Чанкура
КьурбанмахIаммадов
ПархтIутIи
Ттул алшилул ахъуву
Дуссия ца пархтIутIи,
Бургъил кунма, оьрмулул
Ххуллу чанна буллайсса.
БикIайссия ахъуву
Хъин хъамаллуврал хъатIи,
ПархтIутIул буллугъшиврул,
Байран кунма, тяхъасса.
ПархтIутIул лагма лехлай,
Шадшиврул мякь къалихлай,
БикIайссия балай тIий
ПархтIутIул ссурвал – булбулт.
ПархтIутIул чIапIайх ках тIий,
Миннуя хьхьем ланцIа тIий,
ПархтIутIуя пахрулий
БикIайссия «бакIхъахъулт».
ТIар-хавар бакъа бувксса
ЛухIи-цIан тIюпандалул
Чагърайсса ттул пархтIутIул
Чурххайн чявхъа бивчуна.
ПархтIутIи пана хьуна,
Ссавний цIуртти левщуна,
Балай тIий къабуххайсса
Бурбултрайх сил диртуна.
Утти ттул алшилул ахъ
АьтIий, зума тIий буссар,
Ахъуву балайлул чIу
Башттан бухлавгун буссар.
Булбулрал бакIурдийгу
ЛухIи лачакру дуссар
БакIхъахъултрал дакIругу
КIулщуйн дурккуну дуссар.
Ца дур дакIнил куртIниву
ЛадиркIсса ххаришиву –
Ттул пархтIутIул мархлуя
Мусил ккиж най душиву,
Му ккиж ттун пахрулунсса,
Ттул пархтIутIул пар бусса
Хьуншиврийнсса умудрал
Шарав хIачIлай ушиву.
Дустурал дастта
Ттул дустурал дастта
ХхялтIа дуклай дур,
Язими лаглай бур дунияллия.
Духлаглай чIалай дур
Дунияллул нур,
Щалиххан къавхьунтIий
Ттуща минная.
Ххарцари дуллай дур
ВирдакIнил ула
Оьрмулува лавгсса
Дустурал цIардал.
ЦIунцIу тIий, цIалай бур
Дардирдал кьулла,
Гьалак буллай миннал
Аьпалул цIаннал.
Буссия ттул дустал
ДакIру дугърисса,
Чумартшиврул чаннал
Чаннан дарцIайсса.
Цал мазрая бивзсса
Мукъуй бацIайсса,
Дусшиврул кьануннайн
Икрам бувайсса.
Акъассия цучIав
Ттул дустураву
Кьадрулий, кьиматрай
ЦIа кIицI къадансса.
КъакIулли циваннив
Заннал чулуха
Чумартътурал жаннай
РахIму бакъасса.
Буссия ттул дустал
Бунагь бакъасса,
Оьрмулул дулантту
Лаласун шайсса:
Шаэртал, чангийтал,
Чичулт, аьлимтал,
ЧIявучин бусравсса
Мукъул усттартал.
Дард дур ттул дакIниву дазу дакъасса
Арснал Шамиллул аьпалун
Ттуна нава ура
Пакьирну чIалай,
Пашмансса пикрирдал
Палачат уллай.
Дард ттул дур дакIниву
Дазу дакъасса,
Дарман лякъиншиврийн
Умуд бакъасса.
Щарнил хIатталу дур
Ттул къатлул чIарав,
Ца акъа акъасса
Арснал гьав – тикку…
Ялун дагьну ура
Щаллара някI ссав,
КьюлтIа тIий щялухьу
Хияллал кьассав.
Оьрмулул нязаннив
Жан шагьид дурсса
Ттул Шамил уссия
Аькьлу камилсса.
Милицанал майор –
Мяърипат марцIсса,
ДакIру чанна дувай
Чирахъ кунасса.
Мармарчарил гьайкал
Арснал гьаттайсса –
Дур ттул аьсившиврул
Лишан лухIисса.
Къумашиврул къув-аьс
Хханххиравусса,
Янилун дагьтари
Ягин буллайсса.
Къатлул нуз тIитIара
Гьайкал хьхьичI дацIай,
ХIасратрал чIутIул къурхъ
Кьакьарттуй дацIай.
Къумасса дакIнива
Леххаву кунма,
Мукьал кIунтIа тIисса
КIусса «угь» личай.
