ЦIущуллал шяраву

Уртту-тIутIавун дахьларгсса тIабиаьт яла аргъирайсса чIумал бивру жу ЦIущуллал ва 2-мур ЦIувкIуллал шяраваллавун. Къабяйкьинссару, Хъунасса Заннал, мяш къавхьуну, ххишалассагу тIабиаьтрал караматшивуртту вай шяраваллан дуллуну дур учирчангу.
ЦIущаннив нани ххуллийсса кIивагу чулухсса лухччай, ардай неъматрай бия уттигъанну марххалттанул ясирдануща ххассал хьусса ризкьи. ТIайламур бусан, шяравунсса ххуллу хъинну лащинсса тагьарданий буну, архнийва машина кьабитлай, занай буссияв жугу. ТIабиаьтрал тамансса зараллу биян бувшиву чIалай бия хъяхъа куну, лахIунтту дурксса лагма-ялттусса зунттурдайн ящайхту.

ЦIущаннив жу хьунабавкьуру шяраваллил администрациялул бакIчи Кьурбан Шапиевлущал. ХIакьину ва шяраву дур 24 хозяйство. Гъинттул чIумал шикку 60-70-ннийн дирсса хозяйствартту шай тIар. Шяраву бур ФАП, Культуралул къатта, библиотека, школа. Халкьуннал маэшатгу хъунмурчIин ризкьи ядаврия, хъу-лухччи дугьавриясса бур. Гьашинусса марххалттал тамансса зараллу биян бувну бия ЦIущуллал шяраваллийнгу. Зунттул лахIуни дагьну, машинартту гьансса ххуллу бакъа бивкIун бур.
– Куннил ялун кув хъунисса марххалтту бувсса ппурттуву, жу ацIвахъул гьантрай ттукI бакъа ливчIун бивкIру. Ххуллурду левкьун, жува цукун буссарив бусан, оьвчин къахъанай дахIаву дакъа буссияв. Шяраваллил ялун лахIуни дагьан диртссания, цимур-ца лавсун гьанссия. Техника дуркIун, лахIуни неххавун дачин дуллай бивкIру. Жуйва жуванугу, цаппара кумагчитурайхчIингу ххассал хьуру тай иширттаща. Райондалиягу оьвтIийнма бия. ЖучIанияр оьсса тагьар та ппурттуву Ккулув, Хъусрахь дия. Цалчинмур ЦIувкIуллал ва Хъювхъиял шяраваллавунсса ххуллурду бавщуну бия. Райондалул хъуниминналгу ка хъирив лаллай дакъая.

Ххуллу буккан кумаг бувна Лакрал райондалул Ххуллурдал строительствалул участокрал хъунама Гъариман Илиясовлул. Жямат барчаллагьрай бур, шяраваллийн кьини дурксса чIумал цащава шайсса кумагру буллай, чIарав бацIлай бивкIсса инсантурайн. Тай гьантрай Ярославль шагьрулий ялапар хъанахъисса, гьарица ишираву чIарав ацIайсса шяравучу Ярагъи Маммаевичлул мукьра тонна кормалул дарчIуна халкьуннайх. Мунияту инсантуран ххуйсса кумаг хьуна. Жула шяравучу Юсуп Рамазановичлул ЦIуссалакрал райондалийсса Гьамиящиял шярава ххалал камаз бувкIна. Буминнал ххулув бакъаминнан буллай, цаннан ца кумагру буллай бия инсантал. КIирагу райондалул энергетиктал, ЦIущуллал жямат цачIун хьуну, бакьин бувна ттукI. Ккуллал райондалия, лахъисса манзилданийх, бувцуну бур жул шяравунсса ттукI. Чансса марч бивщуну, гьавалул тагьар даххана хьусса чIумал, ххаллу руцлай, ттукI лешлай, азурда хъанан бикIару. Мунияту, жу буру райондалул хъуниминнахь чIаравсса Хъурхъиял шяравасса линиялия ттукI буцинсса хIарачат бара тIий, миннатрай. Цанчирчан, электриктурангу та архсса манзилданийх ттукI бакьин буллан букIлан бигьану бакъар, – буслай ур Кьурбан Шапиев.

