьрду дуллай буссияв цинявппа.
Р.S. Ва макьала кказитрай дукканнин жул душру нигьачIисса шартIирдай 1-мур армиялул (ва ххуллухь вай шиккун тIайла бавцIуну бия) аьралийтуран кумаггу биян бувну, зана хьунни. Аллагьнайн щукру, ххуллийх нигьачIисса ишру хьунугу, сагъ-саламатну.
Ихтилат цамунияр.
Так вай шаппайн зана хьуну махъ кIул хьунни жун Аьйшат Далгатовал арсгу тийх ивкIшиву. Мунил зумату арс тийх ушиврия ца махъ къабувккуна. Цуппа тихун нанишиву арснахьгу бувсун бакъая. Тихун бувкIун махъгу, хьхьичI ххуттай авцIусса арсная кьюлтI бувну бия цуппа та усса кIанай бушиву. Так шанул ккик къаувкуну, пар-пар тIутIи дурну ларкьуну дия блиндаж.
На махIаттал бувну бивкIра арсная ца шаттирал манзилданий бунува, тай циняв ттул арсрур тIий, та ккаккансса кьаст къалархIуну, зана хьусса ниттил кьянкьашиврул.
Я Аллагь, бурувччуну лякъиннав цинявппагу жула оьрчIру. Дагьаннав ниттихъал дакIурдивун рахIатшиву.
Андриана Аьбдуллаева
