ДР-лул чIумуйнусса вице-премьер Валентин Клок къуллугърал аьрххилий увкIунни Ккуллал райондалийн.
Муниципалитетрал каялувчинащал цачIу ванал ххал бунни личIинурасса тагьарданул зараллу биян бувсса кIанттурду, кьимат бивщунни зараллу бухлаган баншиврул дуллалисса давурттан. Яла, батIаву дурну, ххал бивгьунни ялапарлувтуран кумаг баврил масъаларттугу.
ХIакьинусса кьини райондалий ххал дигьлайнма бур зараллу бивсса къатри, хIадур буллай бур къатрал документру, паччахIлугърал чулухасса кумаг тIалав баншиврул ва зарал бивсса инфраструктура цIу дуккан даншиврул.
Зараллу бивсса инсантуран буллуну бур сайки 20 млн къурушрал, дуллай бур ххуллурду бакьин буллалисса ва щинаххуллурдал система цIу дуккан дуллалисса давуртту.
ЛичIину кIанттул инсантуращал цачIу ххал бивгьунни райондалул шяраваллу щинал дузал даврил ва цаймигу социал-экономикалул масъалартту.
ЛичIинурасса тагьарданул биян бувсса зараллу бухлаган баврил ва зараллу бивминнан кумаг баврил масъаларттал ялув авцIуну ур ДР-лул бакIчинал чIумуйнусса кIанайма Федор Щукин ва ХIукуматрал председатель МахIаммад Рамазанов.
ХI. Аьдилов