ЦIущуллал шяраву къатта-къушлин личIисса зарал бивну бакъар. Ятту-гъаттара къахIисавну, ацIнияхъайсса балчант ливтIуну бур. Ризкьи электрон журалул хозяйствалул луттирайн лавсун бакъашиврийн бувну, хIукуматрал чулуха кумагру бувну бакъар. Тай гьантрай оьрмулул шартIру дакъа ливчIсса цинявппагу инсантуран хIукуматрал чулухасса кумагру бувну бур.

Кьурбан Шапиевлул жухь мукунма бувсунни, чIал къавхьуну тIитIин най бушиву хасъсса аьралий операциялий къучагъшиврий жан дуллусса Набиуллагьлул арс Шамил МахIаммадовлул цIа абад дуллалисса мармарчарил ула. ЧIалай бия жяматрал дянив Хъун дяъвилий Ватан дуручлай бивкIминнал кьимат лавайсса бушиву. Жяматрал хIарачатрайну гьануцIакул цIу дуккан дурну дия Хъун дяъвилул вирттаврансса гьайкал.
ЦIущуллал шяраву бур цинярда шартIру дузал дурсса, ххаллилсса ФАП. Мурхьирдал ва щюллишиврул вив лавсъсса ФАП-рал хIаятраву дургьуну дия тIутIив. МарцIсса ва чаннасса кабинетру бусса ФАП-рал жанахIраву дия шивун бувкIминнал уссайх лаххансса бахиларду. ЧIалай бия шикку цала даву ххирасса, низам дусса зузалт бушиву. Шикку техничкану бур Бадира Шапиева.

ФАП-рал каялувчину бур жяматрал дянив хIурмат-кьиматрайсса Анисат АхIмадова. Шиккун букIлай бия давление дуцин, ххалаххив бан ва цаймигу процедурартту бан аьркинсса инсантал. Мюрщими ва хъуними хIала-ккалану 170 инсан ия ФАП-рал сияхIрай. Иш багьний оьвчин багьарчангу, Анисатлул гьарцанначIа кьариртун дия цила телефон. Вания ххишала бакъа рязину бия шяраваллил жямат.
Анисат ЦIущуллал шяравун бучIаннин кIира шинай зий бивкIун бур Гъумуксса поликлиникалий. 2012 шиная шинмай зий бур ЦIущуллал ФАП-рай. КIира шинал хьхьичI Анисат бивтуну бур ФАП-рал каялувчину.

ЦIущуллал шяраву жун хьунабавкьунни марцIну лакку мазрай гъалгъа тIутIисса Якьуб ва Ясмина Нураттиновхъул. Лакку мазрай тIааьнну буллалисса вайннал ихтилат бавукун, жу хъинну ххаригу хьуну, вайннал нитти-буттахь бусарду «Илчи» ­кказитрал баян бувсса, хасъсса аьралий операциялий жан дуллусса Чувшиврул ордендалул заллу Алик Гъазиевлул цIанийсса шеърирду пасихIну буккаврил конкурсрая. Мюрщултрая буцан бан къахъанай, жапрай бия ттул коллега, оьрчIансса «ЧIимучIали» страницалул автор ПатIимат Рамазанова.

P.S. Барчаллагьрай кIицI лаган ччай бура Ккуллал райондалул щархъавусса буккултрал къайгъурдая, буруккинттая цIухху-бусу бан, вайннащал хьунабакьинсса ххаллилсса проект хIасулгу дурну, цинявппагу аьрххирдай гьуртту хъанахъисса ­«Илчилул» хъунама редактор ­Руслан Къардашовлул цIа.

Имара Саидова