Ттул арснал дусталъя
ДакIру чаннами,
Чумартшиврул чани
Чин булун шайми.
Адав-инсапрал чай
Бурттий бачайми,
Аьдлулул кьануннайн
Хаин къашайми.
Уссар тIар Аллагьгу,
Каши канихьсса,
Оьмунил, хъинмунил
Хъирив лаяйсса.
Агарда ухьурчан,
Цанни ниттихъул
Аслансса арсваврах
ЛухIи лахлайсса?
Ци тахсирди хьусса
Ттуй Аллагьнал хьхьичI,
Хъин къашайсса щаву
ДакIниву дуван.
ЦIунцIу тIий цIалайсса
Щавулул къюву,
КъюкI парчари хьунну
ДухIлахIи уван?
Ттун ва дунияллул
Давлат къаччива,
Цал ттигу арс чIарав
Щяитан ччива.
Ахиратрал ххуллийх
Нава ачиннин
Арснал алвагь бакIрайх
Ках учин ччива.
ЧIумул хъин дувайссар
ТIун бикIай щаву,
Язинал бивкIулул
ДакIниву дурсса.
Вих хьун ххай акъара
На мунийн цучIав,
Агарда ухьурчан
Ттун ккавкмур ккавксса.
ОьрчIнийсса чIунну
ДакIния къадуккай
ОьрчIнийсса чIунну,
ОьрчIи-кIури датIлан
Зунттайн лагайсса.
ЧIунархIал оьрчIащал
Барзунттал бакIайх,
Авлул гадри кунма,
Лечлан бикIайсса.
КIюрххия гьанттайннин
БачIва ччаннащал
БикIайссияв лечлай
БагьтIатI хьунцIакул.
БучIайссияв шаппайн
Лагабургъищал,
Зунттал ахъулссаннул
ДурцIу шушращал.
Барзунттал бизанттай
ДикIайва чIирхь, чIит,
Ккашилсса жул лякьран
ДучIи лякъайсса.
Ххяллай – къягъул гьивчру,
Букан щинтасса,
Щаращул щинахсса
Мякь кьукьин байсса.
Барзунттал бизантту
ТIутIан тавтусса,
Кьункьал нахIушиврул
Увччу уллайсса.
БакIхъахъулт – бизанттал
Ялту лехлайсса,
ТIабиаьтрал сурат
ЧIюлу дуллайсса.
Арцул щинал ратIру
РахIру ттислайсса,
Жюржу, балай кунма,
ВичIан баллайсса.
ХъачI-бакIай – ттуруллал
Ппутру кIяласса,
Сайрданий бачиннин
Бигьалаглайсса.
Тай чIунну диявав
Ттул оьрмулул инт,
Ликъаххайсса мугьру
ДакIний бищунсса,
Хъунав хьуну махъгу
Барзунттал бакIайх
Лечлансса хьурдайлул
Хьул къакьукьлайсса.
Дур ттул ца ххаришиву
Дур ттул ва дунияллий
Анжагъ ца ххаришиву –
Ххуйшивурттал ххазналул
Заллу ина бушиву.
Ххуйшивурттал ххазналул
Залуннал заллу хьунсса
Каши ялувсса Заннал
Ттухьхьунна дуллушиву.
ДакI къуману къупIа тIий,
Яру аьтIий бунийгу,
ДакI тяхъану балай тIий,
Буруккин бакъанийгу,
Вил сурат ттул яруннал
ХьхьичIа тачIав къадукьай,
Ттун му ттула оьрмулул
Гьануну чIалан дикIай.
Ттул дакI чаннал дуцIин дай
Чанна цIуку инара,
ЧIарав бакъа чIун гьарча,
ДакI цIаннал дуцIин дайсса.
Ттул язими шеърирдал
Асардал щаращира,
Оьрмулул ахир хьуннин
Экьинай личIантIисса.
ДакI ххуцIну дурча,
ЧIумул биялалул
Лиххан къадурну,
Ми ттигу дакIниву
Сагъну духьурча.
Дува тикрал, дува
Ттигу ттюнгъану,
Ташулул тавханттул
Тах цIу лаганну,
ЦIунилгу ташулул
Хьхьу тикрал хьувча,
Бургъил тIинттал цIубарз
Гъили булланну.
