Бусалардавун агьсса самбист, UFC-лул чемпион Ислам МахIачевлун дуллунни «Заслуженный мастер спорта России» тIисса хIурматрал цIа.

Му амрулий къулбас дуруну дур Аьрсатнал Федерациялул спортрал министр Михаил Дегтяревлул.
«Ислам ур хьхьичIунайсса спортсмен, боевой самболул дунияллул чемпион, ванал хъунмасса захIмат бихьлай ур жунна ххирасса единоборство дунияллул халкьуннал дянив машгьур давриву. UFC-лул платформалий иллай ва хьуссар чемпион най уна кIира кIушиврул даражалий, ва сивсуну лавхъунни дунияллул хьхьичIунми биюлтрал рейтинграл бакIрайн, кIушиврул даражалухгу къабурувгун. ЧIявусса миллионну инсантурал бусса дунияллул халкьуннал аудиториялул хьхьичI махъ лахълай, ванал даин пахрулий учай, боевое самбо ттул яла маччамур спортри, куну ва иширайну чIалачIи бувай, цуксса гужсса ва мюнпатсса буссарив жула спортрал жура», – увкунни Самболул дунияллул халкьуннал федерациялул (ФИАС) президент Василий Шестаковлул.

ДакIнин бутанну, гьашину Ислам МахIачев хьуссар дунияллий самболул вакил (посол самбо в мире). Ва хIукмулия баян бувну бивкIссар жула спортсмен Василий Шестаковлущал хьунаавкьусса чIумал, февральданул 18-нний Самболул дунияллул халкьуннал центрданий.
Га кьини МахIачевлул увкуну бивкIссар, ва цIусса цIанил официальну цIакь бувну бушиву танийва буниялагу хьусса иш: ванал цалагу, Федор Емельяненколгу, ХIабиб НурмахIаммадовлулгу самбо ккаккан буллай бушиву ММА-лул дунияллул ареналий.
«На ттинингу увкуссия Василий Борисовичлухь, на укунагу къаофициальнугу хIисав хъанай ура дунияллий самболул вакилну. Нагу, Федоргу, ХIабибгу кIулну буру самболул вакилтал кунма. Ттул пикрилий, ММА-лул хIал кIулма ттущал акьинссар, яла хьхьичIунми биюлт – ми самболул вакилталли», – увкуссар та чIумал Ислам МахIачевлул.

ХI. Аьдилов